မက္ကဆီကိုသမ္မတ López Obrador က လာမယ့်လမှာ ကျင်းပမယ့် အမေရိကထိပ်သီးအစည်းအဝေးကို သပိတ်မှောက်သွားမယ်လို့ ခြိမ်းခြောက်ထားပါတယ်။
အိမ်ရှင်နိုင်ငံဖြစ်တဲ့ အမေရိကန်အနေနဲ့ ကျူးဘား၊ နီကာရာဂွါနဲ့ ဗင်နီဇွဲလားနိုင်ငံတွေကို မဖိတ်ဘူးဆိုရင် မက္ကဆီကိုရဲ့ပါဝင်မှုကိုလည်း အတည်ပြုမှာမဟုတ်ဘူးလို့ မေလ ၁၀ရက်နေ့က ပြောခဲ့တာပါ။
“ထိပ်တိုက်ရင်ဆိုင်မှုမျိုးမဖြစ်သင့်ဘူးလို့ ကျွန်တော်တို့ခံစားရတယ်။ ကွဲလွဲမှုတွေရှိပေမဲ့ အမေရိကန်တွေအားလုံးက တွေ့ဆုံဆွေးနွေးမှုတွေလုပ်ရမှာဖြစ်တယ် ၊လူတိုင်းကို ဖိတ်ကြားစေချင်ပါတယ်။ ဒါ မက္ကဆီကိုရဲ့ ရပ်တည်မှုဖြစ်တယ်”လို့ သမ္မတ López Obrador က သတင်းစာရှင်းလင်းပွဲမှာ ပြောခဲ့ပါတယ်။
လူ့အခွင့်အရေးဆိုင်ရာမှတ်တမ်းတွေကြောင့် ကျူးဘား၊ နီကာရာဂွါနဲ့ ဗင်နီဇွဲလားအစိုးရတွေကို ထိပ်သီးအစည်းအဝေးကို ဖိတ်ကြားမှာမဟုတ်ဘူးလို့ အမေရိကန်တာဝန်ရှိသူတွေက ပြောဆိုထားပါတယ်။
အိမ်ရှင်နိုင်ငံအနေနဲ့ အမေရိကန်ဟာ ထိပ်သီးအစည်းအဝေးပွဲအတွက် ဖိတ်ကြားမယ့်ခေါင်းဆောင်တွေကို ရွေးချယ်ခွင့်ရှိပါတယ်။
အမေရိကရဲ့ ထိပ်သီးအစည်းအဝေးကို မြောက်ပိုင်း၊ အလယ်ပိုင်း၊ တောင်အမေရိကနှင့် ကာရေဘီယံနိုင်ငံတွေရဲ့ အစဉ်အလာအရ စုစည်းပြီး လေးနှစ်တစ်ကြိမ် ကျင်းပတာပါ။
ဧပြီလမှာ လေးနှစ်အတွင်း ပထမဆုံးအဆင့်မြင့်ဆွေးနွေးပွဲတွေကျင်းပခဲ့ပေမယ့် အမေရိကန်နဲ့ကျူးဘားနှစ်နိုင်ငံကြားဆက်ဆံရေးဟာ ဆယ်စုနှစ်ကြာ တင်းမာနေတာ ဖြစ်ပါတယ်။
နီကာရာဂွါနဲ့ ဗင်နီဇွဲလားနိုင်ငံတို့ဟာလည်း မကြာသေးခင်က သံသယဖြစ်ဖွယ် ရွေးကောက်ပွဲတွေအပေါ် ကျယ်ကျယ်ပြန့်ပြန့် ပိတ်ဆို့အရေးယူမှုစာရင်းကို ချမှတ်ပြီးနောက် အမေရိကန်နဲ့ ဆက်ဆံရေးဟာ ဆိုးရွားတဲ့အခြေအနေမှာရှိနေပါတယ်။
