NUG အစိုးရ၊ နိုင်ငံခြားရေးဝန်ကြီး ဒေါ်ဇင်မာအောင်နဲ့ မေလ ၁၄ ရက်နေ့မှာ တွေ့ဆုံသွားမှာဖြစ်ပြီး မြန်မာပြည်သူတွေ ဘယ်လို ရှေ့ဆက်သွားကြမလဲ ဆိုတာနဲ့ ပတ်သက်လို့ သိလိုကြောင်း မလေးရှားနိုင်ငံခြားရေးဝန်ကြီး ဆိုင်ဖူဒင် အဗ္ဗဒူလာက ပြောလိုက်ပါတယ်။
မေလ ၁၁ ရက်နေ့၊ အမေရိကန်-အာဆီယံ ထိပ်သီးအစည်းအဝေး တက်ရောက်ဖို့ ဝါရှင်တန်ဒီစီ ရောက်ရှိနေတဲ့ မလေးရှား နိုင်ငံခြားရေးဝန်ကြီးဟာ RFA သတင်းဌာနခွဲတခုဖြစ်တဲ့ Benar News သတင်းဌာနနဲ့ တွေ့ဆုံစဉ် အဲဒီလိုပြောကြားခဲ့တယ်လို့ RFA က ဖော်ပြပါတယ်။
မလေးရှား နိုင်ငံအနေနဲ့ NUG အစိုးရကို သွယ်ဝိုက်ပြီးဖြစ်စေ၊ အလွတ်သဘောဖြစ်စေ အကူအညီပေးချင်သလို သူ့အနေနဲ့ NUG နိုင်ငံခြားရေးဝန်ကြီး ဒေါ်ဇင်မာအောင် ပြောမယ့်သတင်းစကားတွေ၊ အမြင်သဘောထားတွေကို နားထောင်ချင်ကြောင်း မလေးရှားနိုင်ငံခြားရေးဝန်ကြီး က ပြောပါတယ်။
မလေးရှားအစိုးရနဲ့ မလေးရှားပြည်သူတွေက မြန်မာပြည်သူတွေကို အစဉ်အမြဲ ထောက်ခံအားပေးနေတယ်ဆိုတာ ဒေါ်ဇင်မာအောင်ကို ပြောပြချင်တယ်လို့လည်း သူကပြောပါတယ်။
မလေးရှား နိုင်ငံခြားရေးဝန်ကြီးဟာ NUG အပါအဝင် မြန်မာ့နိုင်ငံရေး သက်ဆိုင်သူအားလုံးနဲ့ ထိတွေ့ဆက်ဆံကြဖို့ အာဆီယံနိုင်ငံတွေကို တိုက်တွန်းထားပါတယ်။
