ဧရာဝတီတိုင်း ၊ အင်္ဂပူမြို့နယ် ၊ ကုန်းပြင်ကျေးရွာအုပ်စုထဲကို လွန်ခဲ့တဲ့တပတ်က စတင်ပြီး စစ်တပ်က ဝင်ရောက်အခြေချ တပ်စွဲတာ ၊ ကင်းပုန်းချထားတာ စတဲ့နယ်မြေစိုးမိုးမှုယူတာတွေ လုပ်ဆောင်နေပါတယ်။
၄၊ဩဂုတ်လ။
ကုန်းပြင်ကျေးရွာ အုပ်စုထဲက ကုန်းပြင်ရွာ ၊ အုန်းပင်ချောင်ရွာ ၊ ကျီးပင်ရွာ ၊ ထုံးဘိုရွာနဲ့ ကျောက်ထပ်ရွာတွေမှာ လှုပ်ရှားသွားလာနေတာလို့ ဒေသခံတဦးက DNA ကိုပြောပါတယ်။
“အင်အားကိုတော့ မခန့်မှန်းတတ်ဘူး”လို့ ဆိုပါတယ်။
တောင်မြန်အောင်တိုးချဲ့သစ်တောကြိုးဝိုင်းနဲ့ ကပ်လျပ်မှာရှိတဲ့ ကုန်းပြင်ကျေးရွာထဲက ဒေသခံတွေဟာ စစ်သားတွေအတွက် စားနှပ်ရိက္ခာကို ထောက်ပံ့ပေးရတယ်လို့ ဒေသခံတဦးကပြောပါတယ်။
“အုပ်ချုပ်ရေးမှူးတွေက ရိက္ခာအတွက် တအိမ်ကို သုံးထောင်ကောက်တယ်”လို့ဆိုပါတယ်။
အင်္ဂပူမြို့နယ်ရဲ့ အနောက်ဘက်ဆုံးက ကျေးရွာအုပ်စုဖြစ်တဲ့အပြင် ရခိုင်ရိုးမနဲ့လည်းစပ်ဆက်နေတဲ့ ကုန်းပြင်ကျေးရွာအုပ်စုမှာ ဒေသတွင်းအတွက် ရိက္ခာသယ်ယူ စုဆောင်းခွင့်ကိုလည်း ကန့်သက်ခံထားရ ပါတယ်။ စစ်တပ်အတွက် ရိက္ခာထောက်ပံ့ပေးနေရတဲ့ ဒေသခံတွေဟာ သူတို့အတွက် ရိက္ခာ သယ်ဆောင်တဲ့အခါမှာတော့ အိမ်ထောင်စု တခုအတွက် ၅ ရက်စာကိုသာ သယ်ဆောင်ခွင့်ရှိပါတယ်။
“ကွင်းကောက်ဘက်ကို ဈေးတက်ဝယ်ရင် အများကြီး ဝယ်ယူစုဆောင်းထားတာကို စစ်တပ်ကခွင့်မပြု ဘူး” လို့ ဒေသခံတဦးကပြောပါတယ်။
အင်္ဂပူမြို့နယ်ထဲမှာတော့ ပိန္နဲကွင်းကျေးရွာအုပ်စုထဲက ကျေးရွာအများစုဟာ နေအိမ်တွေကို စွန့်ခွာပြီး စစ်ဘေးရှောင်နေကြရတာပါ။ စစ်ဘေးရှောင်နေရတဲ့ ကျေးရွာတွေမှာဆိုရင် နေအိမ်က ပစ္စည်းတွေ ပျောက်ဆုံးတာ ကျွဲ ၊ နွား အပါအဝင် အိမ်မွေးတိရိစ္ဆာန်တွေ ပျောက်ဆုံးတာတွေ ရှိနေတယ်လို့ ဒေသခံတွေကပြောပါတယ်။ အင်္ဂပူမြို့နယ်ထဲ မှာဆိုရင် တိုက်ပွဲတွေက ပိန္နဲကွင်းကျေးရွာအုပ်စုထဲမှာ အများဆုံးဖြစ်ပွားခဲ့တာလို့ သိရပါတယ်။