“တချို့ပွဲတွေမှာကျတော့ အလှူရှင်က တောင်းဆိုလို့ လုပ်ပေးရတာမျိုး ရှိနိုင်တယ်။ ဒါမျိုး ဆိုရင်လည်း အတတ်နိုင်ဆုံး ထိန်းထိန်းသိမ်းသိမ်း လုပ်ဖို့နဲ့ ဖျော်ဖြေပွဲကို ဒေဝါပုဂ္ဂိုလ်များရှေ့မှာ ကန့်လန်ကာ ကာပြီးလုပ်စေချင်တယ် ”
၂၁၊နိုဝင်ဘာလ။
ဧရာဝတီတိုင်းအတွင်းက ရိုးရာနတ်ဒေဝါ ပူဇော်ပသပွဲ (နတ်ပွဲ)တွေမှာ မြန်မာ့ရိုးရာနဲ့မညီပဲ သရုပ်ပျက် ဝတ်စားဆင်ယင်မှုတွေနဲ့ ဖျော်ဖြေမှုတွေရှိနေတယ်လို့ ဧရာဝတီတိုင်း ဒေဝါစည်းကမ်း ထိန်းသိမ်းရေးကော်မတီ ဖွဲ့စည်းတဲ့ အခမ်းအနားမှာ ထုတ်ပြောခဲ့ပြီး ဒီအခြေအနေတွေကို ထိန်းသိမ်းကြဖို့ သတိပေးခဲ့ပါတယ်။
“ဧရာဝတီတိုင်းမှာ ကျွန်တော်တို့ဆီမှာ စာရင်းရောက်တဲ့ထဲမှာဆို ဟင်္သာတအပိုင်ထဲမှာ သရုပ်ပျက် ဝတ်စားပြီး ဖျော်ဖြေနေတာတွေ ဒါတွေကို ကျွန်တော်တို့ ခွင့်မပြုထားဘူး။ ကျွန်တော်တို့ စည်းကမ်းတွေကို ဖောက်ဖျက်ရင်တော့ အရေးယူလို့မရပေမယ့်။ ကျွန်တော်တို့ အထက်က အဆင့်ဆင့်နဲ့ ဖမ်းလို့ အရေးယူလို့ရတဲ့ဆီ ရောက်သွားရင် ကျွန်တော်တို့လည်း ဘာမှကူညီပေးလို့မရပါဘူး ” လို့ ဗဟို ကော်မတီက အမည်မဖော်လိုသူ တာဝန်ရှိသူ တဦးက DNA ကို ရှင်းပြပါတယ်။
မနေ့က နိုဝင်ဘာ ၂၀ ရက်နေ့မှာ မြန်မာနိုင်ငံဒေဝါပညာရှင်များ စည်းကမ်းထိန်းသိမ်းရေး ကော်မတီ-ဗဟိုက ဦးစီးပြီး ဧရာဝတီတိုင်း ဒေဝါစည်းကမ်း ထိန်းသိမ်းရေးကော်မတီကို ပုသိမ်မြို့မှာ ဖွဲ့စည်းခဲ့တာ ဖြစ်ပါတယ်။ ဒီအခြေအနေတွေကို ဝန်ကြီးဌာနဘက်ကနေ အရေးယူမှုတွေ လုပ်လာရင် ပိုဆိုးတဲ့ အကျိုးဆက်တွေ ရှိလာနိုင်တယ်လို့လည်း ဗဟိုကော်မတီ တာဝန်ရှိသူက ပြောပါတယ်။
မြန်မာနိုင်ငံဒေဝါပညာရှင်များ စည်းကမ်းထိန်းသိမ်းရေး ကော်မတီ-ဗဟိုကို ပြီးခဲ့တဲ့ ၂၀၂၅ ခုနှစ် မတ်လက ပြန်လည်ဖွဲ့စည်းခဲ့ပြီး ဒေဝါသဘင် ပညာရှင်( ရိုးရာနတ်ဒေဝါ ပူဇော်ပွဲ ဦးဆောင်သူ) တွေလိုက်နာရမယ့် စည်းကမ်း ၁၅ ချက်နဲ့ ဒေဝါဆိုင်းပညာရှင်တွေ လိုက်နာရမယ့် အချက် ၅ ချက်ကို ထုတ်ပြန်ခဲ့ပါတယ်။
