၃၁၊ဩဂုတ်လ။
(၁)ကျွန်ုပ်တို့မြန်မာအမျိုးကောင်းမိဘများသည်
“မကောင်းမြစ်ထာ၊ကောင်းရာညွှန်လတ်၊အတတ်
သင်စေ”ဟူသည့် မိဘဝတ်အတိုင်း သားသမီးများအရွယ်ရောက်လာလျှင် ပညာတတ်ရန်အလို့ငှာစာ သင်ကျောင်းများသို့ပို့ကြ၏။
စာသင်ကျောင်းနှင့်အလှမ်းဝေးသည့်ကျေးရွာက မိဘတွေက ဘုန်းတော်ကြီးသင်ပညာရေးကျောင်း ၊ငွေကြေးမတတ်နိုင်သူတွေက အစိုးရ စာသင် ကျောင်း၊ ငွေကြေးအသင့်အတင့်ရှိသူကပုဂ္ဂလိက စာသင်ကျောင်း၊မြို့ကြီးပြကြီးမှာနေ၍ဓနငွေကြေး တောင့်တင်းလွန်းသူတို့ကား အင်တာနေရှင်နယ် စကူးဟုခေါ်သည့် အင်္ဂလိပ်ကျောင်းစသည် စသည်တို၌ ပညာရည်နို့သောက်စို့စေကြ၏။
မိဘက ကောက်စိုက်ရ၊ပျိုးနူတ်ရ၊ပန်းရံလိုက်ရကူ လီထမ်းရ၊လမ်းတကာလှည့်ကာဈေးတောင်းခေါင်း ရွက်ရသော်လည်း ငါ့သားသမီးငါတို့လိုမဆင်းရဲရအောင် ပညာတတ်မှဖြစ်မည်ဟုဆိုကာ အစားအ သောက်ချိုးခြံ အနေအထိုင်ချိုးခြံ၍ မြေတောင် မြှောက်ပေးကြ၏။
သားသမီးများ ဆယ်တန်းအောင်ပြီးကာမှ၊ဘွဲ့ရ
ပြီးကာမှ ထိုက်တန်သည့်အလုပ်အကိုင်နှင့်လုပ်ခ
လစာမရ၍ ကွမ်းယာရောင်းရ၊ဆိုင်ကယ်ကယ်ရီ
မောင်းရ၊အထည်ချုပ်စက်ရုံဆင်းရ၊နိုင်ငံရပ်ခြား
သို့တိုင်းတပါးသားများမလုပ်ခြင်သည့်အလုပ်ကို
ပြေးလုပ်ရ စသည့်သာဓကများစွာရှေ့တွင်ရှိခဲ့ပါ
သော်လည်း မိဘဝတ်ကျေပွန်လှသည့် မြန်မာအ
မျိုးကောင်းသားမိဘများ၏ စိတ်ဓာတ်ကိုကားကျွန်ုပ်မှာ မချီးကျူးဘဲမနေနိုင်အောင်ဖြစ်ရ၏။
(၂)တနေ့သ၌ကျွန်ုပ်သည် မြန်မာ့ပညာရေးကိုအ လေးအနက်ရင်မောနေသည့်အခိုက် ရပ်ကွက်ထဲရှိ သားတပည့်လိုနေသည့်အမျိုးကောင်းသားလေး တယောက်သည် ကျွန်ုပ်ထံသို့ခြေဦးစိုက်စိုက်ရောက်
လာ၏။ထို အမျိုးကောင်းသားမှာ ပန်းရံအလုပ်ဖြင့်အသက်မွေးသူဖြစ်ပြီး ဇနီးသည်မှာ လမ်းတကာလျှောက်၍တံမြက်စီးရောင်းရသူဖြစ်၏။
“ဆရာဖျံရေ အရေးပေါ်ငွေလိုလို့ သုံးသောင်း
လောက်ချေးပါဆရာ”
“ဘယ်လိုလဲ မောင်ရင့်မိန်းမဖျားပြန်ပီလား”
“မဟုတ်ဘူးဆရာ သားလေးအတွက်ကျူရှင်လခ ပေးရမှာမို့ပါ သားလေးကကျူရှင်ဖိုးမပေးရင် ကျောင်းမတက်တော့ဘူးတဲ့”
ကျွန်ုပ်မှာ အနှီအမျိုးကောင်းသား၏စကားကို
ကြား၍တွေဝေသွားမိ၏။အမျိုးကောင်းသား၏
သားတော်မောင်မှာ ရပ်ကွက်ထဲရှိအစိုးရကျောင်း
၌ မူလတန်းတက်နေသောကလေးဖြစ်၏။မိဘများမှာတနေ့လုပ်မှတနေ့စားရသဖြင့် အဘယ်ကျူရှင်မှမထားနိုင်သော်လည်း ကလေးသည် ကျောင်းက သင်သောစာကို တနေ့စာ တနေ့လုပ်၏။ကျူရှင်ယူစရာမလိုသောကလေးက ကျူရှင်မတက်ရလျှင် ကျောင်းမတက်ဆိုသောအခါကျွန်ုပ် နားမရှင်းသည့် အတွက်”ဘဇာကြောင့်နည်း”ဟုမေးမိလေ၏။
“သည်လိုဆရာဖျံ ဇွန်လကျောင်းတွေစဖွင့်ကတည်း
