၃၁၊ဩဂုတ်လ။
လက်ရှိကာလတော်လှန်ရေးအခြေအနေနဲ့ပတ်သတ် လို့ အထွေထွေ သပိတ် ပေါင်းစပ်ညှိနှိုင်းရေး အင် အားစု (GSCB)ကနိုင်ငံရေးသဘောထားရပ်တည် ချက်တခုကိုသြဂုတ်လ၂၄ရက်စွဲနဲ့ အသိပေးထုတ် ပြန်ခဲ့ပါတယ်။
ဒါနဲ့ပတ်သတ်လို့ အသေးစိတ်အချက်အလက်တွေကို DNAက GSCBရဲ့ပြောရေးဆိုခွင့်ရှိသူတဦးဖြစ်တဲ့ ကိုနန်းလင်းနဲ့သီးသန့်ဆက်သွယ်မေးမြန်းမှုကိုဖော်ပြလိုက်ပါတယ်။
“အမျိုးသား ညီညွတ်ရေးအစိုးရကို ကျွန်တော်တို့ ပြောင်းလဲရမယ်။ အရင်ဆုံး သူ့ရဲ့ အတွင်းပိုင်းဆိုင်ရာ ပြုပြင်ပြောင်းလဲရမယ်။ ပြီးသွားရင်တော့ ကျွန်တော်တို့ မဟာမိတ်တွေ တိုင်းရင်းသား အင်အားစုတွေ ERO တွေပါဝင်တဲ့ တပ်ပေါင်းစု အစိုးရတရပ် ကိုတော့ ခိုင်ခိုင်မာမာသွားရလိမ့်မယ်လို့ ကျွန်တော် တို့ ပြောချင်ပါတယ်။ တဖက်မှာလည်း အမျိုးသားညီညွတ်ရေး အတိုင်ပင်ခံကောင်စီသည် ဒါ ဖွဲ့စည်းခဲ့တာ လေးနှစ်ကျော် ကာလရှိလာပြီ ခုချိန်ထိတော့ တော်လှန်ရေးအပေါ်မှာ သူ့ရဲ့တာဝန်ဝတ္တရားတွေ ကျေပွန်နေတယ်လို့ ကျွန်တော်တို့ မမြင်ဘူး။
တကယ်တမ်း ကျွန်တော်တို့ အမျိုးသားညီညွတ်ရေး အတိုင်ပင်ခံကောင်စီမှာ ကျွန်တော်တို့သပိတ်အင်အားစုတွေလည်း ပါနေတယ်။ ဒီတော့ သပိတ် အင်အားစုတွေမှာလည်းတာဝန်ရှိတယ်လို့ကျွန်တော် တို့ ပြောတာဖြစ်ပါတယ်။ ဒီတော့ အမျိုးသားညီညွတ်တ်ရေး အတိုင်ပင်ခံကောင်စီဟာ ဒီထက်ပိုပြီးနိုင်ငံရေးအရ တာဝန်ကျေကျေပွန်ပွန် သူ့ရဲ့ တာဝန် ဝတ္တရားတွေ ဆောင်ရွက်နိုင်ဖို့လိုတယ်။ ပြီးခဲ့တဲ့ရက်ကပဲ သူတို့ရှေ့ဆက်သွားမယ့် နိုင်ငံရေး ရပ်တ ည်ချက် နိုင်ငံရေး လုပ်ငန်းစဉ်တွေ ထုတ်ပြန်ခဲ့တာရှိတယ်။ အဲ့ဒီရပ်တည်ချက် အဲ့ဒီလုပ်ငန်းစဉ်တွေကို တကယ်ပဲလုပ်နိုင်ဖို့လိုတယ်။”
၃၁၊သြဂုတ်။
▪️ မေး – နိုင်ငံရေး လုပ်ငန်းစဉ် ၄ ရပ် အကောင်အထည်ဖေါ်နိုင်ဖို့ လက်တွေ့ကျတဲ့ တပ်ပေါင်းစုတရပ်ကို စစ်တပ်ပြောတဲ့ ရွေးကောက်ပွဲကာလ မတိုင် မီ ဖွဲ့စည်းနိုင်ဖို့ ရှိမလား ။
