သထုံမြို့နယ်အတွင်းကမော်လမြိုင်-ရန်ကုန် ရထား လမ်းတနေရာမှာကုန်တင်ရထားမိုင်းဆွဲတိုက်ခိုက်ခံရပြီးနောက် အဲ့ဒီရထားခရီးစဉ်ကို အချိန်ပြောင်း ပြေး ဆွဲတော့မယ်လို့ မြန်မာ့မီးရထားသတင်းရင်း မြစ် တွေဆီကသိရပါတယ်။
“ညရထားတွေအစားမနက်ပိုင်းရထားတွေပြောင်းဆွဲမှာ၊အဓိကတော့လုံခြုံရေးအခြေအနေကြောင့် အ ချိန်ပြောင်းလိုက်တာလို့သိရတယ်”လို့ မြန်မာ့မီး ရထားကအမည်မဖော်လိုတဲ့သတင်းရင်းမြစ်တဦးက DNA ကိုပြောပါတယ်။
ရန်ကုန်-မော်လမြိုင်ရထားလမ်းပိုင်း သိမ်ဆိပ်နဲ့ ဒုံ ဝန်းဘူတာကြားမှာ ဒီဇင်ဘာ(၁၃)ရက်က ကုန်တင်ရ ထားတစ်စီးမိုင်းဆွဲခံရပြီးနောက်မှာ အဲဒီလမ်းပိုင်းရ ထားခရီးစဥ်ပြေးဆွဲမှုရပ်ထားတာဖြစ်ပါတယ်။
ရပ်နားထားတဲ့ အဲ့ဒီရထားခရီးစဉ်ကို ဒီဇင်ဘာ (၂၀) ရက်မှာ ပြန်လည်ပြေးဆွဲမှာဖြစ်ပေမယ့် အရင်ကလို ညခရီးစဉ်တွေကို အခုမနက်ပိုင်းခရီးစဉ်တွေအဖြစ် ပြောင်းလဲသွားမှာဖြစ်တယ်လို့သိရပါတယ်။
ပြောင်းလဲသတ်မှတ်လိုက်တဲ့ ခရီးစဉ်တွေအရ အ မှတ်(၈၁)အဆန်လေအိတ်အမြန်ရထားဟာ ရန်ကုန် ကနေ မနက် ၆နာရီခွဲ မှာ ထွက်ပြီး မော်လမြိုင်ကို ညနေ ၄နာရီ ရောက်မှာဖြစ်ပါတယ်။
အလားတူအမှတ်(၈၂)အစုန်လေအိတ်အမြန်ရထားကလည်း မော်လမြိုင်ကနေ မနက် ၈နာရီခွဲထွက်ပြီး ရန်ကုန်ကို ညနေ ၆နာရီ မှာရောက်မယ်လို့ သက်ဆိုင် ရာဘူတာရုံတွေမှာခရီးသည်တွေကိုအသိပေးထားပါတယ်။
အဲဒီရထားတွေဟာ တိုးကြောင်ကလေး၊ ပဲခူး၊ သိမ် ဇရပ်၊ ကျိုက်ထို၊ တောင်စွန်း၊ နှင်းပုလဲ၊ သထုံ၊ ပေါင် ဘူတာတွေမှာရပ်ပေးမယ်လို့ဆိုပါတယ်။
ဒါ့အပြင်အမှတ်(၈၉)အဆန်ရထားက ရန်ကုန်က နေ မနက် ၇နာရီ၄၅ မိနစ်မှာထွက်ပြီး မော်လမြိုင်ကို ညနေ ၅နာရီ ၄၅ မိနစ်မှာ ရောက်မှာဖြစ်ကာ အမှတ်( ၉၀)အစုန်ရထားက မော်လမြိုင်ဘူတာကနေ မနက် ၉နာရီ၁၅မိနစ်မှာထွက်ပြီး ရန်ကုန်ကို ည ၇ နာရီ ၁၅မိနစ်မှာရောက်မယ်လို့လည်းအသိပေးထားပါတယ်။
ရန်ကုန်-မော်လမြိုင်ရထားခရီးစဥ်ကို COVID-19 ကပ်ရောဂါကာလမှာရပ်ထားခဲ့ပြီး ဒီနှစ် ဒီဇင်ဘာ (၁) ရက်ကမှပြန်လည်ပြေးဆွဲကာ ဒီဇင်ဘာ ၁၃ရက် ကမိုင်းကွဲမှုကြောင့် ပြန်လည်ရပ်ထားခဲ့ တာဖြစ်ပါ တယ်။
ကုန်တင်ရထားတွဲနဲ့ ရထားလမ်းပိုင်းတချို့ ထိခိုက် ပျက်စီးမှုရှိခဲ့တဲ့ မိုင်းဆွဲတိုက်ခိုက်ခံရမှုမှာ လူထိခိုက် သေဆုံးတာတော့မရှိဘူးလို့ DNA ရဲ့သတင်းရင်းမြစ် တွေကပြောထားပါတယ်။