တွက်ချေကိုက် ထွက်နိုင်ဖို့ဆို အရင်ကတော့ သွင်းအားစုကို ဖိသုံးလို့ရတာပေါ့ ခုက သွင်းအားစုဈေးက မိုးပေါ်မှာ စပါးဈေး၊ ပဲဈေးက အဝီစိ ရောက်နေပြီ။ ဒီတိုင်းဆို ငတ်ရုံပဲ
၃၊ နိုဝင်ဘာလ။
ဆောင်းဦးကာလမှာ မိုးဆက်တိုက် ရွာနေတဲ့အတွက် မိုးစပါးတွေ ထိခိုက်ပျက်ဆီးမှု ရှိနေပြီး ဆောင်းသီးနှံတွေ မစိုက်နိုင်သေးတဲ့အပြင် ဈေးကွက်ပါ ကျဆင်းပြီး ဝယ်မယ့်သူမရှိနေတဲ့ အခြေအနေကို ရင်ဆိုင်နေကြရပါတယ်။
“ဈေးဆွဲတင်ပေးဖို့တော့ ကျွန်တော်တို့ အဖွဲ့ချုပ်ကို စာတင်ဖို့စိစဉ်နေပါတယ်။ ဒီတိုင်းသွားနေရင် ဧရာက လယ်သမားတွေ လယ်စိုက်ရင်း အငတ်ဘေးဆိုက်မယ့် အနေအထားဖြစ်နေပြီ ”လို့ ကျုံပျော်မြို့နယ်က လယ်သမားရေး ကူညီဆောင်ရွက်ပေးနေသူ တဦးက ပြောပါတယ်။
လက်ရှိအချိန်ဟာ သက်နု မိုးစပါးတွေ ရိတ်သိမ်းပြီးစနဲ့ နောက်ကျ စပါးတွေ ရိတ်ဖို့ပြင်ဆင်နေချိန်ဖြစ်ပြီး၊ တချို့ဒေသတွေမှာ ဆောင်းသီးနှံဖြစ်တဲ့ မတ်ပဲနဲ့ဆောင်းစပါးတွေ စိုက်ပျိုးရမယ့် အချိန်ဖြစ်ပါတယ်။
ဒါပေမယ့် မိုးရွာသွန်းမှုတွေဟာဆက်နေပြီး စပါးတွေကို နေလှန်းဖို့ခက်ခဲနေတာကြောင့် ရိတ်သိမ်းပြီးသား စပါးတွေဟာ အစိုအတိုင်းဖြစ်နေပြီး မနှစ်ကအထိ အပါးအစိုတွေကို အစိုဈေးပေးပြီးဝယ်တဲ့ ကုန်သည်တွေကအစ စပါးဈေးကျနေလို့ အဝယ်အေးနေတဲ့ အခြေအနေဖြစ်နေတယ်လို့ မော်လမြိုင်ကျွန်းမြို့နယ်က လယ်သမားအရေး လှုပ်ရှားသူတဦးက ရှင်းပြပါတယ်။
“ အခုက ပေါ်ဆန်းတွေလည်း မရိတ်ရသေးဘူး။ သက်နုစပါးတွေလည်း ပြန်စိုက်ရတော့ ခုမှရိတ်ဖို့ပြင်ကြတုန်း။ မိုးက နိုဝင်ဘာလကုန်ပြီးရင်လည်း ရွာဦးမယ်ဆိုရင်မှာ အပူပေါ် အပူဆင့်ပါပဲ ” လို့ သူက ဆိုပါတယ်။
မြန်မာနိုင်ငံ မိုးဇလနဲ့ မိုးဇလ ကျွမ်းကျင်သူတွေရဲ့ မိုးရွာသွန်းနိုင်မှု ခန့်မှန်းချက်တွေကြောင့် မိုးလွတ်ချိန်တွေမှာ လယ်သိမ်း၊ လယ်စဖို့ ကြိုးစားကြပေမယ့် လုပ်သားလိုအပ်ချက်နဲ့ စက်ပစ္စည်းလိုအပ်ချက်တွေကြောင့် အချိန်မီ ပြီးစီးအောင် မလုပ်နိုင်ကြတာ ဖြစ်တယ်လို့ လယ်သမားတွေနဲ့ လယ်သမားအရေး ဆောင်ရွက်နေကြသူတွေက ရှင်းပြကြပါတယ်။
လက်ရှိမှာလည်း မြေနိမ့်ပိုင်းမှာရှိနေတဲ့ မရိတ်သိမ်းရသေးတဲ့ စပါးခင်းတွေ ရေမြုပ်ကုန်ပြီး ဒီအတိုင်းသာ ရက်သတ္တပတ် နှစ်ပတ်ထိ ဖြစ်နေမယ်ဆိုရင် စပါးပင်တွေ အလုံးစုံ ပျက်ဆီးသွားနိုင်သလို မိုးလွတ်ပြီဆိုပြီး ပဲကျဲထားတဲ့လယ်တွေမှာလည်း မိုးမိတာကြောင့် ပျက်ဆီးနိုင်ချေမြင့်တယ်လို့ သူတို့က ဆိုကြပါတယ်။
