ဂွကမ်းခြေအတိုင်း ရွှေသောင်ယံကမ်းခြေထိ၊ ရိုးမအရှေ့ဘက်ခြမ်းတလျှောက်နဲ့ ပုသိမ် – မုံရွာ လမ်းဘေးတလျှောက်ရှိ စစ်တပ်စခန်းတွေကို သိမ်းပိုက်နေခဲ့တာဖြစ်ပြီး ဂွကမ်းခြေတလျှောက်မှာတော့ ရွှေသောင်ယံအနီးက ဘောမိ၊ မကျီးဇင်ကျေးရွာတွေနဲ့ မကျီးဇင် – သာပေါင်းကြား ကျေးရွာတချို့ကို သိမ်းပိုက်နိုင်ခဲ့ပါတယ်။
၂၇ နိုဝင်ဘာ။
ပုသိမ် – မုံရွာလမ်းမပေါ် လေးမျက်နာမြို့နယ် သဲနုကုန်းရွာအနီးက စစ်တပ်ရဲ့ ရှေ့တန်းတပ်စခန်းအချို့ကို အာရက္ခတပ်တော်(AA)နဲ့ ပူးပေါင်းတပ်ဖွဲ့တွေက ဒီရက်ပိုင်းမှာ သိမ်းပိုက်လိုက်ပြီး တိုက်ပွဲတွေ ဆက်လက်ပြင်းထန် နေကာ စစ်တပ်ဘက်က အကျအဆုံးများနေပါတယ်။
“စခန်းနှစ်ခုပါ ရလိုက်တာ၊ တိုက်နေတာက တပတ်ကျော်လောက်ရှိပြီ၊ အခုလည်း တိုက်ပွဲပြင်းတုန်း။ လေယာဉ်နဲ့ လက်နက်ကြီးပစ်တာနေ့တိုင်းရှိတယ်၊ ဒီနေ့မနက်ကလည်း တိုက်ပွဲဖြစ်တာ။ လေယာဉ်တော့ မလာဘူး ဒီနေ့၊ အကျ အဆုံးက တော်တော်များတယ် သူတို့ (စစ်ကော်မရှင်)ဘက်က” လို့ AA နဲ့ နီးစပ်တဲ့ စစ်ရေးသတင်းရင်းမြစ်တဦးက ပြောပါတယ်။
AA နဲ့ပူးပေါင်းတပ်ဖွဲ့ဟာ သဲနုကုန်းရွာနယ်မြေရဲစခန်းကို ပြီးခဲ့တဲ့ ဇွန်လကတည်းက သိမ်းပိုက်ထားပြီး အဲဒီအနီးဝန်း ကျင်ရှိ ရှေ့တန်းတပ်စခန်းတွေကို ဆက်လက်ထိုးစစ်ဆင်နေတာဖြစ်ပါတယ်။ တပ်စခန်းတွေ ထပ်မံသိမ်းပိုက်လိုက်နိုင်တယ်လို့လည်း သိရပါတယ်။
အဲဒီ သဲနုကုန်းကျေးရွာအနီး စခန်းသိမ်းတိုက်ပွဲတွေမှာ စစ်တပ်ဘက်က တပ်သားတွေထဲ စစ်မှုထမ်းဥပဒေ နဲ့အတင်းအကြပ်ဖမ်းဆီး စစ်သင်တန်းပေး၊ ရှေ့တန်းပို့ထားတဲ့ ပြည်သူ့စစ်တွေအများစုတွေ့ရပြီး ထွက်ပြေးအလင်း ဝင်လာသူတွေနဲ့ အရှင်ဖမ်းဆီးရမိသူအချို့အလည်း ရှိနေတယ်လို့ အထက်ပါ သတင်းရင်းမြစ်က ပြောပါတယ်။
