တနင်္သာရီတိုင်း ထားဝယ်မြို့နယ် ကျောက်မဲတောင်ကျေးရွာအုပ်စုမှာ ကင်းပုန်းဝပ်နေတဲ့ စစ်အုပ်စုတွေ အတိုက်ခံရပြီး စစ်သားတစ်ဦး သေဆုံးကာ လက်နက်ပါ သိမ်းဆည်းရမိတယ်လို့ ဒေသတွင်း သတင်းဖော်ပြချက်တွေအရ သိရပါတယ်။
ဒီကနေ့ မေလ ၁၁ရက်နေ့ ညနေ ၃နာရီလောက်မှာ ကင်းမွန်းချိုကျေးရွာနဲ့ ဘဝပင်သတ္တူမိုင်းအကြားမှာ ကင်းပုန်းဝပ်နေတဲ့ အကြမ်းဖက်စစ်အုပ်စုကို KNDO Specialနဲ့ PDFပူးပေါင်းတပ်ဖွဲ့က ဝင်ရောက်တိုက်ခိုက်ခဲ့တာဖြစ်ပြီး တိုက်ပွဲဖြစ်ပွားချိန် ၁နာရီကျော် ကြာမြင့်ခဲ့တယ်လို့ သိရပါတယ်။
“စကစ ကင်းပုန်းနေရာတစ်ခုကို သွားတိုက်တာ၊ PDF ပူးပေါင်းအဖွဲ့တွေဘက်ကတော့ ထိခိုက်တာမရှိဘူး။ လောလောဆယ်အခြေအနေကတော့ အဲဒီဘက်ခြမ်းတွေမှာ စစ်ရေးတင်းမာနေတယ်”လို့ PDF အဖွဲ့နဲ့ နီးစပ်သူတစ်ဦးက သံလွင်တိုင်းမ်သတင်းဌာနကို ပြောထားပါတယ်။
တိုက်ပွဲအပြီးမှာ သေနတ်တစ်လက်၊ ကျည်ဘောက် ၄ခုနဲ့ ကျည် ၁၅၀ကျော်ကိုလည်း ပူးပေါင်းအဖွဲ့က သိမ်းဆည်းရမိခဲ့တယ်လို့ သိရပါတယ်။
Source- သံလွင်တိုင်းမ်
