ကျွန်မက ဒါနဲ့ပတ်သက်လို့ နောက်ကျသလို ဖြစ်နေပေမယ့် ရှေ့မှာလည်း တိုင်စာတွေ၊ တင်ပြစာတွေ ပို့ထားကြတာရှိတော့ သူတို့ဘာလုပ်နေလဲ ဆိုတာကို စောင့်ကြည့်နေတဲ့ သဘောပါ။
၂၇၊ နိုဝင်ဘာလ။
KNU/KNLA နယ်မြေထဲမှာ တပ်စုမှူး တိုက်မောင်းနဲ့ ရဲဘော် ပလာတူးတို့ နှစ်လကျော်ကြာတဲ့အထိ ပျောက်ဆုံးနေတဲ့ ကိစ္စမှာ အခြေအနေအမှန်ကို စုံစမ်းစိစစ် ထုတ်ပြန်ပေးဖို့ အမျိုးသားညီညွတ်ရေးအစိုးရ(NUG) ရဲ့ ကာကွယ်ရေးဝန်ကြီးဌာန (MOD)ကို စာပေးပို့သွားဖို့ စီစဉ်နေတယ်လို့ ဘိုကလေးမြို့နယ် ပြည်သူ့လွှတ်တော် ကိုယ်စားလှယ်ဖြစ်သူ မဝေမာလွင်က DNA ကိုပြောပါတယ်။
နွေဦးတော်လှန်ရေးအစမှာ ဘိုကလေးမြို့နယ် ပညာရေးမှူးရုံးကနေ CDM ပြုလုပ်ခဲ့ပြီးနောက် စစ်အာဏာရှင် ကို တော်လှန်ဖို့ လက်နက်ကိုင်လမ်းစဉ်ကို ရွေးချယ်ခဲ့တဲ့ တပ်စုမှူး တိုက်မောင်း ပျောက်ဆုံးမှု ဖြစ်စဉ်ကို ရှင်းရှင်း လင်းလင်း ဖော်ထုတ်ပေးဖို့ လွှတ်တော် ကိုယ်စားလှယ် တဦးအနေနဲ့ အလိုရှိနေတာလို့ ပြောပါတယ်။
“အဓိက သူနဲ့ပတ်သက်တဲ့ တရားမျှတမှု၊ သူနဲ့ပတ်သက်တဲ့ အဖြစ်မှန်တွေကို သိရဖို့ပေါ့။ ကျွန်မက ဒါနဲ့ပတ်သက်လို့ နောက်ကျသလို ဖြစ်နေပေမယ့် ရှေ့မှာလည်း တိုင်စာတွေ၊ တင်ပြစာတွေ ပို့ထားကြတာရှိတော့ သူတို့ဘာလုပ်နေလဲ ဆိုတာကို စောင့်ကြည့်နေတဲ့ သဘောပါ။ အခုကတော့ သူတို့လုပ်နေပြီလည်း ဖြစ်နိုင်တယ်။ လုပ်နေရင်လည်း လုပ်နေပြီဆိုတာကို သိရဖို့ပေါ့။ မလုပ်နေသေးရင်လည်း လုပ်ဖို့အတွက် တွန်းအားတခုဖြစ်ဖို့အတွက် မကြာခင်မှာ ကျွန်မ စာပို့သွားမှာပါ ” လို့ မဝေမာလွင်က ပြောပါတယ်။
တပ်စုမှူး တိုက်မောင်း နဲ့ ရဲဘော်ပလာတူးတို့ နှစ်ယောက်ဟာ NUG လက်အောက်မှာရှိနေတဲ့ စစ်သုံ့ပန်းထိန်းသိမ်းရေးစခန်း၊ အထူးတိုင်းစစ်ဌာနမှာ တာဝန်ထမ်းဆောင်နေရင်း KNU/KNLA က ဗိုလ်သာလော ဦးဆောင်တဲ့ တပ်ရင်း ၁၈ ကို စစ်ကူလာဖို့ တောင်းဆိုချက်ကြောင့် ပြီးခဲ့တဲ့ စက်တင်ဘာလက ကော့ကရိတ်ကို သွားရောက်ပြီးတဲ့ နောက်မှာ ပျောက်ဆုံးသွားခဲ့တာ ဖြစ်ပါတယ်။