အခု တိုက်ပွဲဖြစ်နေတဲ့ နေရာဟာ google မြေပုံမှာ တဖြောင့်တည်း တိုင်းမယ်ဆိုရင် ရေကြည်မြို့နယ် မြောက်စမ်းအမြောက်တပ် အမတ (၃၄၄) နဲ့ ၁၂ ခန့် နဲ့ ကွင်းကောက်မြို့က တန်းမြင့်လေ့ကျင့်ရေးသင်တန်းကျောင်းနဲ့ ၁၅ မိုင်ခန့် ကွာဝေးပါတယ်။ သဲနုကုန်းကျေးရွာဟာ အမတ ၃၄၄ နဲ့ ကွင်းကောက် တကက ၅ အကြား ၊ ပုသိမ်-မုံရွာကားလမ်းမကြီး ဘေးမှာ ရှိနေတာ ဖြစ်ပါတယ်။
အဲဒီ သဲနုကုန်းရွာအနီး တိုက်ပွဲတွေဟာ စစ်တပ်ဘက်က အထိအခိုက် အကျအဆုံးများနေပြီး ဒဏ်ရာရသူတွေထဲ အရာရှိအဆင့်တွေပါ ပါဝင်နေပြီး အဲဒီဒဏ်ရာရသူတွေကို ရန်ကုန်တိုင်း မင်္ဂလာဒုံစစ်ဆေးရုံဆီ ပေးပို့ကုသ နေရတယ်လို့ ဒေသခံသတင်းရင်းမြစ်တွေဆီက သိရပါတယ်။
“ဒဏ်ရာရတဲ့ကောင်တွေ အရမ်းများတယ်၊ ဒီက ဆေးရုံမှာ လိုက်မမီတော့ဘူး၊ စစ်မျက်နှာတွေ များတယ်လေ။ ဒဏ်ရာရတဲ့သူကလည်း အရမ်းများတော့ မင်္ဂလာဒုံထိ ဆက်တိုက်ပို့နေရတယ်ကြားတယ်။ တပ်ထဲကကောင်တွေဆီက တဆင့်ကြားရတာ” လို့ ပုသိမ်ဒေသခံ စစ်ရေးသတင်းရင်းမြစ်တဦးက ပြောပါတယ်။
အဲဒီလို တပ်စခန်းတွေ သိမ်းပိုက်ခံရပြီး အထိနာနေတဲ့ စစ်ကော်မရှင်တပ်ဟာ လေကြောင်း၊ လက်နက်ကြီးပစ်ခတ် မှုတွေ ဆက်တိုက်လုပ်နေပြီး တိုက်ပွဲဧရိယာနဲ့ ဝေးကွာတဲ့ အရပ်သား လူနေကျေးရွာတွေကိုပါ ပစ်ခတ်၊ ဗုံးကြဲနေ တယ်လို့ ဆိုပါတယ်။
ပြီးခဲ့တဲ့ နိုဝင်ဘာလ ၂၅ ရက်နေ့ကလည်း တိုက်ပွဲနဲ့ အလှမ်းဝေးတဲ့ အရပ်သားလူနေကျေးရွာ ဝက်ကုန်းရွာကို ဂျက် ဖိုက် တာနဲ့ ပေါင်ငါးရာ ဗုံးသုံးလုံးကြဲချ တိုက်ခိုက်ခဲ့တာကြောင့် ကိုယ်ဝန်ဆောင်အမျိုးသမီးအပါအဝင် နှစ်ဦး သေဆုံးပြီး လေးဦးဒဏ်ရာရကာ နေအိမ် ဆယ်လုံးကျော် မီးလောင်ပျက်စီးသွားခဲ့တယ်လို့ ဒေသခံတွေက ပြောကြပါတယ်။
စစ်တပ်ဟာ ပြီးခဲ့တဲ့ အောက်တိုဘာ ၂၃ ရက်နေ့ကလည်း လေးမျက်နှာမြို့နယ် စပြင်ကျေးရွာကို ဂျက် ဖိုက်တာသုံးစီးနဲ့ ဗုံးကြဲခဲ့ရာ ကလေးငယ်၊ အမျိုးသမီးတွေအပါအဝင် အရပ်သားပြည်သူ ၂၄ ဦးထက်မနည်း သေဆုံးခဲ့ ပါတယ်။ ၂၀၂၅ ခု ဇူလိုင်လ ၁၅ ရက်ကနေ အောက်တိုဘာ ၃၀ ရက်နေ့ထိ ဧရာ၀တီတိုင်းအတွင်း စစ်တပ်ရဲ့ ရန်ကြောင့် သေဆုံးသူ ၃၃ ဦး၊ ထိခိုက်ဒဏ်ရာရသူ ၅၅ ဦး ရှိခဲ့တယ်လို့ ဒေသခံ တော်လှန်ရေး တပ်တွေရဲ့ အချက်အလက်အရ သိရပါတယ်။
