ဇွန် ၊ ၈
ဒိန်းမတ်ဝန်ကြီးချုပ်ကို ရိုက်နှက် ရန်ပြုခဲ့တဲ့ အမျိုးသား တဦးကို ဖမ်းဆီးထားကြောင်း ဒိန်းမတ် ရဲတပ်ဖွဲ့က အတည်ပြု ပြောကြားခဲ့ပါတယ်။
ဇွန်လ ၇ ရက်နေ့က ကိုပင်ဟေဂင် မြို့တော်ထဲမှာ လမ်းတခုမှာ အမျိုးသမီး ဝန်ကြီးချုပ် မက်တေ ဖရက်ဒရစ်ဆန်ကို လူတဦးက ကိုယ်ထိလက်ရောက် ရန်ပြုခဲ့တာ ဖြစ်ပါတယ်။ ဝန်ကြီးချုပ်ဟာ ဒဏ်ရာ ကြီးကြီးမားမား ရမသွားခဲ့ပေမယ့် အတော်ကြီး တုန်လှုပ်သွားခဲ့တယ်လို့ ရဲတွေက ပြောပါတယ်။
ရန်ပြုသူ အမျိုးသားကို နေရာမှာပဲ ဖမ်းဆီးရမိခဲ့ပြီး ဘာကြောင့် အခုလုပ်ရပ်ကို ကျူးလွန်သလဲဆိုတာ ဆက်လက် စစ်ဆေးနေပါတယ်။
ဒိန်းမတ်လို အေးချမ်းပြီး နိုင်ငံရေး အခြေခံ အကြမ်းဖက် ရန်လိုမှုတွေ အရမ်းရှားပါးတဲ့ နိုင်ငံမှာ အခုကိစ္စဟာ အံ့ဩစရာ အခြေအနေ တခု ဖြစ်လာပါတယ်။
ဝန်ကြီးချုပ်ရုံးက ဖရက်ဒရစ်ဆန် တိုက်ခိုက်ခံရမှုကြောင့် အထိတ်တလန့် ဖြစ်ခဲ့တာကို အတည်ပြု ကြေညာပေမယ့် ဒဏ်ရာရခဲ့သလား ဆိုတာကိုတော့ ချက်ချင်း မထုတ်ပြန်သေးပါဘူး။ ရန်ပြု တိုက်ခိုက်မှုရဲ့ နောက်ကွယ်က အကြောင်းရင်းကိုလည်း လောလောဆယ် မသိရသေးပါဘူး။
ဥရောပ သမဂ္ဂ ရွေးကောက်ပွဲတွေအတွက် ဒိန်းမတ်က မဲပေးဖို့ ၂ ရက်အလိုမှာ အခုလို တိုက်ခိုက်မှုမျိုး ဖြစ်ပေါ်ခဲ့တာပါ။ ဒီအခြေအနေကြောင့် ဝန်ကြီးချုပ်ရဲ့ လုံခြုံရေး အစီအမံတွေကို ပြန်လည် သုံးသပ်ဖို့လည်း တာဝန်ရှိသူတွေက စဉ်းစားနေပါတယ်။
ဆိုရှယ် ဒီမိုကရက်ပါတီ ခေါင်းဆောင် ဖရက်ဒရစ်ဆန်ဟာ ၂၀၁၉ ခုနှစ်မှာ ဝန်ကြီးချုပ် ဖြစ်လာခဲ့ပြီး နိုင်ငံသမိုင်းမှာ အသက်အငယ်ဆုံး ရွေးကောက်ခံ ခေါင်းဆောင် အနေနဲ့လည်း မှတ်တမ်းဝင်ခဲ့ပါတယ်။
Ref: BBC
