ဒီပဲယင်းလေကြောင်းတိုက်ခိုက်မှုမှာ သေဆုံးသူအရပ်သားတွေဟာ PDF တွေဖြစ်တယ်လို့ စစ်တပ်လော်ဘီတွေပုံဖော်ဝါဒဖြန့်နေ

၂၀၂၅ခုနှစ်၊ ဒီဇင်ဘာလ၊ ၈ရက်။
(Fact-check _DNA/ The Red Flag)

အနှစ်ချုပ်

“NUGဆေးရုံနဲ့PDFလက်ဖက်ရည်ဆိုင်ကိုတည့်တည့်ကြီးဆော်သွားတယ်၊ လက်ရှိPDFဘတ်ဆုံး(၄၂)ဦးအထိရှိလာပါပြီ။PDFတိုတစ်ရှည်တစ်(၁၂၁)ပွဲ” (မူရင်းသတ်ပုံအတိုင်း) ဆိုတဲ့အကြောင်းရာဟာ လုပ်ကြံဖန်တီးရေးသားထားတဲ့ ဝါဒဖြန့်သတင်းမှားတခုဖြစ်ပါတယ်။

စစ်ကိုင်းတိုင်း၊ ဒီပဲယင်းမြို့နယ်၊ မရကန်ကျေးရွာရဲ့ လူစည်ကားတဲ့ လက်ဖက်ရည်ဆိုင်ကို ပြီးခဲ့တဲ့ ဒီဇင်ဘာလ၊ ၅ရက်မှာ စစ်တပ်ကနေ လေကြောင်းကတဆင့်ဗုံးကြဲတိုက်ခိုက်ခဲ့ပြီး လက်ဖက်ရည်ဆိုင်မှာရှိနေတဲ့ အရပ်သားပြည်သူတွေကို PDFတွေလို့ ရေးသားဖြန့်ဝေနေတဲ့သတင်းတွေ လူမှုမီဒီယာတွေမှာ ပျံ့နှံ့နေပါတယ်။

အဲ့ဒီအကြောင်းရာကို စစ်တပ်ဝါဒဖြန့် တယ်လီဂရန်ချန်နယ်တွေနဲ့ စစ်တပ်ထောက်ခံသူတွေကြားမှာ ရေးသားဖြန့်ဝေနေကြပြီး လူမှုမီဒီယာတွေမှာ မျှဝေနေကြတာကြောင့် ပျံ့နှံ့မှုအားကောင်းနေပါတယ်။

သတင်းမှားလင့်များ –
https://archive.ph/rQlRz
https://archive.ph/qKXXG
https://archive.ph/wip/Sw9kC
https://archive.ph/rJ52b

အဲ့ဒီအကြောင်းရာကို MFCN အဖွဲ့ဝင်ဖြစ်တဲ့ DNA Fact Check ကနေ စစ်ဆေးကြည့်တဲ့အခါမှာ လုပ်ကြံဖန်တီးရေးသားထားတဲ့ အကြောင်းအရာဖြစ်တာကို တွေ့ရပြီး သတင်းမှားဖြစ်ကြောင်း အတည်ပြုနိုင်ခဲ့ပါတယ်။

သတင်းစိစစ်ချက်

ဒီပဲယင်းမြို့နယ်၊ မရကန်ကျေးရွာမှာရှိတဲ့ လက်ဖက်ရည်ဆိုင်မှာ ဖီလစ်ပိုင်-မြန်မာ ဆီးဂိမ်းပြိုင်ပွဲ ပြသနေတဲ့အချိန်မှာ စစ်တပ်ကနေ လေကြောင်းကတဆင့် ဗုံးကြဲချတိုက်ခိုက်ခဲ့တာကြောင့် ဒီဇင်ဘာ ၇ရက်အထိ နောက်ဆုံးရသတင်းအရ ၄နှစ်အရွယ်ကလေးငယ်တဦးနဲ့ ကျောင်းအုပ်ဆရာမတဦးအပါအဝင် အရပ်သား ၁၉ဦးသေဆုံးခဲ့တယ်လို့ DVB ကသတင်းဖော်ပြထားပါတယ်။
DVB သတင်းဌာနမှဖော်ပြထားတဲ့သတင်း>>> https://bit.ly/3Mmhojn

ဗုံးကြဲတိုက်ခိုက်ခံရတာကြောင့် မရကန်ကျေးရွာမှာရှိတဲ့ နေအိမ် (၁၉) လုံး၊ မော်တော်ကား တစီး၊ ထော်လာဂျီ တစီးနဲ့ မော်တော်ဆိုင်ကယ် (၁၀) စီး ထိခိုက်ပျက်ဆီးခဲ့တယ်လို့ MFP သတင်းဌာနက မနေ့က ဒီဇင်ဘာလ၊ ၇ရက် မှာ သတင်းရေးသားထားပါတယ်။

