Photo – စစ်ကောင်စီ (၂၀၁၈ခုနှစ်က ပြုလုပ်ခဲ့တဲ့ဆင်ဖြူရှင်စစ်ရေး လေ့ကျင့်မူ)
ဇန်နဝါရီ၊ ၁၁
အာရက္ခတပ်တော်(AA) ပူးပေါင်းတပ်တွေနဲ့ စစ်ကောင်စီတပ်ကြား တိုက်ပွဲတွေရှိနေတဲ့ ဧရာဝတီတိုင်း၊ ပုသိမ်မြို့နယ်၊ ဘောမိကျေးရွာဘက်ကို စစ်ကောင်စီတပ်က အင်အားအလုံးအရင်းထပ်ဖြည့်နေတယ်လို့ ဒေသခံတွေဆီကနေ သိရပါတယ်။
“ဟိုနေ့က ဆယ့်သုံးစီး အမြောက်တွေပါသွားတယ်တဲ့၊ တချို့ကလည်း ဝက်သေမှာ စခန်းချတယ်ပြောတယ်၊ ထပ်မေးကြည့်တော့ စစ်ဖြစ်နေတဲ့ နေရာကို ဇက်ကြီးနဲ့ ကူးသွားတာတဲ့” လို့ ရွှေသောင်ယံ မြို့ခံတဦးက ပြောပါတယ်။
ပုသိမ်ဘက်ကနေ စစ်ကား တဆယ့်သုံးစီးနဲ့ ရွှေသောင်ယံမြို့ကို ရောက်လာတဲ့ အင်အား တရာကျော်ပါ စစ်ကောင်စီတပ်ဖွဲ့ဝင်တွေက ဇန်နဝါရီ ၉ ရက်နေ့မှာ ရွှေသောင်ယံမြို့နဲ့ သုံးမိုင်ခန့်အကွာ ဝက်သေရွာကနေတဆင့် ဘောမိဘက်ကို ရေလမ်းကနေ ထွက်သွားတာလို့ သိရပါတယ်။
ဒါ့အပြင် စစ်ကောင်စီ ရေတပ်ကနေလည်း မကျီးဇင်၊ ဂျိုင်လယ်ရွာတွေဘက်ကို လက်နက်ကြီးတွေနဲ့ ပစ်ခတ်တာတွေ ရှိနေတယ်လို့သိရပါတယ်။
ရခိုင်ပြည်နယ်၊ ဂွမြို့နယ်နဲ့ ဧရာဝတီတိုင်း၊ ပုသိမ်မြို့နယ်အစပ်မှာရှိတဲ့ ပုသိမ်မြို့နယ်ထဲက ချောင်းဝချိုင်၊ ပေါက်လှချိုင်၊ ကုလားချောင်း၊ ပေါက်တူးကွင်း၊ မကျီးဇင် စတဲ့ကျေးရွာတွေဘက်မှာ ရှေ့ရက်တွေကတည်းက နှစ်ဖက်တိုက်ပွဲတွေရှိနေခဲ့ပြီး ဇန်နဝါရီ ၁၀ ရက်၊ မနေ့ကတော့ မကျီးဇင်ရဲစခန်းကို AA ပူးပေါင်းတပ်တွေက သိမ်းပိုက်လိုက်နိုင်တယ်လို့ သတင်းထွက်ခဲ့ပါတယ်။အဲဒီနောက်မှာတော့ မကျီးဇင်ဘက်ကနေ ဆုတ်လာတဲ့ စစ်ကောင်စီတပ်တွေက မကျီးဇင်ရွာနဲ့ နှစ်မိုင်ကျော်အကွာ ဘောဓိရွာတဝိုက်မှာ ရှိနေပြီး စစ်ကောင်စီတပ်ဘက်ကလည်း စစ်ကူပို့ပေးနေတယ်လို့ သိရပါတယ်။
မနေ့က မကျီးဇင်ဘက်တိုက်ပွဲအတွင်းမှာတော့ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံတချို့ ထိခိုက်သေဆုံးမှုတွေရှိခဲ့တယ်လို့လည်း ဆိုကြပေမယ့် ထိခိုက်သေဆုံးမှုအခြေအနေကိုတော့ DNA အနေနဲ့ အသေးစိတ် အတည်မပြုနိုင်သေးပါဘူး။
ရွှေသောင်ယံမြို့နဲ့အနီးတဝိုက်မှာတော့ တိုက်ပွဲတွေမရှိသေးပေမယ့် လက်နက်ကြီးပစ်ခတ်သံတွေ မကြာခဏကြားနေရသလို လေယာဥ်ပျံဝဲတာတွေလည်း ရှိနေလို့ မြို့ခံတချို့ ကြိုတင်တိမ်းရှောင်နေကြပြီလို့လည်း ဆိုပါတယ်။
