ကုလသမဂ္ဂ အမျိုးသမီးများအဖွဲ့ရဲ့ အဆိုအရ တောင်အာဖရိကဟာ ကမ္ဘာပေါ်မှာ ကျား၊ မ အကြမ်းဖက်မှု အမြင့်ဆုံး ဖြစ်ပွားတဲ့ နိုင်ငံတွေအနက် တခုဖြစ်ပြီး အမျိုးသမီးတွေ အသတ်ခံရမှုနှုန်းမှာလည်း ကမ္ဘာ့ ပျမ်းမျှနှုန်းထက် ငါးဆ ပိုမိုမြင့်မားနေပါတယ်။
၂၁၊ နိုဝင်ဘာ။
တောင်အာဖရိကနိုင်ငံမှာ အမျိုးသမီးတွေ တိုက်ခိုက်ခံရမှုဟာ ပုံမှန်ဖြစ်စဉ်တခုလို ဖြစ်လာနေတဲ့အတွက် ကျား၊ မ အခြေပြု အကြမ်းဖက်မှုကို နိုင်ငံတော်အဆင့် အန္တရာယ်ကပ်ဘေးတစ်ခုအဖြစ် သတ်မှတ်ကြေညာပေးဖို့အတွက် တနိုင်ငံလုံးအတိုင်းအတာနဲ့ ဆန္ဒပြကြဖို့ အမျိုးသမီးအခွင့်အရေးဆိုင်ရာ အဖွဲ့အစည်းတွေက တောင်းဆိုလိုက်ပါတယ်။
အဆိုပါ လှုပ်ရှားမှုဟာ လူမှုကွန်ရက်စာမျက်နှာတွေပေါ် စတင်ပျံ့နှံခဲ့ပြီး ဂျိုဟန်နက်စ်ဘတ်မြို့မှာ ကျင်းပမယ့် G20 ထိပ်သီးအစည်းအဝေး မတိုင်မီ သောကြာနေ့မှာ တနိုင်ငံလုံးအတိုင်းအတာနဲ့ သပိတ်မှောက်ပြီး အရှိန်မြင့်တင်သွားမှာ ဖြစ်ပါတယ်။
နာမည်ကျော် အနုပညာရှင်တွေ၊ ပြည်သူလူထုနဲ့ နိုင်ငံတကာက မိတ်ဖက်တွေက သူတို့ရဲ့ လူမှုကွန်ရက် ပရိုဖိုင်ပုံတွေကို ကျား၊ မ အခြေပြု အကြမ်းဖက်မှုနဲ့ သက်ဆိုင်တဲ့ အသိပညာပေးမှုအတွက် ဆက်စပ်တဲ့ ခရမ်းရောင်ပုံအဖြစ် ပြောင်းလဲမှုနဲ့အတူ သူတို့ရဲ့ တသားတည်းရှိမှုကို ပြုသခဲ့ကြပါတယ်။
ကုလသမဂ္ဂ အမျိုးသမီးများအဖွဲ့ရဲ့ အဆိုအရ တောင်အာဖရိကဟာ ကမ္ဘာပေါ်မှာ ကျား၊ မ အကြမ်းဖက်မှု အမြင့်ဆုံး ဖြစ်ပွားတဲ့ နိုင်ငံတွေအနက် တခုဖြစ်ပြီး အမျိုးသမီးတွေ အသတ်ခံရမှုနှုန်းမှာလည်း ကမ္ဘာ့ ပျမ်းမျှနှုန်းထက် ငါးဆ ပိုမိုမြင့်မားနေပါတယ်။ တောင်အာဖရိက မှုခင်းဆိုင်ရာ စာရင်းအင်းတွေအရ အခုနှစ် ဇန်နဝါရီလကနေ မတ်လအတွင်း အမျိုးသမီး ၁၃၇ ဦး အသတ်ခံခဲ့ရပြီး ၁,၀၀၀ ကျော် မုဒိမ်းကျင့်ခံခဲ့ရကြောင်း သိရှိရပါတယ်။