MFP သတင်းဌာနမှဖော်ပြထားတဲ့သတင်း>>> https://bit.ly/44dmIM4

စစ်တပ်က ဂျက်ဖိုက်တာနဲ့ ပြီးခဲ့တဲ့ ဒီဇင်ဘာ ၅ရက်၊ ည(၈)နာရီဝန်းကျင်မှာပဲ လူစည်ကားတဲ့ မရကန်ကျေးရွာ လက်ဖက်ရည်ဆိုင်ကို ဗုံးနှစ်လုံးကြဲချတိုက်ခိုက်ခဲ့တာဖြစ်ပြီး အဲ့ဒီလိုတိုက်ခိုက်ပြီးပြီးချင်းမှာပဲ နေအိမ် သုံးလုံး လုံးဝပျက်ဆီးခဲ့ပြီး သေဆုံးသူတွေကို ယောက်ျား၊ မိန်းမ မသဲကွဲတဲ့အထိ ထိခိုက်ခဲ့တာဖြစ်တယ်လို့ ဧရာဝတီသတင်းဌာနက သတင်းဖော်ပြပါတယ်။

ဧရာဝတီ သတင်းဌာနမှဖော်ပြထားတဲ့သတင်း>>> https://bit.ly/48H3PCy

သတင်းသုံးသပ်ချက်

မြန်မာအမျိုးသမီးဘောလုံးပွဲဖြစ်တာကြောင့် ဒေသခံတွေစုပေါင်းကြည့်ရှုနေတဲ့အချိန် လူစည်ကားနေတဲ့ လက်ဖက်ရည်ဆိုင်ကို ရည်ရွယ်ချက်ရှိရှိလေကြောင်းကတဆင့် ဗုံးကြဲချတိုက်ခိုက်ခဲ့တာကို တွေ့ရပါတယ်။

သေဆုံးသူတွေထဲမှာ ၄နှစ်အရွယ်ကလေးငယ်ကနေ အသက် ၇၀ ဝန်းကျင်အထိ ပါဝင်နေတာကြောင့် PDF တွေလို့ ရေးသားဖော်ပြနေတာက အရပ်သားတွေအပေါ်ကျူးလွန်တဲ့ စစ်ရာဇဝတ်မှုတွေကို ဖုံးကွယ်ဖို့အတွက်ရည်ရွယ်ချက်ရှိရှိ လှုံ့ဆော်ဖြန့်ဝေနေကြတာကိုလည်း အတည်ပြုနိုင်ခဲ့ပါတယ်။

ဒါကြောင့် စစ်တပ်လော်ဘီတွေဖြန့်ဝေနေတဲ့ အကြောင်းအရာဖြစ်တဲ့ သေဆုံးသူတွေက ဒီပဲယင်းPDF တွေဖြစ်တယ်ဆိုတာ ဟာ လုပ်ကြံဖန်တီးရေးသားဖြန့်ဝေနေတဲ့ ဝါဒဖြန့်သတင်းမှားသာဖြစ်တာကို အတည်ပြုနိုင်ခဲ့ပါတယ်။

ဒီနေ့ခေတ်ဟာ လူမှုမီဒီယာခေတ်ဖြစ်တဲ့အတွက် လူမှုမီဒီယာတွေပေါ်မှာ အကြောင်းအရာ တခုခုကို ပုံဖျက်ဖို့၊ ဝါဒဖြန့်ဖို့၊ ကိုယ်ကျိုးရှာဖို့ ရည်ရွယ်ပြီး သတင်းအတု၊ သတင်းအမှားတွေကို ရည်ရွယ် ချက်ရှိရှိ ဖြန့်ဝေနေကြတာကြောင့် အလွယ်တကူ မယုံကြည်ဖို့၊ ပြန်ပြီး မမျှဝေကြဖို့ အကြံပြုလိုပါတယ်။

စာဖတ်သူတွေအနေနဲ့ သတင်းတု/သတင်းမှား ဖြစ်တယ်လို့ သံသယရှိရင်ပဲဖြစ်ဖြစ်၊ မှန်ကန်တဲ့သတင်း ဟုတ်၊ မဟုတ်အတည်ပြု မေးမြန်းလိုရင်ပဲဖြစ်ဖြစ်၊ Fact Checking ပြုလုပ်ပေးတဲ့ သတင်းဌာန/အဖွဲ့ အစည်းတွေရဲ့ Chat Box ကနေ သွားရောက်မေးမြန်းကြဖို့ တိုက်တွန်းလိုပါတယ်။

Myanmar Fact-checking Network အဖွဲ့ဝင်ဖြစ်တဲ့ DNA Fact Check အဖွဲ့ကိုလည်း Facebook page ကနေဆက်သွယ်မေးမြန်းနိုင်သလို ဒီနေရာ (dnafactcheck@gmail.com)ကနေ လည်း ဆက်သွယ်မေးမြန်းပြီး အချက်အလက်စစ်ဆေးပေးဖို့ တောင်းဆိုနိုင်ပါတယ်။

Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။

Web – https://myanmarfactcheckingnetwork.org/
Fb – https://www.facebook.com/myanmarfactcheckingnetwork

#DNAFactCheck #DNA #MFCN #FactCheck #ဒီပဲယင်း #လေကြောင်းတိုက်ခိုက် #အရပ်သားထိခိုက်သေဆုံး #လုပ်ကြံပြောဆို #သတင်းမှားဝါဒဖြန့်