မွန်ပြည်နယ်၊ ပေါင်မြို့နယ်အတွင်းက ဝန်ထမ်းတွေကို ရုံးမတက်ဘဲ နေအိမ်ကပဲ အလုပ်လုပ်ဖို့၊ မဖြစ်မနေရုံးတက်ဖို့ လိုသူတွေ အရပ်ဝတ်နဲ့ ရုံးတက်ဖို့ စစ်ကောင်စီက ညွှန်ကြားထားတယ်လို့ စစ်ကောင်စီလက်အောက်ခံ ဝန်ထမ်းအသိုင်းအဝိုင်းက စုံစမ်းသိရှိရပါတယ်။
ပေါင်မြို့နယ်အတွင်းမှာ မြို့နယ်ထွေအုပ်ရုံး၊ မြို့မရဲစခန်းနဲ့ ဇင်းကျိုက်နယ်မြေရဲစခန်း တိုက်ခိုက်ခံရတာ၊ ရဲတပ်ဖွဲ့ဝင်တချို့ ပစ်သတ်ခံရတာတွေ ဖြစ်ပြီးနောက် စစ်ကောင်စီ လက်အောက်ခံ ပြည်နယ်အကြီးအကဲတွေနဲ့ တပ်အကြီးအကဲတွေ အစည်းအဝေးပြုလုပ်ခဲ့ပြီး အခုလတတိယပတ်အတွင်း အဲ့ဒီလို ညွှန်ကြားလိုက်တာလို့ သိရပါတယ်။
“ရဲစခန်းကျတော့ သူတို့ရုံးတက်ရမယ်၊ အရပ်ဝတ်နဲ့ပေါ့၊ ကျန်တဲ့ဌာနဆိုင်ရာ ရုံးတွေကတော့ နေအိမ်ကနေ အလုပ်လုပ်ကြဖို့ဆိုပြီး ညွှန်ကြားထားတာ၊ ဒီ ဒီဇင်ဘာလ တတိယအပတ်ထဲမှာပဲ၊ အခုတလော ရဲစခန်းတို့ ဌာနဆိုင်ရာ ရုံးတွေ၊ ဝန်ထမ်းတွေ ပစ်မှတ်တိုက်ခိုက်ခံရတော့လေ၊ အဓိက ဝန်ထမ်းတွေရဲ့ လုံခြုံရေးအတွက်ဆိုပြီး သက်ဆိုင်ရာ ဌာနဆိုင်ရာ အကြီးအကဲတွေကို ဖုန်းဆက်ညွှန်ကြားထားတယ်” လို့ ပေါင်မြို့နယ်ထွေအုပ်ရုံးနဲ့ နီးစပ်သူတဦးက DNA ကိုပြောပါတယ်။
ပြည်နယ်စစ်ကောင်စီရဲ့ ညွှန်ကြားချက်အရ မြို့မရဲစခန်း၊ နယ်မြေရဲစခန်း၊ ရဲကင်းစခန်းတွေက ရဲတပ်ဖွဲ့ဝင်တွေ အနေနဲ့ အရပ်ဝတ်နဲ့ ရုံးတက်ကြဖို့၊ မြို့နယ်ထွေထွေအုပ်ချုပ်ရေး ဦးစီးဌာနရုံးနဲ့တခြားဌာနဆိုင်ရာ ရုံးအားလုံးကတော့ နေအိမ်ကနေ အလုပ်လုပ်ကြဖို့ ဖြစ်တယ်လို့ သူကပြောပါတယ်။
စစ်ကောင်စီလက်အောက်ခံ ဝန်ထမ်းတွေအနေနဲ့ နေအိမ်ကနေ အလုပ်လုပ်ပေးရမယ် ဆိုပေမယ့် လိုအပ်လာပါက ရုံးကိုချက်ချင်းလာရောက်ပြီး အလုပ်လုပ်ပေးရမယ်ဆိုတဲ့ ညွှန်ကြားချက်မျိုးလည်း ထည့်သွင်းထားတယ်လို့ ဆိုပါတယ်။
အဲ့ဒီလို ညွှန်ကြားမှုမျိုးကို မွန်ပြည်နယ်အတွင်းက ရေးမြို့နယ်၊ ကျိုက်ထိုမြို့နယ်၊ ဘီးလင်းမြို့နယ်နဲ့ သထုံမြို့နယ်တို့မှာ အရင်ကတည်းက ညွှန်ကြားထားတာဖြစ်ပြီး ပေါင်မြို့နယ်အနေနဲ့တော့ အခုလတတိယအပတ်မှာ စတင်ညွှန်ကြားခဲ့တာ ဖြစ်တယ်လို့ ပြည်နယ်အစိုးရအဖွဲ့က အရာရှိဝန်ထမ်းတဦးကပြောပါတယ်။
အဲ့ဒီလိုညွှန်ကြားမှုတွေကြောင့် စစ်ကောင်စီလက်အောက်ခံ ဝန်ထမ်းတွေအကြားမှ စိုးရိမ်မှုတွေ ရှိနေကြသလို ပြည်သူ့ကာကွယ်ရေးတပ်ဖွဲ့တွေရဲ့ ဖမ်းဆီးသတ်ဖြတ်ခံရမှာနဲ့ လုပ်ကြံသတ်ဖြတ်ခံရမှာကို ကြောက်လန့်မှုတွေ ရှိနေကြတယ်လို့ သူကဆိုပါတယ်။