ဒီအချက်တွေထဲက နံပါတ် ၁၁ ဖြစ်တဲ့ ဒေဝါသဘင်ပွဲ ပြီးဆုံး၍ ဖျော်ဖြေရေး အစီအစဉ်တွင် မြန်မာ့ရိုးရာ ယဉ်ကျေးမှုနှင့် ဆန့်ကျင်သော သရုပ်ပျက် ဝတ်စားဆင်ယင် ကပြဖျော်ဖြေ တီးမှုတ်မှုများကို လုံးဝ (လုံးဝ) မပြုလုပ်ရလို့ ပါရှိပါတယ်။
“ တချို့ပွဲတွေမှာကျတော့ အလှူရှင်ကတောင်းဆိုလို့ လုပ်ပေးရတာမျိုးရှိနိုင်တယ်။ ဒါမျိုးဆိုရင်လည်း အတတ်နိုင်ဆုံး ထိန်းထိန်းသိမ်းသိမ်း လုပ်ဖို့နဲ့ ဖျော်ဖြေပွဲကို ဒေဝါပုဂ္ဂိုလ်များရှေ့မှာ ကန့်လန်ကာ ကာပြီးလုပ်စေချင်တယ် ” လို့ အထက်ပါ တာဝန်ရှိသူက ဆိုပါတယ်။
ဒီစည်းကမ်းချက် ၁၅ ချက်ဟာ ကိုးကွယ်ယုံကြည်မှုနဲ့ ဆက်နွယ်နေတဲ့ ဓာတ်ပိုင်းဆိုင်ရာ၊ နတ်ပိုင်းဆိုင်ရာ၊ သိုက်ပိုင်းဆိုင်ရာ၊ အကြားအမြင်ဆိုင်ရာ ပူဇော်ပသ ချော့ကန်တော့ခြင်းတွေ အားလုံးနဲ့ အကျုံးဝင်တယ်လို့ စည်းကမ်းချက်ထဲမှာ ဖော်ပြထားပါတယ်။
ဒါအပြင် ဒေဝါသဘင် တည်ထောင်သူဟာ နတ်သမားစဉ်ကို ကုန်စင်ပြီးမြောက်ဖို့ လိုအပ်ပြီး ယစ်ပူဇော်ပွဲလိုမျိုး တိရိစ္ဆာန်အရှင်တွေကို ပူဇော်ပသခြင်းမပြုဖို့၊ ဗလိနတ်စာပူဇော်ခြင်းကို အကြောင်းပြပြီး အရက်၊ ဘီယာ လွန်ကျူးစွာသောက်စား မူးယစ် ရမ်းကားခြင်းတွေ မပြုလုပ်ဖို့ကိုလည်း တင်းကြပ်စွာ တားမြစ်ထားပါတယ်။
“ နတ်ကနားပွဲတွေဆိုတာက ကျွန်မတို့အတွက်တော့ ပျော်စရာတခု ပွဲတခုဆိုပေမယ့် နတ်ဝင်တယ်ဆိုပြီး မူးရူးပြီး အဆဲခံနေရတာကိုတော့ နည်းနည်းတမျိုးပဲ။ ဒါပေမယ့် ဒါရိုးရာဆိုတော့ ရိုးရာအတိုင်းပဲ လက်ခံထားပါတယ်။ ကျွန်မတို့ဘက်မှာတော့ မိဆိုင် ဖဆိုင်ဆိုတာကနေ ဘယ်နှနှစ်နေရင် နတ်ကနားပေးရမယ်ဆိုတာမျိုးထိ နတ်ယုံကြည်မှုတွေ ရှိကြတယ် ” လို့ ဇလွန်မြို့နယ်မှာနေထိုင်တဲ့ မတင်မော်ထွေးက ဆိုပါတယ်။
ဧရာဝတီတိုင်းဒေသကြီး ဒေဝါစည်းကမ်းထိန်းသိမ်းရေးကော်မတီ – ဗဟိုရဲ့ လူမှုကွန်ရက် စာမျက်နှာမှာ စည်းကမ်းချက်တွေကို ဖော်ပြထားပြီး စည်းကမ်းနဲ့ပတ်သက်တဲ့ မရှင်းလင်းတဲ့အချက်တချို့ကို ဒေဝါပညာရှင်တွေက မေးခွန်းထုတ်ထားပေမယ့် လူမှုကွန်ရက်ပေါ်မှာ ပြန်လည်ဖြေရှင်းထားတာမျိုး မတွေ့ရသလို DNA က မေးခွန်းပို့ မေးမြန်းခဲ့ပေမယ့် ပြန်လည်ဖြေကြားခြင်း မရှိခဲ့ပါဘူး။