“ရှောင်နေကြတဲ့လူတွေအများစုကတော့ ပုသိမ်ဖက်ကိုရှောင်တာများပါတယ်၊ မနေ့ကပဲစပြီး ရှောင်နေကြပါတယ်၊ ဒီနေ့လဲထွက်နေကြတယ်” လို့လည်း ရွှေသောင်ယံမှာပဲ ရှိနေသေးတဲ့ အထက်ပါ မြို့ခံက ပြောပါတယ်။
ရွှေသောင်ယံမြို့နဲ့ မကျီးဇင်ရွာကတော့ မြေပုံပေါ် အဖြောင့်တိုင်းရင် မိုင်နှစ်ဆယ်လောက်သာကွာဝေးပြီး ကုန်းလမ်း၊ ရေလမ်း နှစ်ခုစလုံးအသုံးပြုပြီး သွားလာကြရတာပါ။
ဝက်သေရွာကနေတဆင့် ရေလမ်းကနေ စစ်ကူသွားတဲ့ စစ်ကောင်စီတပ်ဖွဲ့ဝင်တွေ ဘယ်ကို ရောက်နေပြီလဲဆိုတာကိုတော့ အတိအကျ မသိရသေးပါဘူး။
ဒါ့အပြင် စစ်ကောင်စီ ရေတပ်ကနေလည်း ရွှေသောင်ယံမြို့နဲ့ မကျီးဇင်ကြားမှာရှိတဲ့ တောင်နီမော်၊ ဂျိတ်လက်၊ ခြောက်အိမ်စု စတဲ့ရွာတွေဘက်ကို လက်နက်ကြီးတွေနဲ့ ပစ်ခတ်တာတွေ ရှိနေတယ်လို့သိရပါတယ်။
“(မနေ့)သောကြာက ပစ်တယ်၊ သူတို့က AA မြင်တာလဲ မဟုတ်ဘဲ ပစ်နေတော့ ပြည်သူတွေက ပြေးရတာပေါ့၊ AA က ဘယ်နေရာမှာမှန်းတောင် ဒေသခံတွေက မသိဘူး၊ ရမ်းသမ်းပြီးပစ်နေတာ သူတို့က” လို့လည်း အဲဒီကျေးရွာတွေတဝိုက်က ဒေသခံတွေနဲ့ အဆက်အသွယ်ရှိသူတဦးက ပြောပါတယ်။
ရွှေသောင်ယံမြို့ဟာ စစ်ကောင်စီရဲ့ အနောက်တောင်တိုင်းစစ်ဌာနချုပ်(နတခ) ရှိရာ ပုသိမ်မြို့နဲ့ မိုင်လေးဆယ်လောက်သာဝေးပြီး ချောင်းသာကမ်းခြေနဲ့ဆိုရင် ဆယ်မိုင်ဝန်းကျင်လောက်သာ ဝေးတော့တာပါ။
စစ်ကောင်စီတပ်က အခုလို စစ်ရေးလှုပ်ရှားမှုတွေလုပ်နေတဲ့ ဝက်သေကျေးရွာမှာတော့ ပြီးခဲ့တဲ့ ၂၀၁၈ ခုနှစ်၊ ဖေဖော်ဝါရီမှာ မြန်မာစစ်တပ်က အင်အား ရှစ်ထောင်ကျော်ပါ ကြည်း၊ ရေ၊ လေ တပ်ပေါင်းစုံ ပူးတွဲပြီး ဆင်ဖြူရှင် စစ်ရေးလေ့ကျင်မှု ပြုလုပ်ခဲ့ပါသေးတယ်။
အာရက္ခတပ်တော်(AA)က ရခိုင်ပြည်နယ်ရဲ့ တောင်ဘက်အစွန်ဆုံးဖြစ်တဲ့ ဂွမြို့နယ်ကို အလုံးစုံသိမ်းပိုက်ပြီးနောက် သူနဲ့ ထိစပ်နေတဲ့ ဧရာဝတီတိုင်းထဲက ဒေသတချို့ကိုပါ ဝင်ရောက်တိုက်ခိုက်တာတွေ ရှိလာနေတာဖြစ်ပါတယ်။
ဒါ့အပြင် ရခိုင်-ဧရာဝတီအစပ် ဂွ-ငါးသိုင်းချောင်း လမ်းပေါ်က စစ်ကောင်စီတပ်ရဲ့ ဗောဓိစစ်ဆေးရေးဂိတ်ကိုလည်း AA ပူးပေါင်းတပ်တွေက တိုက်ခိုက်သိမ်းပိုက်ထားပြီးဖြစ်လို့ ငါးသိုင်းချောင်း၊ ရေကြည် မြို့တွေဘက်မှာပါ စစ်ကောင်စီတပ်က လုံခြုံရေးတင်းကြပ်တာတွေ လုပ်ဆောင်လာနေပါတယ်။
