မတ်၊ ၂၂
ဧရာဝတီတိုင်းထဲမှာ မတ်လ ၂၁ ရက်၊ မနေ့ကအထိ နှစ်ဖက်တိုက်ပွဲတွေ ဆက်ရှိနေပြီး တိုက်ပွဲတွေအတွင်း စစ်ကောင်စီဘက်က လေကြောင်းတိုက်ခိုက်မှုတွေကို ဆက်တိုက် အသုံးပြုနေတယ်လို့ သိရပါတယ်။
“စက်စက်ယို၊ စမ်းကုန်းရွာဘက် ဟိုးရက်ကတိုက်ပွဲမှာသေတဲ့ အရာရှိတွေကို မနေ့ကပြန်လာကောက်တာ PDF တွေနဲ့ ထပ်တွေ့လို့ အသေများပြီး မိန်းလမ်းပေါ်ပြန်ပြေးသွားကြတယ်၊ နောက်တော့ လေယာဥ်နဲ့ လာကြဲတယ်” လို့ ဒေသခံတဦးက DNA ကို ပြောပါတယ်။ ပုသိမ်-မုံရွာ ကားလမ်းနဲ့ ရခိုင်ရိုးမကြားမှာရှိတဲ့ လဲခုံလေး၊ လဲခုံကြီး၊ စမ်းကုန်း၊ ကျားခေါင်း၊ တုံးတော၊ ဝတ်ကုန်း စတဲ့ ကျေးရွာတဝိုက် အာရက္ခတပ်တော်(AA) ပူးပေါင်းတပ်တွေနဲ့ စစ်ကောင်စီတပ်ကြား မတ်လ ၁၉ ရက်နေ့လောက်ကတည်းက တိုက်ပွဲတွေ ပြင်းထန်နေပြီး အဲဒီတဝိုက်က ဒေသခံထောင်ချီလည်း တိမ်းရှောင်နေကြရတယ်လို့ သိရပါတယ်။
ပြီးခဲ့တဲ့ မတ်လ ၁၉ ရက်ညမှာတော့ တုံးတောကျေးရွာထဲကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်လို့ နေအိမ်တချို့ မီးလောင်ပျက်စီးသွားတယ်လို့ ဒေသတွင်း လူမှုကွန်ရက်စာမျက်နှာ တခုမှာ ဖေါ်ပြထားပါတယ်။ အလားတူပဲ မတ်လ ၂၁ ရက်၊ မနေ့ မနက်ပိုင်းကလည်း ပုသိမ်-မုံရွာ ကားလမ်းပေါ်က စောပြာရွာနဲ့ အနီးတဝိုက်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့သေးတယ်လို့ သိရပါတယ်။
လက်ရှိမှာတော့ တိုက်ပွဲဖြစ်ပွားနေတဲ့ အဲဒီကျေးရွာတွေအနီးတဝိုက်ကို စစ်ကောင်စီက အင်အားရာချီဖြည့်တင်းထားပြီး ဒီကနေ့ တိုက်ပွဲဖြစ်ပွားမှုအခြေအနေကိုတော့ မသိရသေးပါဘူး။ အလားတူပဲ ပြီးခဲ့တဲ့ မတ်လ ၁၇ ရက်ကလည်း ပုသိမ်-မုံရွာ ကားလမ်းရဲ့ အနောက်ဘက် တမိုင်ကျော်လောက်မှာရှိတဲ့ ချင်းလယ်ရွာမှာ AA ပူးပေါင်းတပ်တွေနဲ့ စစ်ကောင်စီတပ်ကြား တိုက်ပွဲပြင်းထန်ခဲ့တယ်လို့ သိရပါတယ်။
အဲဒီနောက်မှာတော့ စစ်ကောင်စီတပ်က ချင်းလယ်ရွာဘက်ကို အင်အားထပ်မံဖြည့်တင်းထားတယ်လို့လည်း ဆိုပါတယ်။ ဒါ့အပြင် အခုလို တိုက်ပွဲတွေပြင်းထန်နေတဲ့ နေရာတွေနဲ့ အနီးဝန်းကျင်မှာရှိတဲ့ ဂွ-ငါးသိုင်းချောင်းကားလမ်းပေါ်က အမြောက်တပ်ရင်း(အမတ) ၃၄၄ ကိုလည်း စစ်ကောင်စီတပ်က အင်အားဖြည့်တင်းထားပြီး အဲဒီကနေတဆင့် တိုက်ပွဲတွေရှိရာဆီ စစ်ကူစေလွှတ်နေတယ်လို့ သိရပါတယ်။