က သားတို့အတန်းပိုင်ဆရာမကအတန်းထဲကကျောင်းသားတိုင်းသူ့ဆီမှာကျူရှင်တက်ရမယ်တဲ့ ကျူရှင်ကလည်းဝေးဝေးလံလံသွားစရာမလိုဘူး ကျောင်းမှာဘဲဖွင့်မှာတဲ့ဆရာ ကျွန်တော်တို့ကတော့ ပိုက်ဆံမရှိလို့မတက်နိုင်ဘူးလို့ ဆရာမကိုပြောခဲ့တယ်။ အဲသလိုနဲ့လပတ်စာမေးပွဲစစ်ပြီး ရီပို့ကတ်ကိုလက်မှတ်ထိုးဘို့ မိဘတွေခေါ်တဲ့အခါ ကျွန်တော့် သားလေးဟာ ဘာသာစုံမှာအဆင့်စီရနေတော့တာပဲဆရာရေ”
“မောင်ရင့်သားကမဖြေနိုင်လို့လား”
“ဖြေနိုင်ပါသကောဆရာရယ် ဆရာမကပြောတာ တော့ ကျူရှင်မတက်လို့ဆိုပဲ”
“အခြားကျောင်းသားတွေကော ဘယ်လိုလဲ”
“ကျောင်းသားတွေအကုန်သူ့ဆရာမဆီကျူရှင်
တက်ကြတယ်ဆရာ အပြင်မှာကျူရှင်တက်တဲ့
ကလေးတွေကလည်းဆရာမကို လစဉ်ကျူရှင်
လခပေးကြတယ်တဲ့ ကျနော့်သားလေးသာ”
“ဘာဘာ နားမရှင်းလို့ကျူရှင်မတက်ဘဲကျူရှင် လခပေးရသတဲ့လား”
“ဟုတ်တယ်ဆရာ မပေးလို့မရဘူးတဲ့ သူတို့ကလစာ နဲ့မလောက်ဘူးတဲ့”
ကျွန်ုပ်မှာအနှီအမျိုးကောင်းသား၏စကားကို
ကြားရပြီးနောက် ကိုယ့်နဖူးကိုကိုယ်ပြန်ရိုက်မိပြီး
ငွေသုံးသောင်းကို အလျင်အမြန်ထုတ်ပေးမိကာ
ဆက်ကြေးပေးရသောပညာရေးလောကကြီးကို
မအံ့ဩဘဲမနေနိုင်အောင်ဖြစ်ရလေတော့၏။
(၃)အနှီအံ့ဩရသည့် ပညာရေးလောကကြီး
အကြောင်းကိုမေ့မေ့ပျောက်ပျောက်ရှိစဉ် တနေ့
သ၌ကျွန်ုပ်နှင့်မဆုံဖြစ်တာကြာသော မိတ်ဆွေ
တဦးနှင့်လက်ဘက်ရည်ဆိုင်၌ဆုံဖြစ်ကြ၏။
ထွေရာလေးပါးပြောကြရင်း မိတ်ဆွေ၏သားမှာ တက္ကသိုလ်ကြီးတခု၌ကျောင်းတက်နေမှန်းသတိ ရသွား၍”အဆွေ့သားကော ဘယ်နှစ်ရောက်သွားပြီလဲ စာကောလိုက်နိုင်ရဲ့လား”ဟု မေးမိရာ မိတ်ဆွေ ၏တက္ကသိုလ်ပညာရေးငိုချင်းရှည်ကြီးကို ကြား လိုက်ရတော့၏။
“တတိယနှစ်တော့ရောက်ပြီဆရာဖျံ စာကတော့
လိုက်နိုင်အောင်လုပ်ထားရတယ် ဆရာဖျံတို့တက္က သိုလ်တက်တုန်းကလို လွယ်အိတ်ကလေးလွယ် လက်ဘက်ရည်ဖိုးလေးတောင်းပြီးကျောင်းတက်လို့မရတော့ဘူးဆရာ ပထမနှစ်ဝက်ကို၁၂သိန်း၊ဒုတိယနှစ်ဝက်ကို၁၂သိန်းပေးရတယ်ဆရာ”
“ဗျာ အဆွေ့သားကျူရှင်လခကမနည်းပါလာ့ မပေးနိုင်ရင်ကော”
“မပေးနိုင်ရင်တော့ အဲဒီ့ကျောင်းသား Time Table တောင်မရဘူးဆရာ၊ ပိုက်ဆံပေးတဲ့ ကျောင်းသားတွေကိုviber group ဖွဲ့ပြီးကျူရှင်သင်တာ၊ viberကနေပဲ မနက်ဖြန်စာသင်ချိန်ပြောတာ၊ နောက်ဆုံး မနက်ဖြန်စာမေးပွဲဆို ည၈နာရီလောက်မှ viber ကနေမနက်ဖြန်ဘာပါမယ်ညာပါမယ်ဆိုပြီးလာတာ မပေးနိုင်ရင်တော့ အဲဒီကောင်ကျောင်းထွက်တော့ပဲ”
ကျွန်ုပ်မှာ မိတ်ဆွေအမျိုးကောင်းသား တက္ကသိုလ် ကျောင်းသားမိဘ၏ စကားကိုနားထောင်ရင်း အက်ကျူကိတ်တက်လူငယ်များနှင့်တည်ဆောက် မည့် အနာဂတ်နိုင်ငံတော်အတွက် ရင်လေးနေမိသတတ်ဟူလို။
#မျက်ဖြူစိုက်လေ #ဆရာကြိုက်လေ #အာဖျံကွီး #သရော်စာ #DeltaNewsAgency #DNA
Delta News Agency Telegram – https://shorturl.at/lxKMR
Delta News Agency YouTube – https://shorturl.at/ahBL2
Delta News Agency Website – https://shorturl.at/ozAIM
Delta News Agency Podcast – https://shorturl.at/epwzH