ဖြေ – ကျွန်တော်တို့တင်ပြတဲ့ နိုင်ငံရေး လုပ်ငန်းစဉ် လေးရပ်သည် စစ်ကောင်စီ ရွေးကောက်ပွဲ လုပ်လုပ် မလုပ်လုပ် စစ်ကောင်စီရဲ့ အတုအယောင် ရွေးကောက်ပွဲ ဖြစ်ဖြစ် မဖြစ်ဖြစ် ကျွန်တော်တို့ တော်လှန်ရေး လမ်းကြောင်းအတွက် ကျွန်တော်တို့ တော်လှန်ရေးရဲ့ ခိုင်မာအားကောင်းမှုအတွက် လုပ်ကိုလုပ်ရမယ့် နိုင်ငံရေး လုပ်ငန်းစဉ်တွေ ဖြစ်တယ်လို့ ကျွန်တော်တို့ ဒီလိုပဲမြင်ပါတယ်။ ကျွန်တော်တို့ ဒီလိုပဲယုံကြည်ပါတယ်။
▪️ မေး – ဒါဆိုရင် တော်လှန်ရေး အင်အားစုတွေ မခိုင်မာသေးဘူးဆိုတဲ့ သဘောမျိုးလား။
ဖြေ – ဒီကာလမှာကျွန်တော်တို့ တော်လှန်ရေးရဲ့ ခေါင်းဆောင်မှုအား ကျနေလို့ ပြောရပါလိမ့်မယ်။ ဘာကြောင့်ကျရလဲဆိုတဲ့ အချက်အလက်တွေ များစွာရှိပါလိမ့်မယ်။ သို့သော် တော်လှန်ရေးမှာ ပါဝင် ဆောင်ရွက်နေတဲ့ ကျွန်တော်တို့မှာလည်း တာဝန်ရှိတယ်။ ကျွန်တော်တို့ ပြည်သူ့သပိတ် ပြည်သူ့စည်း ရုံးရေး အင်အားစုတွေမှာလည်း တာဝန်ရှိသလို လက်ရှိ ဒီခေါင်းဆောင်မှုမှုမှာ ပါဝင်ဆောင်ရွက်နေတဲ့ အစုအဖွဲ့တွေ လူပုဂ္ဂိုလ်တွေမှာလည်း တာဝန်ရှိတယ်လို့ ကျွန်တော်တို့ မြင်တယ်။
အဲ့ဒီတော့ ကျွန်တော်တို့ တော်လှန်ရေးလမ်းကြောင်း လမ်းစဉ် ခိုင်မာအားကောင်းဖို့အတွက်ဆိုရင်လက်ရှိ ရှိနေတဲ့ ခေါင်းဆောင်မှုနဲ့တော့ မလုံလောက်တော့ဘူး။ ဒီထက်ပိုပြီးအားကောင်းတဲ့ ဒီထက်ပိုပြီးအနှစ် သာရရှိတဲ့ စစ်မှန်တဲ့ ပြောင်းလဲမှုတွေ လုပ်ဆောင် ပြီး ရှေ့ဆက်ချီတက်မှရလိမ့်မယ်။
▪️ မေး – ဘာကနေစပြီး ပြောင်းလဲဖို့ လိုမယ်လို့ ထင်လဲ။
ဖြေ – ကျွန်တော်တို့ ပြောနေတာသည် အမျိုးသား ညီညွတ်ရေးအစိုးရကို ကျွန်တော်တို့ ပြောင်းလဲရမယ်။ အရင်ဆုံး သူ့ရဲ့ အတွင်းပိုင်းဆိုင်ရာ ပြုပြင် ပြောင်းလဲရမယ်။ ပြီးသွားရင်တော့ ကျွန်တော်တို့ မဟာမိတ်တွေ တိုင်းရင်းသား အင်အားစုတွေ ERO တွေပါဝင်တဲ့ တပ်ပေါင်းစု အစိုးရတရပ်ကိုတော့ ခိုင်ခိုင်မာမာသွားရလိမ့်မယ်လို့ ကျွန်တော်တို့ ပြောချင်ပါတယ်။ တဖက်မှာလည်း အမျိုးသားညီညွတ် ရေး အတိုင်ပင်ခံကောင်စီသည် ဒါ ဖွဲ့စည်းခဲ့တာ လေးနှစ်ကျော် ကာလရှိလာပြီ ခုချိန်ထိတော့ တော် လှန်ရေးအပေါ်မှာ သူ့ရဲ့တာဝန် ဝတ္တရားတွေ ကျေပွန်နေတယ်လို့ ကျွန်တော်တို့ မမြင်ဘူး။ တကယ်တမ်း ကျွန်တော်တို့ အမျိုးသားညီညွတ်ရေး အတိုင်ပင်ခံကောင်စီမှာ ကျွန်တော်တို့ သပိတ်အင်အားစုတွေလည်း ပါနေတယ်။ ဒီတော့ သပိတ်အင်အားစုတွေမှာလည်း တာဝန်ရှိတယ်လို့ ကျွန်တော်တို့ ပြောတာဖြစ်ပါတယ်။ ဒီတော့ အမျိုးသား ညီညွတ်တ်ရေး အတိုင်ပင်ခံကောင်စီဟာ ဒီထက်ပိုပြီးနိုင်ငံရေးအရ တာဝန်ကျေကျေပွန်ပွန် သူ့ရဲ့ တာဝန်ဝတ္တရားတွေ ဆောင်ရွက်နိုင်ဖို့လိုတယ်။ ပြီးခဲ့တဲ့ရက်ကပဲ သူတို့ရှေ့ဆက်သွားမယ့် နိုင်ငံရေး ရပ်တည်ချက် နိုင်ငံရေး လုပ်ငန်းစဉ်တွေ ထုတ်ပြန်ခဲ့တာရှိတယ်။ အဲ့ဒီရပ်တည်ချက် အဲ့ဒီလုပ်ငန်းစဉ်တွေကို တကယ်ပဲလုပ်နိုင်ဖို့လိုတယ်။
ကျွန်တော်တို့ တော်လှန်ရေး ခေါင်းဆောင်ပိုင်းမှာရှိနေတဲ့ အစုအဖွဲ့တွေရော မြေပြင်မှာရှိနေတဲ့ တော် လှန်ရေး အင်အားစု သပိတ်အင်အားစုလူထုစည်းရုံး ရေး အင်အားစုတွေရော ကိုယ့်ရဲ့ ပကတိအခြေအ နေကို အတိအကျ သုံးသပ်ပြီး ပြုပြင်ပြောင်းလဲမှုတွေကို ထိထိရောက်ရောက် ဆောင်ရွက်မှသာလျှင် ကျွန်တော်တို့ တော်လှန်ရေးရဲ့ ခိုင်မာအားကောင်းမှု တော်လှန်ရေးအပေါ်မှာ လူထုယုံကြည်မှုကဆက်ပြီး ရှိနေမှာ ဖြစ်တယ်လို့ ကျွန်တော်တို့ ယုံကြည်ပါတယ်။ ဒါကြောင့် ဒီတော်လှန်ရေးလုပ်ငန်းစဉ်တွေကို ချမှတ်ပြီးဆောင်ရွက်တာ ဖြစ်ပါတယ်။
▪️ မေး – ကိုနန်းလင်းတို့သပိတ် အင်အားစုတွေ အနေနဲ့ ရွေးကောက်ပွဲနဲ့ ပတ်သက်လို့ ဘာတွေလုပ်သွားဖို့ ရှိမလဲ။
ဖြေ – စစ်ကောင်စီက ပြုလုပ်မယ့်အတုအယောင်တရားမဝင်ရွေးကောက်ပွဲကို လူထုက လက်မခံဘူး။ လူထုက ဆန့်ကျင်တယ်ဆိုတဲ့အသံတွေ လူထုရဲ့ သဘောဆန္ဒတွေ ပိုပြီးထုတ်ဖော်နိုင်ဖို့ ကျွန်တော်တို့ လူထုသပိတ် အင်အားစုတွေက လှုံ့ဆော်စည်းရုံးသွားမယ် ပိုပြီးတော့ စနစ်တကျ စည်းရုံးသွားဖို့ ကျွန်တော်တို့ စဉ်းစားထားပါတယ်။
▪️ မေး – ကိုယ်တိုင်လည်း လူထုကြားမှာရှိနေတာဆိုတော့ ရွေးကောက်ပွဲနဲ့ပတ်သက်တဲ့ ပြည်သူ့သဘောထားက ဘယ်လိုရှိနေလဲ။ ဘယ်လိုသုံးသပ် ချင်လဲ။
