“စာအုပ်မှာကိုမှ ရောင်းရန်မဟုတ်ပါလို့ ပါနေတာကြီးကို ပြန်ကြားရေးက သုံးထောင်နဲ့ ရောင်းတဲ့ပွဲကို စာဖတ်ရှိန်မြှင့်တင်ရေးလို့ ဆိုထားတာက ရယ်စရာကြီးဖြစ်တာပေါ့ဗျာ ”
၂၇၊ နိုဝင်ဘာလ။
မြောင်းမြမှာပြုလုပ်တဲ့ စာကြည့်တိုက်များ ဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ပွဲမှာ UNICEF က အခမဲ့ဖြန့်ဝေထားတဲ့ စာအုပ်တွေကို တအုပ်ကို ငွေကျပ် သုံးထောင်ကျပ်နဲ့ ပြန်ကြားရေး နှင့် ပြည်သူ့ဆက်ဆံရေး ဦးစီးဌာနက ရောင်းချမှုပြုလုပ်ခဲ့ပါတယ်။
ဧရာဝတီတိုင်း၊ မြောင်းမြမြို့မှာ စာကြည့်တိုက်များ ဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ပွဲကို မနေ့က နိုဝင်ဘာ ၂၆ ရက်နဲ့ ဒီကနေ့ နိုဝင်ဘာ ၂၇ ရက်နေ့တွေမှာ မြောင်းမြမြို့ အ.ထ.က (၁)ကျောင်း ခန်းမမှာ ပြုလုပ်ခဲ့တာ ဖြစ်ပါတယ်။
“စာဖတ်ရှိန်မြှင့်တင်ရေးပွဲတော်မှာ စာအုပ်ပြခန်းတခန်းနဲ့ စာအုပ်အရောင်းဆိုင် တဆိုင်ဘဲရှိတယ်။ အဲ့မှာ ကလေးတွေဖတ်နိုင်တဲ့ စာအုပ်တအုပ် တထောင်နဲ့ရောင်းတယ် ။ Unicef ကအခမဲ့ ရောင်းရန်မဟုတ်တဲ့ စာအုပ်တွေလည်း တအုပ်ကို သုံးထောင်နဲ့ ရောင်းနေတာတွေ့ရတယ် ” လို့ ပွဲမှာတာဝန်ကျတဲ့ အ.ထ.က (၁)က ကျောင်းဆရာတဦးက DNA ကိုပြောပါတယ်။
ဒီစာကြည့်တိုက်များ ဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ပွဲဟာ မြောင်းမြမြို့မှာ တတိယအကြိမ် ပြုလုပ်တာဖြစ်ပြီး ဧရာဝတီတိုင်းအတွင်းက ၂၆ မြို့နယ်စလုံးမှာ ကျင်းပသွားဖို့ရှိတယ်လို့ ဧရာဝတီတိုင်း ဝန်ကြီးချုပ် ဦးတင်မောင်ဝင်းက ပွဲအခမ်းအနားမှာ ပြောသွားခဲ့ပါတယ်။
သူက ဒီလိုပွဲပြုလုပ်ရခြင်းနဲ့ ပတ်သက်ပြီး “ ကျောင်းသားကျောင်းသူများအနေဖြင့် ကျောင်းစာအပြင် ပြင်ပဗဟုသုတ ရရှိမည့်စာပေများ ဖတ်ရှုလေ့လာနိုင်စေရန်နှင့် ဗလငါးတန်နှင့် ပြည့်စုံသောလူငယ်လူရွယ်များ ပေါ်ထွန်းလာစေရန် ရည်ရွယ်၍ စာကြည့်တိုက်များ ဖွံ့ဖြိုးတိုးတက် ရေးနှင့် စာဖတ်ရှိန်မြှင့်တင်ရေးပွဲတော်ကို ကျင်းပခြင်းဖြစ်ကြောင်း ” ပြောခဲ့တယ်လို့ ဧရာဝတီတိုင်း အစိုးရအဖွဲ့က ထုတ်ပြန်ထားပါတယ်။
ကျောင်းသူ/ကျောင်းသားတွေနဲ့ ကျောင်းသားမိဘတွေကတော့ စာဖတ်ရှိန်မြှင့်တင်ဖို့ဆိုတဲ့ ရည်ရွယ်ချက်နဲ့ ပြုလုပ်တဲ့ အခမ်းအနားမှာ ရောင်းချရန် မဟုတ်ဆိုတဲ့ စာသားတွေပါဝင်တဲ့ UNICEF ရဲ့ အခမဲ့ ဖြန့်ဝေတဲ့ စာအုပ်တွေကို အခကြေးငွေနဲ့ ရောင်းချနေတဲ့ အပေါ် ထောက်ပြဝေဖန်မှုတွေ ရှိနေပါတယ်။
“စာအုပ်မှာကိုမှ ရောင်းရန်မဟုတ်ပါလို့ ပါနေတာကြီးကို ပြန်ကြားရေးက သုံးထောင်နဲ့ ရောင်းတဲ့ပွဲကို စာဖတ်ရှိန်မြှင့်တင်ရေးလို့ ဆိုထားတာက ရယ်စရာကြီးဖြစ်တာပေါ့ဗျာ ” လို့ ကျောင်းသားမိဘ တဦးဖြစ်သူ ဦးကျော်ဝင်းက ဆိုပါတယ်။
ဒီပွဲမှာ ကိုယ်ပိုင်အထက်တန်းကျောင်းတွေရဲ့ ပြခန်းအပါအဝင် ပြခန်းပေါင်း ၁၆ ခန်းပါဝင်ပြီး စာအုပ်ပြခန်းနဲ့ အရောင်းဆိုင်ကတော့ ၁ ခန်းသာ ပါဝင်တယ်လို့ ဧရာဝတီတိုင်း အစိုးရအဖွဲ့က ထုတ်ပြန်ထားမှုမှာ တွေ့ရပါတယ်။
အဲဒီပွဲမှာ မြောင်းမြမြို့ ဂုဏ်ဆောင် လူပုဂ္ဂိုလ်တွေ ပြခန်းအတွင်း ဒီးဒုတ်ဦးဘချို၊ မေဝင်းမောင်၊ မောင်းမြဒေါ်ချို အပါအဝင် လူပုဂ္ဂိုလ် အချို့ကို ပြသထားပေမယ့် ဗိုလ်ချုပ်အောင်ဆန်းရဲ့ ဇနီးဖြစ်သူ အငြိမ်းစားသံ အမတ်ကြီး ဒေါ်ခင်ကြည်နဲ့ ဂန္ဓဝင်အဆိုတော်ကြီး ဒေါ်မာမာအေး တို့ကို ထည့်သွင်းဖော်ပြခြင်း မရှိဘူးလို့ တာဝန်ကျ ဆရာက ပြောပါတယ်။