ဆောင်းရာသီ စျေးကွက် မပိတ်သေးခင် ပြောင်းရွှေ့ကြေး စံချိန်သစ် တင်ခဲ့တဲ့ ပရီးမီးယားလိဂ်

ဆောင်းရာသီ အပြောင်းအရွှေ့ စျေးကွက် မပိတ်သိမ်းသေးပေမယ့် အခုကာလမှာ အင်္ဂလန် ပရီးမီးယားလိဂ် အသင်းတွေရဲ့ စုစုပေါင်း ပြောင်းရွှေ့ကြေး အသုံးစရိတ်က စံချိန်သစ် တင်သွားခဲ့ပြီ ဖြစ်ပါတယ်။ ဒါတောင် နောက်ထပ် ၂၄ နာရီအတွင်း ဖြစ်မြောက်လာမယ့် အပြောင်းအရွှေ့တွေ ရှိနေဆဲပါ။

 တစ်လသာ ကြာမြင့်တဲ့ ဆောင်းရာသီ အပြောင်းအရွှေ့ ကာလမှာ ပရီးမီးယားလိဂ် အသင်းတွေဟာ ပြောင်းရွှေ့ကြေး စတာလင်ပေါင် သန်း ၅၅၀ လောက် သုံးစွဲပြီးပြီလို့ ဘဏ္ဍာရေး မှတ်တမ်းတွေအရ သိရပါတယ်။ ဒါကြောင့် ၂၀၁၈ ဆောင်းရာသီ စျေးကွက်ရဲ့ အသုံးစရိတ် စတာလင်ပေါင် သန်း ၄၃၀ ကို သက်တောင့်သက်သာ ကျော်တက်သွားခဲ့ပါတယ်။

 လက်ရှိ အပြောင်းအရွှေ့ စျေးကွက်မှာ ငွေသုံး အကြမ်းဆုံးကတော့ ချဲလ်ဆီး အသင်းဖြစ်ပြီး ကစားသမားအသစ် ၇ ယောက်အတွက် စုစုပေါင်း ပြောင်းရွှေ့ကြေး စတာလင်ပေါင် သန်း ၂၀၀ ကျော် သုံးစွဲထားပြီး ဖြစ်ပါတယ်။ နောက်ပြီး ဘင်ဖီကာ ကွင်းလယ်လူ အန်ဇို ဖာနန်ဒက်ဇ်ကို ခေါ်ယူဖို့လည်း စတာလင်ပေါင် ၁၀၅ သန်းနဲ့ ထပ်မံ ကမ်းလှမ်းထားပြီး အပြောင်းအရွှေ့ အထမြောက် မမြောက် ဆိုတာက စျေးကွက်ပိတ်ရက်ဖြစ်တဲ့ ဇန်နဝါရီ ၃၁ ရက်မှာ အဖြေပေါ်လာမှာပါ။

 အမှတ်ပေးဇယား ဦးဆောင်သူ အာဆင်နယ်ကလည်း ဘရိုက်တန် ကွင်းလယ်လူ မွိုက်စ် ကိုင်စီဒိုကို စတာလင်ပေါင် သန်း ၇၀ နဲ့ ကမ်းလှမ်းပေမယ့် ပယ်ချခံထားရပါတယ်။ အဲဒီ ကမ်းလှမ်းမှု နှစ်ခု အပါအဝင် စျေးကွက်ပိတ်ရက်မှာ လက်တွေ့ အထမြောက်လာနိုင်တဲ့ အပြောင်းအရွှေ့ ဖြစ်နိုင်ခြေတချို့ ရှိနေဆဲပါ။

 အင်္ဂလန် ဘောလုံးကလပ်တွေဟာ အခုရာသီ နွေရာသီနဲ့ ဆောင်းရာသီ အပြောင်းအရွှေ့ ကာလနှစ်ခုမှာ ပြောင်းရွှေ့ကြေး စတာလင်ပေါင် ၂.၅ ဘီလီယံ နီးပါးလောက်ထိ သုံးစွဲပြီးကြပါပြီ။

 လက်ရှိ အပြောင်းအရွှေ့ ကာလအတွင်း ချဲလ်ဆီးက စတာလင်ပေါင် သန်း ၉၀ တန် မစ်ခိုင်လို မူဒရစ်ကို စာချုပ် ခေါ်ယူခဲ့တာအပြင် ကစားသမားသစ် ၇ ဦးကို အားဖြည့်ခဲ့သလို အာဆင်နယ်က ဘရိုက်တန် တောင်ပံလူ လီယန်ဒရို ထရော့ဆက်ဒ်ကို ခေါ်ယူခဲ့တာ၊ အဲဗာတန် လူငယ်ခြေတက်လေး အန်သိုနီ ဂေါ်ဒွန်ကို နယူးကာဆယ်လ် ယူနိုက်တက်က ဝယ်ယူလိုက်တာ၊ ကမ္ဘာ့ဖလားမှာ ခြေစွမ်းပြခဲ့တဲ့ နယ်သာလန် တိုက်စစ်ကြယ်ပွင့် ကိုဒီ ဂက်ခ်ပိုကို လီဗာပူးလ် အသင်းက PSVဆီကနေ ခေါ်ယူခဲ့တာတွေက ပရိသတ် စိတ်ဝင်စားတဲ့ ထိပ်တန်း အပြောင်းအရွှေ့တွေ ဖြစ်ခဲ့ပါတယ်။

 ဝုလ်ဗ်လိုမျိုး အမှတ်ပေးဇယားရဲ့ အောက်ခြေနားက အသင်းတွေတောင် မက်သီးရက်စ် ကွန်ဟာ၊ ပက်ဘလို ဆာရာဘီယာ၊ မာရီယို လီမီနာနဲ့ ကရိတ်ဂျ်ဒေါ်ဆန်လို ကစားသမားသစ်တွေကို ခေါ်ယူပြီး လက်ရှိ အပြောင်းအရွှေ့ ကာလမှာ အတော် အလုပ်များခဲ့တာကို တွေ့ရပါတယ်။