မြန်မာနိုင်ငံ ဒီမိုကရေစီလမ်းကြောင်းပေါ် ပြန်လည်ရောက်ရှိရေးအတွက် ဆွီဒင်နိုင်ငံအနေနဲ့ ဆက်လက်ထောက်ခံအားပေးနေတယ်လို့ ဆွီဒင်နိုင်ငံခြားရေးဝန်ကြီးက ပြောပါတယ်။
ဇွန် ၈ ရက်နေ့က ဆွီဒင်နိုင်ငံခြားရေးဝန်ကြီး Ann Linde နဲ့ NUG အစိုးရ နိုင်ငံခြားရေးဝန်ကြီး ဒေါ်ဇင်မာအောင်တို့ ဆွီဒင်နိုင်ငံမြို့တော် စတော့ဟုမ်းမှာ တွေ့ဆုံဆွေးနွေးပြီးနောက် ဆွီဒင်နိုင်ငံခြားရေးဝန်ကြီးက သူ့ရဲ့ တွစ်တာစာမျက်နှာမှာ အဲဒီလိုရေးသားထားပါတယ်။
ဒါ့အပြင် ပဋိပက္ခတွေကို ငြိမ်းချမ်းစွာဖြေရှင်းရေးလုပ်ငန်းတွေအပေါ် ဆက်လက်အားပေးထောက်ခံနေတယ်လို့ လည်း သူကရေးသားထားပါတယ်။
ဒေါ်ဇင်မာအောင်နဲ့ အခုတွေ့ဆုံမှုဟာ အရေးပါတဲ့တွေ့ဆုံဆွေးနွေးမှုဖြစ်တယ်လို့ ဆွီဒင်နိုင်ငံခြားရေးဝန်ကြီးက ဆိုပါတယ်။
မြန်မာ့ဒီမိုကရေစီအရေးအတွက် နှစ်နိုင်ငံပူးပေါင်းဆောင်ရွက်ရေး၊ လူသားချင်းစာနာမှုဆိုင်ရာ အကူအညီတွေပေးရေး၊အကြမ်းဖက်စစ်အုပ်စုက ပြည်သူတွေအပေါ် ကျူးလွန်နေတဲ့ ရာဇဝတ်မှု၊ စစ်ရာဇဝတ်မှု၊စတာတွေကို ဆွေးနွေးခဲ့ကြတယ်လို့ သိရပါတယ်။