ဖြေ – တကယ်လည်း လူထုက ဒီရွေးကောက်ပွဲကြီးကို လက်မခံဘူး ယုံလည်း ယုံမနေဘူးလို့ ကျွန်တော်တို့ထင်တယ်။
▪️မေး – ဒီရွေးကောက်ပွဲဟာ ထောင်ချောက်ဖြစ်တယ်လို့ ဆိုတဲ့အခါ ဘာကြောင့် ထောင်ချောက်လို့ ပြောရတာလဲဆိုတာကို ရှင်းပြပေးလို့ရမလား။
ဖြေ – တဖက်က စစ်ကောင်စီက လူထုကိုခက်ခဲအောင် ကြပ်တည်းအောင် တကယ့်ကို အထွေထွေ အကြပ်အတည်းဖြစ်အောင် စားဝတ်နေရေးတွေ ခက်ခဲကြပ်တည်းနေအောင် အသက်ရှုပေါက် လုံးဝမရှိရလေအောင် ပြင်းပြင်းထန်ထန် စစ်ဖိနပ်နဲ့ လည်မျိုကိုနင်းထားတယ်လို့ ပြောလို့ရတယ်။ ပြီးတော့သူက ဒီရွေးကောက်ပွဲပြီးရင် နည်းနည်းတော့အသက်ရှုချောင်သွားမှာပါဆိုပြီး တဖက်မှာလည်း ရွေးကောက်ပွဲနဲ့ လူထုကိုဖျားယောင်းပြီးတော့မှ ဒီရွေးကောက်ပွဲကြီးပြီးသွားရင်တော့ ထွက်ပေါက် တစုံတရာ ရမှာပါ။ အရင်ထက်စာရင်တော့ ပိုပြီး အသက်ရှုချောင်မှာပါဆိုတဲ့ သတင်းစကားတွေ ဝါဒဖြန့်ချီတာတွေကို တွေ့ရပါလိမ့်မယ်။ တကယ်တော့ ကျွန်တော်တို့ တောက်လျှောက် ပြောခဲ့သလိုပဲ။ ဒီရွေးကောက်ပွဲဟာတိုင်းပြည်အတွက် လုံးဝ ထွက် ပေါက်မဟုတ်ပါဘူး။ တိုင်းပြည်အတွက် လူထုအတွက် လုံးဝထွက်ပေါက်မဟုတ်ဘူး။ တကယ့်ကိုထောင်ချောက်ကြီးသာလျှင်ဖြစ်တယ်။ ဒီရွေးကောက်ပွဲပြီးသွားရင် အသက်ရှုချောင်လိမ့်မယ် အရင်ထက်စာရင်တော့ နေရထိုင်ရာ နည်းနည်းလေး နေသာထိုင်သာလေးရှိလာမယ် လူးလို့လွန့်လို့ရလာမယ်ဆိုတဲ့ သတင်းစကားတွေဟာ တကယ်တော့တိုင်းပြည်နဲ့ လူမျိုးကိုလိမ်လည်လှည့်ဖျားနေတဲ့ အန္တရာယ် တွင်းထဲကို တွန်းပို့နေတဲ့ သတင်းစကားတွေလို့ ကျွန်တော်ကတော့မြင်ပါတယ်။
▪️ မေး – ဘာကြောင့် ဒီလိုမျိုး ယူဆတာလဲ။ ပိုပြီးတိတိကျကျလေး ပြောပြပေးနိုင်မလား။
