ကရင်အမျိုးသားအစည်းအရုံး KNU တပ်မဟာ(၅) နယ်မြေအတွင်းကို နယ်ကျွံဝင်လာတဲ့ စစ်အုပ်စု ယာဥ်တစ်စီးကို တိုက်ခိုက်ရာ အဆိုပါယာဥ်ပေါ်ပါလာသူ ငါးဦးစလုံးသေဆုံးပြီး လက်နက်၊ ကျည်နှင့် ရိက္ခာအချို့ သိမ်းဆည်းရမိခဲ့တယ်လို့ ဗမာပြည်သူ့လွတ်မြောက်ရေးတပ်တော်(BPLA)က ထုတ်ပြန်ပါတယ်။
မနေ့ ဇူလိုင် ၁ရက်နေ့မှာ ကရင်အမျိုးသားလွတ်မြောက်ရေးတပ်မတော် (KNLA) နှင့်ဗမာပြည်သူ့လွ တ်မြောက်ရေးတပ်တော်(BPLA) မှ တပ်ဖွဲ့ဝင်တွေ KNU/KNLA တပ်မဟာ (၅)၊ ဖာပွန်မြို့အနီး ရှေ့တန်းတစ်နေရာမှာ မိုင်းထောင်၊ကင်းပတ် နေချိန်စစ်အုပ်စုတပ်ဖွဲ့ဝင်တွေ မောင်းနှင်လာတဲ့ ကားတစ်စီး နယ်ကျွံဝင်လာတဲ့အတွက် မိနစ် ၂၀ခန့် တိုက်ပွဲဖြစ်ပွားခဲ့တယ်လို့ဆိုပါတယ်။
အဆိုပါယာဥ် ပျက်စီးသွားပြီး ယာဥ်ပေါ်ပါစစ်အုပ်စုတပ်ဖွဲ့ဝင် ငါးဦးစလုံး သေဆုံးကာ (၄၀) မမ – ၁ လက်၊ AK – ၂ လက်၊ M4 carbine – ၁ လက်၊ G3 – ၁ လက်၊ လက်ပစ်ဗုံး – ၃ လုံး၊ ကျည်နှင့် ရိက္ခာအနည်းငယ်တို့ သိမ်းဆည်းရရှိထား တယ်လို့ထုတ်ပြန်ထားပါတယ်။အင်တာနက်အခက်အခဲကြောင့် ဓာတ်ပုံတွေမရရှိနိုင်သေး သဖြင့် ဓာတ်ပုံတွေရရှိရင် ထပ်မံဖော်ပြပေးသွားမည်လို့ BPLA က ထုတ်ပြန်ထားပါတယ်။
Photo BPLA တပ်ဖွဲ့ဝင်များ (ပုံဟောင်း)
