ရုရှားဟာ နျူကလီးယား လက်နက်တွေ အသုံးပြုနိုင်တဲ့ အခြေအနေတွေအတွက် နိုင်ငံရဲ့ လူ့အဖွဲ့အစည်း လက်ခံနိုင်လောက်အောင် ပြင်ဆင်မှုတွေ စတင်နေတယ်လို့ ယူကရိန်း သမ္မတ ဗိုလိုဒီမာ ဇီလန်စကီးက ပြောကြားခဲ့ပါတယ်။
ဒါပေမဲ့ ရုရှားအနေနဲ့ လောလောလတ်လတ်မှာ ဒီလို ဖျက်ဆီးအားပြင်းတဲ့ လက်နက်တွေ အသုံးပြုဖို့ ဘက်ပေါင်းစုံ အသင့်မဖြစ်သေးဘူးလို့ ယုံကြည်ကြောင်း ဇီလန်စကီးက ဆိုပါတယ်။ အစောပိုင်းမှာ ဇီလန်စကီးက ရုရှားကို ဝိုင်းတိုက်ကြဖို့ တောင်းဆိုခဲ့တယ်လို့ BBCက ဖော်ပြပေမယ့် ဒါဟာ ဘာသာပြန် လွဲမှားမှုသာ ဖြစ်တယ်လို့ ယူကရိန်း သမ္မတက ရှင်းပြပါတယ်။
ပြီးခဲ့တဲ့ သီတင်းပတ်တွေအတွင်း ရုရှားဟာ ရှေ့တန်း စစ်မြေပြင်မှာ အဆုံးအရှုံးတွေ ဆက်တိုက် ကြုံနေရသလို ယူကရိန်း ပိုင်နက်ထဲက ထိန်းချုပ် နယ်မြေတွေ တော်တော်များများကို လက်လွှတ်ခဲ့ရပါတယ်။ ဒီအခြေအနေတွေကြောင့် ရုရှား သမ္မတ ဗလာဒီမာ ပူတင်ဟာ နျူကလီးယား လက်နက်တွေကို စတင် အသုံးပြုလာနိုင်ကြောင်း ခန့်မှန်းမှုတွေလည်း ရှိလာပါတယ်။
ကိယက်ဗ်မြို့က သတင်းစာ ရှင်းလင်းပွဲမှာ အင်္ဂလိပ် ဘာသာနဲ့ ပြောဆိုသွားရာမှာတော့ ဇီလန်စကီးက ရုရှားဟာ ဖြစ်နိုင်ခြေ အားလုံးအတွက် လူ့အဖွဲ့အစည်းကို စတင်ပြင်ဆင်ပေးနေကြောင်း၊ ဒီအခြေအနေက အန္တရာယ် များလွန်းကြောင်း၊ ရုရှားဟာ နျူကလီးယား လက်နက်တွေ အသုံးပြုဖို့ အဆင်သင့် မဖြစ်သေးပေမယ့် ချိတ်ဆက်မှုတွေ အစပျိုးနေပြီဖြစ်ကြောင်း၊ လတ်တလောမှာတော့ ဒီလို လက်နက်မျိုးတွေကို ရုရှားက တကယ် သုံးမသုံး ဆိုတာကို ဘယ်သူမှ တပ်အပ် မပြောနိုင်သေးကြောင်း မှတ်ချက် ပေးသွားပါတယ်။
နောက်တော့ ဘာသာပြန်ကနေတဆင့် ပြောရာမှာ ဇီလန်စကီးက ရုရှား ပြည်သူတွေ အနေနဲ့ နျူကလီးယား စစ်ပွဲ စဖြစ်ပြီဆိုရင် ဘဝတွေအားလုံး သက်ရောက် ထိခိုက်သွားမှာကို နားလည်စေလိုပြီး ဒီအခြေအနေကို တားဆီးနိုင်စွမ်း သူတို့မှာ ရှိနေကြောင်း၊ နျူကလီးယားနဲ့ တိုက်ခိုက်တယ် ဆိုတာက ပညာရှင်တွေ ပြောဆိုနေတဲ့ အခြေအနေတွေအတိုင်း တသွေမတိမ်း ဖြစ်မှာမဟုတ်သလို နောက်ပြန်လှည့်လို့ မရတဲ့ လမ်းဆုံးမျိုးဆီ ဦးတည်သွားမှာဖြစ်ကြောင်း ပြောကြားသွားပါတယ်။
အစောပိုင်းမှာ သူက ရုရှားကို ဝိုင်းတိုက်ကြဖို့ တောင်းဆိုခဲ့တယ် ဆိုတာဟာ ဘာသာပြန် လွဲချော်မှုသာ ဖြစ်တယ်လို့ ဇီလန်စကီးက ဖြေရှင်းခဲ့ပါတယ်။ အဲဒီ စကားအတွက် ရုရှား အစိုးရ ပြောရေးဆိုခွင့်ရ အရာရှိ ဒီမစ်ထရီ ပက်စ်ကော့ဗ်က နောက်ထပ် ကမ္ဘာစစ်တစ်ခု အစပျိုးဖို့ တောင်းဆိုလိုက်တာ ဖြစ်တယ်လို့ ဝေဖန် ရှုတ်ချခဲ့ပါတယ်။ ပြီးတော့ ယူကရိန်းမှာ သူတို့ရဲ့ စစ်ဆင်ရေးတွေ ကျူးလွန်နေတာ ဘာကြောင့် မှန်ကန်သလဲဆိုတာ ဇီလန်စကီးရဲ့ စကားက သက်သေပြနေကြောင်း ပက်စ်ကော့ဗ်က ဆိုပါတယ်။
ဇီလန်စကီးကတော့ အင်တာဗျူးမှာ ဘာသာပြန် အလွဲအမှား ဖြစ်သွားကြောင်း၊ ဒါကို အသုံးချပြီး ရုရှားက နောက်တစ်ဆင့် လိုရာဆွဲပြီး အဓိပ္ပါယ် ကောက်ယူနေကြောင်း တုံ့ပြန်သွားခဲ့ပါတယ်။