ဧရာ၀တီတိုင်းအတွင်းမှာ လေးမျက်နှာမြို့နယ်အပြင် သာပေါင်းမြို့နယ် သာပေါင်းလေး၊ သဲဖြူရွာအနီးဝန်းကျင်၊ ရွှေသောင်ယံမြို့နယ် မကျီးဇင်ရွာ အနီးဝန်းကျင်တွေ အတွင်းမှာလည်း တိုက်ပွဲတွေ ပြင်းထန်နေပြီး စစ်တပ်ဘက်က အထိအခိုက်အကျအဆုံး များနေတယ်လို့ ဒေသတွင်း သတင်းရင်းမြစ်တွေက ပြောပါတယ်။
AA နဲ့ ပူးပေါင်းတပ်ဖွဲ့ဟာ ပြီးခဲ့တဲ့ ၂၀၂၄ ခု ဒီဇင်ဘာလအတွင်းမှာ ရိုးမအနောက်ဘက်ခြမ်း ရခိုင်ပြည်နယ် ဂွမြို့နယ်ကို အလုံးစုံ သိမ်းပိုက်ခဲ့ပြီးနောက် ရိုးမအရှေ့ဘက်ခြမ်း ဧရာ၀တီတိုင်းအတွင်းက စစ်တပ်ရဲ့ စခန်းတွေကို ထိုးစစ်ဆင် တိုက်ခိုက်လာခဲ့တာပါ။
ဂွကမ်းခြေအတိုင်း ရွှေသောင်ယံကမ်းခြေထိ၊ ရိုးမအရှေ့ဘက်ခြမ်းတလျှောက်နဲ့ ပုသိမ် – မုံရွာ လမ်းဘေးတလျှောက်ရှိ စစ်တပ်စခန်းတွေကို သိမ်းပိုက်နေခဲ့တာဖြစ်ပြီး ဂွကမ်းခြေတလျှောက်မှာတော့ ရွှေသောင်ယံအနီးက ဘောမိ၊ မကျီးဇင်ကျေးရွာတွေနဲ့ မကျီးဇင် – သာပေါင်းကြား ကျေးရွာတချို့ကို သိမ်းပိုက်နိုင်ခဲ့ပါတယ်။
ဒါ့အပြင် ငသိုင်းချောင်း၊ မြောက်စမ်းအမြောက်တပ် အမတ(၃၄၄)အနီးဝန်းကျင်နဲ့ လေးမျက်နှာမြို့နယ် စက်စက်ယို အနီးတ၀ိုက်တပ်ရှိ တပ်စခန်းတွေကိုလည်း AA ပူးပေါင်းတပ်က သိမ်းပိုက်ထားပြီး လက်ရှိမှာ လေးမျက်နှာ၊ သာပေါင်းနဲ့ ရွှေသောင်ယံမြို့နယ်တွေမှာ တိုက်ပွဲတွေ ဆက်ရှိနေတာဖြစ်ပါတယ်။
ရိုးမအနောက်ဘက်ခြမ်း ရခိုင်ပြည်နယ်အတွင်းက မြို့နယ် ၁၄ ခုကို အလုံးစုံ သိမ်းပိုက်ထိန်းချုပ်ထားတဲ့ AA ဟာ ရိုးမ အရှေ့ဘက်ခြမ်း ဧရာ၀တီတိုင်း ၊ မကွေးတိုင်း၊ ပဲခူးတိုင်းတို့အတွင်းရှိ စစ်ကော်မရှင်တပ်စခန်းတွေကို ဒေသခံတော် လှန်ရေးတပ်ဖွဲ့တွေနဲ့ ပူးပေါင်းကာ ဆက်လက်တိုက်ခိုက်နေတာဖြစ်ပါတယ်။