မြန်မာ့အရေး ကူညီပေးနိုင်မယ့် နည်းလမ်းတွေကို အိမ်ဖြူတော်မှာ ဆွေးနွေးခဲ့တယ်လို့ NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက ပြောပါတယ်။
အမေရိကန်အစိုးရ၊ အမျိုးသားလုံခြုံရေးကောင်စီရဲ့ အရှေ့အာရှဒေသဆိုင်ရာ အဆင့်မြင့် ဒါရိုက်တာ Mr. Egatd Kavan နဲ့ အိမ်ဖြူတော်မှာ တွေ့ဆုံခဲ့ပြီး အမေရိကန်အစိုးရနဲ့ ဒေသအတွင်းမိတ်ဖက်နိုင်ငံတွေ ပူးပေါင်းကာ မြန်မာနွေဦးတော်လှန်ရေးအတွက် ကူညီနိုင်မဲ့နည်းလမ်းတွေကို ပွင့်လင်းစွာ ဆွေးနွေးနိုင်ခဲ့ကြောင်း ဦးအောင်မျိုးမင်းက သူ့ရဲ့ဖေ့စ်ဘွတ်ခ်စာမျက်နှာမှာ ဒီကနေ့ ရေးသားထားပါတယ်။
NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်းဟာ အမေရိကန်နိုင်ငံခြားရေးဝန်ကြီးဌာန၊ ကမ္ဘာလုံးဆိုင်ရာ ရာဇ၀တ်မှုနှင့်တရားမျှတမှုဆိုင်ရာ သံအမတ်ကြီးနဲ့ တွေ့ဆုံစဉ်မှာလည်း အကြမ်းဖက်စစ်တပ်က ရိုဟင်ဂျာတွေ အပေါ် လူမျိုးတုံးသတ်ဖြတ်မှုနဲ့ပတ်သက်ပြီး တရားမျှတမှုဖော်ဆောင် နိုင်ရေးအတွက် ပူးပေါင်းလုပ်ဆောင်သွားမယ်လို့ ပြောကြားခဲ့ပါသေးတယ်။
အမေရိကန် ကွန်ကရက် အထက်လွှတ်တော် Republican ခေါင်းဆောင် Mitch Mc Connell က ဧပြီ ၆ ရက်နေ့မှာထုတ်ပြန်တဲ့ ကြေညာချက်ထဲမှာ သူ့ရဲ့မဲဆန္ဒနယ်ဖြစ်တဲ့ Kentucky ပြည်နယ်ရှိ မြန်မာနိုင်ငံသားတွေနဲ့အတူ မြန်မာပြည် ဒီမိုကရေစီအရေးအတွက် ပန်းတိုင်ရောက်တဲ့အထိ ဆက်လက်တိုက်ပွဲဝင်သွားမယ်လို့ ဖော်ပြထားပါတယ်။