ဖြေ – ကျွန်တော်တို့ သမိုင်းစဉ်ကိုပဲ ပြန်ကြည့်ပါ၊ စစ်တပ်ကလုပ်ပေးလိုက်တဲ့ ရွေးကောက်ပွဲ ဘယ်နှခုကများ တိုင်းပြည်အတွက် ထွက်ပေါက်သဖွယ်ဖြစ်ခဲ့တဲ့ သမိုင်းကြောင်း အစဉ်အလာရှိပါသလဲ ၂၀၁၀ မှာရွေးကောက်ပွဲလုပ်တယ် သူတို့မကြိုက် လာတဲ့ အခြေအနေတခုမှာ အာဏာပြန်သိမ်းတယ်။ ၁၉၉၀ မှာရွေးကောက်ပွဲလုပ်တယ် အာဏာလွှဲမပေးဘူး။ ၁၉၆၀ မှာရွေးကောက်ပွဲလုပ်တယ် ၁၉၆၂ မှာ အာဏာပြန်သိမ်းတယ်။ စစ်တပ်ကနေပြီးတော့ ကြီးမှူးကျင်းပခဲ့တဲ့ ရွေးကောက်ပွဲ ဘယ်နှခုကများ တိုင်းပြည်အတွက်ထွက်ပေါက်သဖွယ်ဖြစ်ပြီးတော့ တိုင်းပြည်အတွက်ပိုကောင်းတယ်ဆိုတဲ့ သမိုင်းကြောင်းရှိပါသလဲ။ ရှိတယ်ဆိုရင် ကျွန်တော်တို့ကိုပြပါပေါ့နော်။ စစ်တပ်ဆိုတာ တကယ်တမ်းတော့ ဆိုရှယ်လစ်ခေတ်မှာ ဆိုရှယ်လစ်အနံ့ပေးပြီးတော့မှ သူ့ရဲအာဏာတည်မြဲရေးလုပ်တယ်။ ပါတီစုံဒီမိုကရေစီလို့ ရှစ်လေးလုံးအရေးတော်ပုံမှာ လူထုကကြွေးကြော် တဲ့အခါမှာပါတီစုံ ဒီမိုကရေစီ အယောင်ပြပြီး သူ့ရဲ့အာဏာတည်မြဲရေးလုပ်တယ်။ အခုဖက်ဒရယ်ဆိုတဲ့ အသံတွေကျယ်လောင်လာတဲ့ အခါမှာလည်း သူကလည်းဖက်ဒရယ်ပါပဲဆိုပြီးတော့ ဖက်ဒရယ် အယောင်ပြပြီးတော့ သူ့ရဲ့ အာဏာတည်မြဲရေးလုပ်နေတာပဲလို့ ကျွန်တော်တို့မြင်တယ် ဒီတော့ ဒီရွေးကောက်ပွဲဟာလည်း ရှင်းတယ်။ သူ့ရဲ့အာဏာတည်မြဲရေး သူတို့စစ်အုပ်စုရဲ့ တိုင်းပြည်ပေါ်မှာ စစ် ကျွန်ပြုဖို့အတွက် ကြိုးစားတဲ့လုပ်ငန်းစဉ်သာလျှင်ဖြစ်တယ်။ ဒါကြောင့် ကျွန်တော်တို့က လူထုကို ဒါဟာ ထွက်ပေါက်လုံးဝမဟုတ်ဘူး ထောင်ချောက်သာလျှင်ဖြစ်တယ်ဆိုတဲ့ သတင်းစကားကို ကျွန် တော်တို့ တောက်လျှောက်ပေးနေရတာ ဖြစ်ပါတယ်။
▪️ မေး – ဒီရွေးကောက်ပွဲနဲ့ပတ်သက်လို့ ဆန့်ကျင် ကြဆိုပြီး ပြောနေတာမျိုးအပြင် တော်လှန်ရေး အင်အားစုတွေဘက်က ဘယ်လိုမျိုး ထိရောက်တဲ့ တုန့်ပြန်မှုတွေ လုပ်လို့ရမလဲ။
ဖြေ – ကျွန်တော်တို့ တော်လှန်ရေးမှာ အားနည်းချက်တွေ အမှားတွေ စိန်ခေါ်မှုတွေရှိတယ်ဆိုတာ ကျွန် တော်တို့က ရဲရဲဝင့်ဝင့်လက်ခံဖို့လိုတယ်။ ကျွန် တော်တို့ တော်လှန်ရေးမှာ အမှားတွေ အားနည်းချက်တွေ မရှိပါဘူးဆိုရင်တော့ ဒါက ပကတိ အရှိတရားနဲ့ ကင်းကွာတာပဲ လက်တွေ့နဲ့ ကင်းကွာတာပဲ။ ဒီလိုမျိုး ကင်းကွာနေရင်တော့ ကျွန်တော်တို့တော်လှန်ရေး အတွက်ပိုပြီးတော့ ခက်ဖွယ်ဖြစ်နိုင်တယ်။ ဒီတော့ ကျွန်တော်တို့က ဒီအမှားတွေ ဒီအားနည်းချက်တွေကို မြန်မြန်ဆန်ဆန် သင်ယူပြီး မြန်မြန်ဆန်ဆန်ပြောင်းလဲပြီးတော့ ကျွန်တော်တို့ တော်လှန်ရေးရဲ့ ရည်မှန်းချက်တွေကို ဆက်ချီတက်နိုင်ဖို့ လိုတယ်လို့ ကျွန်တော့်တို့ မြင်တယ်။ ဆိုတော့ စစ်ကောင်စီရဲ့ ရွေးကောက်ပွဲကို တည်ပြီးတော့မှ ဆောင်ရွက် တာ ဒီဟာကြီးကို ကျွန်တော်တို့က စစ်ကောင်စီရွေးကောက်ပွဲကြောင့် ကျွန်တော်တို့ ဒီလိုမျိုးလုပ်တယ် ပြုတယ်ထက်စာရင် ကျွန်တော်တို့ တော်လှန်ရေးရဲ့ လက်ရှိ ပကတိတောင်းဆိုမှု အရကိုက ကျွန်တော် တို့ရဲ့ ခေါင်းဆောင်မှု ပြုပြင်ပြောင်းလဲဖို့ ကျွန်တော် တို့ တော်လှန်ရေး အင်အားစုတွေကြားထဲက သွေးစည်းမှု ညီညွတ်မှု ပိုပြီးတက်လာဖို့ ပိုပြီးရှိလာဖို့ ကျွန်တော်တို့ အဲ့ဒီနှစ်ခုရှိလာတယ်ဆို တဖက်ကလူထုစည်းရုံးရေးကလည်း ပိုပြီးတော့ အားကောင်းလာမယ်ဆိုတာကို ကျွန်တော်တို့မြင်ထားတယ်။
▪️ မေး – ဒီရွေးကောက်ပွဲက ဖြစ်လာနိုင်မယ်လို့ ထင်လား။
ဖြေ – သေချာတာကတော့ ဒီရွေးကောက်ပွဲဟာ စစ်ကောင်စီက လူထုကိုဓါးမိုး သေနတ်ထောက်ပြီးတော့ သူတို့ရဲ့ ထွက်ပေါက်အတွက်ကို အတင်းအကြပ် လူထုကို ဖိနှိပ်သတ်ဖြတ် တကယ့်ကို ယုတ် မာရမ်းကားမှုပေါင်းစုံနဲ့ ဒီရွေးကောက်ပွဲကို လုပ်မှာပဲ။ ကျွန်တော်တို့ဘက်ကလည်း ဒီရွေးကောက်ပွဲဟာ အဲ့ဒီလိုမျိုးလုပ်ခဲ့တယ် ဆိုတာကို လူထုကိုရော နိုင်ငံတကာကိုပါ အထင်ရှားဆုံး အရှင်းလင်းဆုံး တင်ပြပြီးတော့ ဒီဟာက အဖြေမဟုတ် ထွက်ပေါက်မဟုတ် တော်လှန်ရေး လမ်းကြောင်းလမ်းစဉ်သာလျှင် အဖြေဖြစ်တယ် ထွက်ပေါက်ဖြစ်တယ် ဒီတိုင်းပြည် နဲ့ ဒီလူထုအတွက် ပိုကောင်းတဲ့ အနာဂတ်နဲ့ ပိုကောင်းတဲ့ဘဝသစ်တွေကို ဖန်တီးနိုင်မယ်ဆိုတာကို ပြသနိုင်ဖို့အတွက် ကျွန်တော်တို့ ဒီထက်ပိုအလုပ်လုပ်ဖို့လိုတယ်။ ဒီထက်ပိုပြီး တည်ဆောက်နိုင်ဖို့ စည်းရုံးနိုင်ဖို့ လိုပါတယ်ဆိုတာကို အဲ့ဒီရည်ရွယ်ချက်တွေနဲ့ အဲ့ဒီစဉ်းစားချက်တွေနဲ့ သွားနေကြတာဖြစ်ပါတယ် ခင်ဗျာ။