အဲဒီနောက်မှာ တပ်စုမှူး တိုက်မောင်းတို့ နှစ်ယောက်ကို စစ်ကောင်စီတပ်တွေ ဖမ်းဆီးရမိသွားပြီး ကျဆုံးသွားပြီ ဆိုတဲ့ သတင်းတွေနဲ့ ရှေ့တန်းမှာ အရက်သောက်လို့ ဗိုလ်သာလော အမိန့်နဲ့ ဖမ်းဆီးခံရပြီးနောက် သေဆုံးသွားခဲ့တယ်ဆိုတဲ့ သတင်းတွေလည်း ထွက်ပေါ်နေပါတယ်။
ဒီသတင်းတွေနဲ့ ပတ်သက်လို့ KNU/KNLA အနေနဲ့ ဖြေရှင်းပေးဖို့ကို ရဲဘော်ကာချုပ်ရဲ့ မိသားစုဝင်နဲ့ ရင်းနှီးကြသူတွေက စာပေးပို့တောင်းဆိုထားကြသလို သူတာဝန်ထမ်းဆောင်ခဲ့တဲ့ တပ်ရင်း တပ်ဖွဲ့တွေက တာဝန်ရှိသူတွေကလည်း MOD ကို စာပေးပို့ တိုင်ကြားမှုတွေ ပြုလုပ်ခဲ့ကြပါတယ်။
“သေတယ်ဆိုလည်း သေသွားပြီ ဘယ်လိုသေသွားတယ်။ သူဘော်ဒီက ဘယ်မှာစသဖြင့် သေချာသိရဖို့။ မတရား သေဆုံးခဲ့ရတယ်ဆိုရင် တရားမျှတမှုကို ပြန်ရှာပေးဖို့။ ဒါကိုလိုချင်တာပါ။ ရဲဘော် ကာချုပ်ဟာ တော်လှန်ရေးမှာ တာဝန်ကျေလွန်းသူဖြစ်တယ်။ လူချစ်လူခင် ပေါသူဖြစ်တယ်။ တော်တဲ့ ရိုးတဲ့သူဖြစ်တယ်။ ဒီလိုလူတယောက်ဟာ ဘာမှန်းမသိရပဲ သေဆုံးသွားရတယ်ဆိုတာ မဖြစ်သင့်ပါဘူး။ တရားလည်း မတရားပါဘူး ”လို့ ရဲဘော်ကာချုပ်နဲ့အတူ တော်လှန်ရေးလုပ်ငန်းတွေ အတူလုပ်ဆောင်ခဲ့တဲ့ ရန်ကုန်တပ်ရင်း ၅၁၀၂ ရဲ့ထောက်ပို့တာဝန်ယူထားသူ မကေဂျာနူးက ဆိုပါတယ်။
တပ်စုမှူး တိုက်မောင်းနဲ့ ရဲဘော်ပလာတူးတို့ ပျောက်ဆုံးနေတဲ့ ဖြစ်စဉ်ကို အမြန်ဆုံး ဖြေရှင်းပေးနိုင်ဖို့ အခြေခံပညာ ပညာရေးလုပ်သားသမဂ္ဂများ အဖွဲ့ချုပ် တိုက်ပွဲဦးဆောင် ကော်မတီ (FBEWU)ကလည်း နိုဝင်ဘာ ၁၆ ရက်က ထုတ်ပြန်ချက် ထုတ်ပြီးတောင်းဆိုမှု ပြုလုပ်ထားပါသေးတယ်။
လက်ရှိအချိန်မှာတော့ ရဲဘော်ကာချုပ်နဲ့ ရဲဘော် ပလာတူး ပျောက်ဆုံးနေတာဟာ အချိန် နှစ်လကျော် ကာလရှိလာပြီဖြစ်ပြီး တပ်ရင်း၊ တပ်ဖွဲ့တွေက အဖြစ်မှန်ကို ဖြေရှင်းပေးဖို့ တောင်းဆိုထားတာဟာလည်း တလ နီးပါးကြာမြင့်လာခဲ့ပြီဖြစ်ပေမယ့် MOD ၊ KNU/KNLA တွေဘက်က ထူးခြားတဲ့ တုန့်ပြန်မှု မရှိသေးပါဘူး။
KNU/KNLA ကို DNA က ဆက်သွယ် မေးမြန်းခဲ့ပေမယ့်လည်း ယခုအချိန်ထိ ပြန်လည်ဖြေကြားခြင်း မရှိသေးပါဘူး။