ထိုင်းရေပိုင်နက်အတွင်းမှာ တရားမဝင် ငါးဖမ်းတဲ့ နိုင်ငံခြားငါးဖမ်းသင်္ဘော ၅ စီး ပြန်လွှတ်ပေးမှုမှာ လာဘ်ယူခဲ့ လို့ဆိုပြီး ထိုင်းလူဝင်မှုကြီးကြပ်ရေး ရဲအရာရှိ ၆ ဦးအပါအဝင် အစိုးရ အရာရှိ ၁၁ ဦး ဖမ်းဆီးခံထားရတယ်လို့ ထိုင်းလက်ထောက်ရဲချုပ် ဒုတိယရဲချုပ်ကြီး Surachate Halparn က အတည်ပြု ကြေညာကြောင်း ဘန်ကောက်ပို့စ် မှာဖော်ပြထားပါတယ်။
“အဂတိလိုက်စားပြီး မမှန်မကန်လုပ်ဆောင်တယ်ဆိုတဲ့စွပ်စွဲချက်နဲ့ အရာရှိ ၁၁ ဦးကို ဖမ်းဆီးခဲ့တယ်”လို့ ဒုတိယရဲချုပ်ကြီး ကကြေညာခဲ့ကြောင်း မြန်မာပြည်သားများအရေးပူးတွဲလှုပ်ရှားမှုကော်မတီ(JACBA)က ဆိုပါတယ်။
ပြီးခဲ့တဲ့နှစ် ဒီဇင်ဘာလအတွင်းမှာ ထိုင်းရေပိုင်နက်အတွင်း ခွင့်ပြုချက်မရှိဘဲ ငါးဖမ်းမှုအတွက် ငါးပိုက်ချသင်္ဘော ၅စီးနဲ့ သင်္ဘောသား ၂၂ ဦးကို ရဲတပ်ဖွဲ့နဲ့ ငါးလုပ်ငန်းအရာရှိတွေက ဖမ်းဆီးခဲ့ပါတယ်။ တရားရုံးလုပ်ငန်းစဉ်တွေ အပြီးမှာ ငါးဖမ်းလှေပါလှေသားတွေကို Songkhla အချုပ်ထောင်မှာ ချုပ်နှောင်ခဲ့ပြီး သင်္ဘောနဲ့ ဖမ်းမိပစ္စည်း တွေကိုတော့ လေလံတင်ဖို့ စီစဥ်ထားခဲ့ပါတယ်။
အဲဒီသင်္ဘောတွေဟာ လေလံမတင်ရသေးခင်မှာ ထိုင်းနိုင်ငံပြင်ပကို ရောက်ရှိသွားတာပါ။ ဒီအမှုနဲ့ ပတ်သက် တယ်လို့ ယူဆရသူ ၁၃ ဦးကို ဖမ်းဆီးစစ်ဆေးခဲ့ရာမှာ ထိုင်းအစိုးရဝန်ထမ်းတွေ ပါဝင်ပတ်သက်နေတာ ပေါ်ပေါက်ခဲ့တာဖြစ်ပါတယ်။
ထိုင်းလဝကရဲအရာရှိ ၆ ဦး၊ ပင်လယ်ပြင်နယ်နိမိတ်နဲ့ ရောဂါထိန်းချုပ်စစ်ဆေးရေးဌာန ဝန်ထမ်း ၅ ဦး၊ စုစုပေါင်း ၁၁ ဦးကို လာဘ်စားမှု၊ မမှန်မကန်ဆောင်ရွက်မှု၊ တာဝန်ပျက် ကွက်မှုနဲ့ ဖမ်းဆီးခဲ့ပါတယ်။ အဲဒီအရာရှိ ၁၁ ဦးကို ပြင်းပြင်းထန်ထန် အရေးယူမယ်လို့ Surachate ကထည့်သွင်း ပြောခဲ့ကြောင်း ဘန်ကောက်ပို့စ်ကဖော်ပြ ထားပါတယ်။
