DKBA ဟာသူတို့ရဲ့ ထိန်းချုပ်နေမြေကနေ အမေရိကန်နိုင်ငံသားတွေကို ပစ်မှတ်ထားတဲ့ ဆိုက်ဘာငွေလိမ်လည်မှု လုပ်ငန်းတွေကို အားပေးကူညီခဲ့တယ်လို့ စွပ်စွဲထားပါတယ်။
၁၃၊ နိုဝင်ဘာ။
မြန်မာနိုင်ငံက တိုးတက်သော ဗုဒ္ဓဘာသာ ကရင်အမျိုးသား တပ်မတော် DKBA အပေါ် ပိတ်ဆို့အရေးယူမှုတွေ ချမှတ်ကြောင်း အမေရိကန်အစိုးရက မနေ့က နိုဝင်ဘာလ ၁၂ရက်နေ့မှာ ထုတ်ပြန်လိုက်ပါတယ်။
အဆိုပါလက်နက်ကိုင်အဖွဲ့ဟာ သူတို့ရဲ့ ထိန်းချုပ်နေမြေကနေ အမေရိကန်နိုင်ငံသားတွေကို ပစ်မှတ်ထားတဲ့ ဆိုက်ဘာငွေလိမ်လည်မှု လုပ်ငန်းတွေကို အားပေးကူညီခဲ့တယ်လို့ စွပ်စွဲထားပါတယ်။
မကြာသေးမီနှစ်တွေအတွင်း အရှေ့တောင်အာရှတစ်လွှားမှာရှိတဲ့ ရာဇဝတ်ဂိုဏ်းတွေဟာ လူပေါင်း သိန်းနဲ့ချီကို လူကုန်ကူးခဲ့ပြီး မြန်မာပြည်တွင်းက အွန်လိုင်း ငွေလိမ်စင်တာတွေမှာ အဓမ္မစေခိုင်းမှုတွေ ပြုလုပ်ခဲ့တယ်လို့ ဆိုပါတယ်။
ကျားဖြန့်လို့ လူသိများတဲ့ အွန်လိုင်းကနေ ငွေလိမ်လည်မှုစင်တာတွေနဲ့ ပတ်သတ်ပြီးDKBA နဲ့ အဖွဲ့ ခေါင်းဆောင်လေးဦးအပြင် ထိုင်းနိုင်ငံသား ချာမူဆာဝမ်၊ Trans Asia International Holding Group Thailand Company ကုမ္ပဏီနဲ့ Troth Star Company ကုမ္ပဏီတို့ ပါဝင်နေပါတယ်။
သူတို့ဟာ မြန်မာနိုင်ငံက လက်နက်ကိုင်အဖွဲ့တွေနဲ့ တရုတ်ရာဇဝတ်ဂိုဏ်းကြီးတွေကြားမှာ ဆက်သွယ်ပေးတဲ့ ကွင်းဆက်အဖြစ် လုပ်ကိုင်နေတဲ့အပြင် DKBA နဲ့ တခြားဒေသခံ လက်နက်ကိုင်အဖွဲ့တွေကို ငွေလိမ်လည်မှုစင်တာတွေ တည်ဆောက်ဖို့ ကူညီပေးနေတယ်လို့ စွပ်စွဲထားပါတယ်။
အကြမ်းဖက်မှုနဲ့ ငွေကြေးထောက်လှမ်းရေးဆိုင်ရာ လက်ထောက်အတွင်းဝန် ဂျွန်ဟာလေက “မြန်မာနိုင်ငံကနေ လှုပ်ရှားနေတဲ့ ရာဇဝတ်ကွန်ရက်တွေဟာ အွန်လိုင်းငွေလိမ်လည်မှုတွေကနေ တဆင့် ကြိုးစားပမ်းစား အလုပ်လုပ်နေတဲ့ အမေရိကန်နိုင်ငံသားတွေဆီကနေ ဒေါ်လာဘီလီယံပေါင်းများစွာ ခိုးယူနေကြပါတယ်”လို့ ပြောခဲ့ပါတယ်။
“ဒီကွန်ရက်တွေက လူတွေကို လူကုန်ကူးပြီး မြန်မာနိုင်ငံရဲ့ ရက်စက်ကြမ်းကြုတ်တဲ့ ပြည်တွင်းစစ်ကို ပိုမိုပြင်းထန်လာအောင် အားပေးကူညီနေပါတယ်။ အစိုးရအနေနဲ့ ဒီဆိုက်ဘာရာဇဝတ်သားတွေကို သူတို့ ဘယ်နေရာမှာ လှုပ်ရှားနေပါစေ၊ လိုက်လံနှိမ်နင်းဖို့နဲ့ အမေရိကန်မိသားစုတွေကို သူတို့ရဲ့ အမြတ်ထုတ်မှုကနေ ကာကွယ်ဖို့ ကျွန်တော်တို့မှာရှိတဲ့ နည်းလမ်းအားလုံးကို ဆက်လက်အသုံးပြုသွားမှာပါ”လို့ သူက ဆက်ပြောပါတယ်။
လက်ရှိမှာတော့ အမေရိကန်အစိုးရက အရှေ့တောင်အာရှမှာရှိတဲ့ အမေရိကန်တွေကို လိမ်လည်နေတဲ့ အွန်လိုင်းငွေလိမ်လည်မှုဂိုဏ်းတွေရဲ့ ဌာနချုပ်နေရာတွေကို ပစ်မှတ်ထား တိုက်ခိုက်ဖို့ အထူးအဖွဲ့တစ်ဖွဲ့ကို ဖွဲ့နေတယ်လို့ သိရပါတယ်။
ဘဏ္ဍာရေးဝန်ကြီးဌာနရဲ့ ငွေလိမ်လည်မှုစင်တာတိုက်ခိုက်ရေးအဖွဲ့အတွင်း တရားရေးဝန်ကြီးဌာန၊ လျှို့ဝှက်အဖွဲ့၊ နိုင်ငံခြားရေးဝန်ကြီးဌာနနဲ့ FBI က အေးဂျင့်တွေနဲ့ ရှေ့နေတွေ ပါဝင်မယ်လို့ အသိပေးထားပါတယ်။
အဆိုပါ အဖွဲ့ဟာ မြန်မာ၊ ကမ္ဘောဒီးယားနဲ့ လာအိုနိုင်ငံတို့ကို အဓိကထားပြီး အဆိုးရွားဆုံး အရှေ့တောင်အာရှ ငွေလိမ်လည်မှုစင်တာတွေနဲ့ သူတို့ရဲ့ ခေါင်းဆောင်တွေကို စုံစမ်းစစ်ဆေးတာတွေ၊ ရပ်တန့်အောင်လုပ်တာတွေနဲ့ တရားဥပဒေအရ အရေးယူတာတွေ ဆောင်ရွက်သွားမှာ ဖြစ်ပါတယ်။
Ref – Reuters