ဇွန်၊ ၆
စစ်ကိုင်းတိုင်း၊ ရွှေဘိုခရိုင်ထဲမှာရှိတဲ့ ခင်ဦးမြိုနယ်၊ ကံသစ်ကျေးရွာ ကို စစ်ကောင်စီတပ်သားတွေက ပြီးခဲ့တဲ့ဇွန်လ ၁ ရက်နေ့စကပြီး စစ်ကြောင်းထိုးဝင်ရောက်ကာ လေးကြိမ်မြောက် မီးရှို့ဖျက်ဆီးသွားတယ်လို့ ခင်ဦးသတင်းမှန်ပြန်ကြားရေးက ထုတ်ပြန်ထားပါတယ်။
ကံသစ်ကျေးရွာဟာဆိုရင် ၂၀၂၂ ဇွန်လ၊ နိုဝင်ဘာလနဲ့ မေလတို့မှာ စစ်ကောင်စီတပ်သားတွေ စစ်ကြောင်းထိုး ဝင်ရောက်မီးရှို့ခဲ့တာ ခံထားရပြီး အခု စတုထ္ထအကြိမ် ဝင်ရောက်မီးရှို့ရာမှာတော့ နေအိမ်ပေါင်း ၃၂၈ အိမ် မီးလောင်ပျက်စီးခဲ့တယ်လို့ ဓါတ်ပုံမှတ်တမ်းနဲ့တကွ သတင်းထုတ်ပြန်ထားပါတယ်။
လက်ရှိအချိန်မှာတော့ နေအိမ်ပေါင်း ၆၀၀ ဝန်းကျင်ရှိတဲ့ ကံသစ်ကျေးရွာဟာ နေအိမ်တဝက်ကျော်မီးလောင်ပျက်စီးသွားပြီဖြစ်ပြီး ဒေသခံတွေဟာလည်း အခက်အခဲတွေနဲ့ ရင်ဆိုင်နေကြရတယ်လို့ ဒေသခံတွေက ပြောပါတယ်။
” စစ်ကြောင်းထိုးတဲ့ ကာလမှာ သက်ကြီးရွယ်အိုတွေလည်း မိုးထဲလေထဲမှာ ပြေးရရင်း ဆုံးပါးတာတွေရှိတယ်။ ဘာလို့စစ်ကြောင်းထိုးနေလဲတော့ မသိဘူး။ တချို့ရွာတွေဆို အကြိမ်ကြိမ်မီးရှို့ခံရတာ။ ကံသစ်ရွာဆို လေးကြိမ်မြောက်ရှိနေပြီ။ မိုခါကြောင့် စပါးတွေ နှမ်းတွေလည်း ပျက်စီးပြီး ခက်ခဲနေချိန်မှာ အကြိမ်ကြိမ်စစ်ကြောင်းဝင် မီးရှို့တာခံနေရတာ ” လို့ ခင်ဦးဒေသခံတဦးက ပြောပါတယ်။
စစ်အာဏာသိမ်းပြီးချိန်ကစပြီး ခင်ဦးမြို့နယ်ထဲမှာ ကျေးရွာပေါင်း ၇၄ ရွာက နေအိမ်ပေါင်း ၆၀၀၀ ကျော် မီးရှို့ဖျက်ဆီးခံထားရပြီး မီးဘေးသင့် စစ်ရှောင်သုံးသောင်းကျော်ဟာ အကူအညီတွေ လိုအပ်နေတယ်လို့လည်း ခင်ဦးသတင်းမှန်ပြန်ကြားရေးက သတင်းထုတ်ပြန်ထားပါတယ်။
ဓာတ်ပုံ – ခင်ဦးမြို့နယ် သတင်းမှန်ပြန်ကြားရေး