ဒီကနေ့ နိုဝင်ဘာ ၂၁ရက်နေ့မှာ အမျိုးသမီးတွေဟာ ကျောင်းမသွား၊ အလုပ်မသွားကြပဲ နိုင်ငံတွင်း အသတ်ခံခဲ့ရတဲ့ အမျိုးသမီးတွေကို ဂုဏ်ပြုတဲ့အနေနဲ့ ဒေသစံတော်ချိန် နေ့လယ် ၁၂ နာရီမှာ ၁၅ မိနစ်ကြာ လှဲလျောင်းငြိမ်သက်နေကြဖို့ တိုက်တွန်းထားပါတယ်။
ဒါ့အပြင် “ဝမ်းနည်းခြင်းနဲ့ တော်လှန်ခြင်း” အထိမ်းအမှတ်အဖြစ် အနက်ရောင် ဝတ်ဆင်ကြဖို့လည်း တိုက်တွန်းထားပါတယ်။
“G20 အမျိုးသမီးတွေရဲ့ သပိတ်မှောက်လှုပ်ရှားမှု”လို့ အမည်ပေးထားတဲ့ အဆိုပါ ဆန္ဒပြပွဲကို အွန်လိုင်းလှုပ်ရှားမှုတွေမှာ ဦးဆောင်နေတဲ့ Women for Change အဖွဲ့က စီစဉ်တာဖြစ်ပါတယ်။
အဆိုပါ ကပ်ဘေးကို အစိုးရအနေနဲ့ တင်းတင်းကျပ်ကျပ် ကိုင်တွယ်ဆောင်ရွက်ပေးဖို့ တောင်းဆိုထားတဲ့ အွန်လိုင်းလှုပ်ရှားမှုမှာလည်း လူဦးရေ တစ်သန်းကျော် ပါဝင်လက်မှတ်ရေးထိုးခဲ့ကြပါတယ်။
ဒါပေမဲ့ အမျိုးသား သဘာဝဘေးအန္တရာယ် စီမံခန့်ခွဲမှုစင်တာ (NDMC) ကတော့ ကျား၊ မ အခြေပြု အကြမ်းဖက်မှုကို နိုင်ငံ့အန္တရာယ်ကပ်ဘေးအဖြစ် ကြေညာဖို့ တောင်းဆိုမှုတွေဟာ ဥပဒေအရ သတ်မှတ်ချက်တွေနဲ့ ကိုက်ညီမှု မရှိဘူးလို့ဆိုပြီး ပယ်ချခဲ့ပါတယ်။
Women for Change အဖွဲ့ရဲ့ ပြောရေးဆိုခွင့်ရှိသူ ကမ်မရွန်း ကဆမ်ဘာလာက နှစ်တွေတလျှောက် အဆိုပါ ပြဿနာကို ဖြေရှင်းဖို့ အလွန်ကောင်းမွန်တဲ့ ဥပဒေနဲ့ လုပ်ထုံးလုပ်နည်းတွေ အများအပြား ပြဋ္ဌာန်းခဲ့ပေမဲ့ အစိုးရဘက်က လက်တွေ့အကောင်အထည်ဖော်မှုနဲ့ ပွင့်လင်းမြင်သာမှု အားနည်းခဲ့တယ်လို့ ဆိုထားပါတယ်။
“ကျွန်မတို့ဟာ အကြမ်းဖက်မှုကို ကျွန်မတို့ရဲ့ ယဉ်ကျေးမှုနဲ့ လူမှုစံနှုန်းတွေထဲမှာ ပေါင်းစပ်ထည့်သွင်းမိသလို ဖြစ်နေပါပြီ”လို့ သူက ဘီဘီစီသတင်းဌာနကို ပြောပါတယ်။
“အစိုးရကသာ ဒီကိစ္စကို တကယ်တမ်း ထိထိရောက်ရောက် တုံ့ပြန်မယ်ဆိုရင် မြေပြင်မှာလည်း အပြောင်းအလဲတွေကို မြင်တွေ့လာရလိမ့်မယ်လို့ ကျွန်မ ယုံကြည်ပါတယ်။ ဘာလို့လဲဆိုတော့ နိုင်ငံက ဘယ်လိုတုံ့ပြန်ရမယ်ဆိုတဲ့ စံနမူနာနဲ့ အသံကို အစိုးရကပဲ သတ်မှတ်ပေးလို့ပါ”လို့ သူက မှတ်ချက်ပြုခဲ့ပါတယ်။
Ref – BBC