အဆိုပါ ကြေညာချက် ထွက်လာပြီး သိပ်မကြာခင်မှာပဲ”ကျွန်တော် ရာထူးကနေ ဖယ်ရှားခံလိုက်ရပြီ”လို့ သမ္မတ Embalo က France 24 ရုပ်သံကို ပြောခဲ့ပါတယ်။
၂၇၊ နိုဝင်ဘာ။
အာဏာသိမ်းမှု မကြာခဏဖြစ်လေ့ရှိတဲ့ ဂီနီ-ဘစ်ဆော နိုင်ငံမှာ သမ္မတ ရွေးကောက်ပွဲရလဒ်တွေ ကြေညာဖို့ စီစဉ်ထားတဲ့ ရက်မတိုင်မီ တရက်အလို နိုဝင်ဘာလ ၂၆ရက်နေ့မှာ စစ်တပ်အရာရှိအုပ်စုတစုက အာဏာသိမ်းယူလိုက်ပြီလို့ ကြေညာခဲ့ပါတယ္။
ပြောရေးဆိုခွင့်ရှိသူ Diniz N’Tchama က နိုင်ငံပိုင်ရုပ်သံကတဆင့် ပြောတဲ့ ထုတ်ပြန်ချက်မှာ သမ္မတ Umaro Sissoco Embalo ကို ဖယ်ရှားလိုက်ပြီး ရွေးကောက်ပွဲလုပ်ငန်းစဉ်ကို ဆိုင်းငံ့လိုက်ကြောင်းနဲ့ နယ်စပ်တွေကိုလည်း ပိတ်လိုက်တဲ့ အပြင် ပိတ်ထားပြီး ညမထွက်ရအမိန့် ထုတ်ပြန်သွားမှာဖြစ်တယ်လို့ ဆိုပါတယ်။
အဆိုပါ ကြေညာချက် ထွက်လာပြီး သိပ်မကြာခင်မှာပဲ”ကျွန်တော် ရာထူးကနေ ဖယ်ရှားခံလိုက်ရပြီ”လို့ သမ္မတ Embalo က France 24 ရုပ်သံကို ပြောခဲ့ပါတယ်။
စစ်တပ်အရာရှိတွေရဲ့ ထုတ်ပြန်ချက်မှာ ” တရားဥပဒေစိုးမိုးရေး ပြန်လည်ဖော်ဆောင်မှုဆိုင်ရာ စစ်ဘက်အဆင့်မြင့် ကွပ်ကဲမှုဌာနချုပ်”ကို ဖွဲ့စည်းလိုက်ပြီး နောက်ထပ် အမိန့်တစုံတရာ မထုတ်ပြန်မီအထိ နိုင်ငံကို တာဝန်ယူ အုပ်ချုပ်သွားမယ်လို့ ဖော်ပြထားပါတယ်။
ရာထူးကနေ ဖယ်ရှားခံလိုက်ရတဲ့ သမ္မတ Embalo ကို ဖမ်းဆီးထိန်းသိမ်းထားတာ ရှိ၊ မရှိကိုတော့ အဆိုပါ အရာရှိတွေက တိတိကျကျ ပြောဆိုထားတာတော့ မရှိပါဘူး။ ဒါပေမဲ့ လုံခြုံရေးသတင်းရင်းမြစ် နှစ်ဦးကတော့ သူ့ကို ကာကွယ်ရေးဦးစီးချုပ်ရုံးမှာ ထိန်းသိမ်းထားတယ်လို့ ရိုက်တာသတင်းဌာနကို ပြောထားပါတယ်။
Embalo ရဲ့ အဓိကပြိုင်ဘက် Fernando Dias က ဗုဒ္ဓဟူးနေ့ညပိုင်းမှာ သူရဲ့ မဲဆွယ်စည်းရုံးရေး အဖွဲ့ကတဆင့် ဖြန့်ဝေခဲ့တဲ့ ဗီဒီယိုထုတ်ပြန်ချက်တစ်ခုမှာ လက်နက်ကိုင်တွေက သူ့ကို ဖမ်းဆီးဖို့ ကြိုးပမ်းခဲ့ပေမဲ့ လွတ်မြောက်ခဲ့ပြီး လုံခြုံတဲ့ နေရာတစ်ခုမှာ ရောက်ရှိနေပြီလို့ သိရပါတယ်။
“စစ်တပ်က အခုလုပ်နေတဲ့ အာဏာသိမ်းပါတယ်ဆိုတာက တကယ့်အစစ်အမှန် မဟုတ်ပါဘူး။ ကျွန်တော် ရွေးကောက်ပွဲနိုင်သွားလို့ အာဏာမလွှဲချင်တာနဲ့ သက်သက်မဲ့ လုပ်ကြံဖန်တီးထားတဲ့ လုပ်ဇာတ် တစ်ခုသာ ဖြစ်ပါတယ်”လို့ Dias က ပြောပါတယ်။
အာဖရိကသမဂ္ဂ (AU) နဲ့ အနောက်အာဖရိကဒေသတွင်းအဖွဲ့အစည်း (ECOWAS) တို့က ဗုဒ္ဓဟူးနေ့ညက ပူးတွဲကြေညာချက် ထုတ်ပြန်ကာ အာဏာသိမ်းကြောင်း ကြေညာမှုအပေါ် “အလွန်အမင်း စိုးရိမ်ပူပန်မိကြောင်း” ဖော်ပြခဲ့ပြီး ရွေးကောက်ပွဲလုပ်ငန်းစဉ်မှာ ပါဝင်တဲ့ တာဝန်ရှိသူတွေလည်း ဖမ်းဆီးခံထားရတဲ့အတွက် သူတို့ကို ချက်ချင်းပြန်လွှတ်ပေးဖို့ တောင်းဆိုထားပါတယ်။
Ref – Reuters