“ ကျွန်တော်တို့က လယ်မစိုက်တော့ ဘာလုပ်ရမလဲ။ စိုက်ပြန်တော့လည်း ရာသီဥတုအခြေအနေက ခက်ပြန်ရော။ တွက်ချေကိုက် ထွက်နိုင်ဖို့ဆို အရင်ကတော့ သွင်းအားစုကို ဖိသုံးလို့ရတာပေါ့ ခုက သွင်းအားစုဈေးက မိုးပေါ်မှာ စပါးဈေး၊ ပဲဈေးက အဝီစိ ရောက်နေပြီ။ ဒီတိုင်းဆို ငတ်ရုံပဲ ” လို့ မြောင်းမြက လယ်သမားဖြစ်သူ ကိုမျိုးမြင့်က ပြောပါတယ်။
လက်ရှိမှာ စပါးဈေးဟာ ၉ သိန်းဝန်းကျင်သာရှိပြီး ပဲဈေးဟာ ၈ သိန်းဝန်းကျင်သာရှိပါတယ်။ ဒီဈေးနူန်းဟာ အရည်အသွေးပြည့်မှီတဲ့ စပါးနဲ့ ပဲတွေသာရတဲ့ ဈေးနူန်းဖြစ်ပြီး အရည်အသွေးမမှီရင် ရောင်းမထွက်နိုင်တဲ့ အခြေအနေ ဖြစ်နေတာပါ။
“ ကျွန်တော်တို့က စစ်လည်းဖြစ်မနေပဲနဲ့ ငြီးငြူပြရတာ အားနာပါတယ်။ ဒါပေမယ့် စစ်မဖြစ်ပဲနဲ့ကို ဒီအခြေအနေကို ဆိုက်လာနေတာပါ ” လို့ ကျုံပျော်မြို့နယ်က လယ်သမားရေး ကူညီဆောင်ရွက်ပေးနေသူက ဆိုပါတယ်။
ဆောင်းသီးနှံတွေကို နိုဝင်ဘာလကုန် နောက်ဆုံးထားပြီး မစိုက်ပျိုးနိုင်ရင် အရည်အသွေးပြည့်မှီတဲ့ ထွက်ကုန်တွေရနိုင်ဖို့ မသေချာဘူးလို့လည်း လယ်သမားတွေက ဆိုပါတယ်။
မိုးဇလ ကျွမ်းကျင်ပညာရှင်တွေကတော့ ယခုတပတ်အတွင်းမှာ ဧရာဝတီတိုင်းတခုလုံး မိုးရွာဖို့ရှိနေပြီး နိုဝင်ဘာလကုန်ဝန်းကျင်မှာလည်း လာနီညာ အစွန်းရောက် ရာသီဥတုဖြစ်စဉ်ကြောင့် မိုးရွာသွန်းနိုင်ချေ ရှိတယ်လို့ ခန့်မှန်းထားကြပါတယ်။
ဒီမိုးလေဝသ ခန့်မှန်းချက်တွေဟာ ဧရာဝတီတိုင်းက တောင်သူလယ်သမားတွေအတွက် အများကြီး အကျိုးရှိပေမယ့် ဒေသအခြေအနေတွေဟာ ရာသီဥတုကို တွက်ချက်ပြီး အလုပ်လုပ်နိုင်တဲ့ လူအင်အား၊ ငွေအင်အား၊ စက်အင်အား မရှိတာကြောင့် ဒီလို ဆုံးရှုံးမှုတွေ ဖြစ်ရတာ ဖြစ်တယ်လို့ ဆိုကြပါတယ်။
“ အခုကတော့ စပါးထွက်လာရင် ဝယ်မယ့်သူရှိဖို့ ဆုတောင်း မျှော်လင့်နေရုံပဲပေါ့။ ကျွန်တော်တို့က လယ်သမားပါ၊ လယ်ပဲစိုက်ချင်တယ်။ လယ်ကို စိတ်အေးလက်အေး အရည်အသွေးမှီမှီ စိုက်ပျိုးနိုင်အောင် ပံ့ပိုးပေးမယ့် အစိုးရမျိုးလိုချင်တယ် ” လို့ ကိုမျိုးမြင့်က ပြောပါတယ်။
လက်ရှိမှာတော့ ဧရာဝတီတိုင်းကနေ ရွေးကောက်ပွဲဝင်ကြမယ့် ကြံ့ခိုင်ရေးပါတီက ဝန်ကြီးချုပ်တွေ၊ ဝန်ကြီးတွေက သူတို့ရဲ့ လုပ်ပိုင်ခွင့်တွေကို အသုံးချပြီး မျက်စိခွဲ၊ လမ်းခင်း၊ မှတ်ပုံတင်လုပ် စတာတွေနဲ့ ဧရာဝတီလူထုကို စည်းရုံးနိုင်ဖို့ ကြိုးစားနေပေမယ့် လယ်ယာလုပ်ငန်းနဲ့ ပတ်သက်တဲ့ ကိစ္စရပ်တွေကိုတော့ လစ်လျူရှု့ထားဆဲ ဖြစ်ပါတယ်။