photo-Global Myanmar Spring Revolution
အမေရိကန်ရေနံကုမ္ပဏီ Chevron မှ စစ်အုပ်စု ထိန်းချုပ်ထားတဲ့ ရေနံနှင့် သဘာဝဓာတ်ငွေ့လုပ်ငန်း (MOGE) ကို ငွေလွဲ ချက်ချင်းရပ်ဖို့ ကမ္ဘာနိုင်ငံအသီးသီးမှ ဒီမိုကရေစီအရေးလိုလားသူများက ဓာတ်ပုံကမ်ပိန်းမှာပါဝင် တောင်းဆို ဆန္ဒပြခဲ့ကြတာလို့ Global Myanmar Spring Revolution ကဖော်ပြထားပါတယ်။
” Chevron, TotalEnergies – စစ်အုပ်စုကို ငွေလွှဲတာ ချက်ချင်းရပ်၊ သင့်အခွန်ငွေနဲ့ ပြည်သူတွေ အသတ်ခံနေရတယ်။ ဓါတ်ငွေ့ခွန်တွေကို ထိန်းချုပ်ထားတဲ့ အကောင့်ထဲမှာ သိမ်းဆည်းပါ။ TotalEnergies – Don’t ask for sanctions exemptions! အရေးယူ ပိတ်ဆို့မှုရဲ့ ကင်းလွတ်ခွင့်ကို မသုံးပါနဲ့။ TotalEnergies – Don’t bankroll the junta with another $250 Million! ဖက်ဆစ်အုပ်စုထံ နောက်ထပ် သန်း ၂၅၀ ထပ်မလွှဲပါနဲ့” ဆိုတဲ့ စာသားတွေကိုင်ဆောင်ဆန္ဒထုတ်ဖော်ခဲ့ကြတာပါ။
အမေရိကန်၊ ဆွီဒင်၊ သြစတြေးလျ၊ ယူကေ၊ ဂျပန်၊ တောင်ကိုရီးယား၊ထိုင်ဝမ်၊ပြင်သစ်၊ အိုင်ယာလန် အစရှိတဲ့ နိုင်ငံအသီးသီးမှ ဒီမိုကရေစီအရေးလိုလားတဲ့ မြန်မာနိုင်ငံသားတွေအပြင် နိုင်ငံခြားသားတွေလည်း ပါဝင်ခဲ့ကြတာပါ။
အဆိုပါဓာတ်ပုံကမ်ပိန်းကို မေလ ၂၂ မှ ၂၅ အထိ ပြုလုပ်သွားမှာ ဖြစ်ပြီး Chevron နဲ့ Total Energies ကုမ္ပဏီကို ဖိအားပေးတောင်းဆိုတဲ့ စာသားနှင့်အတူ အနီရောင်အင်္ကျီ (သို့ ) သွေးစွန်းနေတဲ့အင်္ကျီ ၊ အနီရောင် လက်ပတ်တွေ ဝတ်ဆင်ကာ လက်သုံးချောင်းထောင် သင်္ကေတဖြင့် ဓာတ်ပုံရိုက်ပြီး ဆိုရှယ်မီဒီယာတွေမှာဖော်ပြတာ၊ Blood Money – သွေးစွန်းငွေ လူမှုကွန်ယက်စာမျက်နှာကို ပို့ဆောင်တာတွေ ပြုလုပ်နိုင်ကြောင်း GMSR ကဖော်ပြထားတာပါ။