“ တကယ်က ဒီလိုမျိုး တက္ကသိုလ်က ဧရာဝတီတိုင်းအတွက် အရမ်းအရေးပါပါတယ်။ ဒီမှာဖွင့်ရင်ကောင်းမယ်လို့ တချိန်ကမျှော်လင့်ဖူးတယ်။ ပုံမှန်အချိန်ဆိုရင်တော့ ဒါကိုလက်ကမ်းကြိုရမှာပဲ။ အခုကကျ စိုက်ပျိုး၊ မွေးမြူရေးက ဘယ်လိုမှ နလံမထူနိုင်။ ကိုယ်တွေ လယ်သမားတွေလည်း စိုက်တိုင်းရှုံးဖြစ်နေတဲ့အချိန်ဖြစ်နေတော့ သူ့ကို အာရုံမစိုက်နိုင်ဘူး။ ကျွန်တော်တို့မှာ ပျော်ရမှာလိုလို ငိုရမှာလိုလိုနဲ့ ” လို့ ဟင်္သာတမြို့နယ်က လယ်သမားအရေး တက်ကြွလှုပ်ရှားသူ တဦးက မှတ်ချက်ပြုပါတယ်။
၃၀၊ ဩဂုတ်လ။
မအူပင် ကွန်ပျူတာတက္ကသိုလ်ကို စိုက်ပျိုးရေးနဲ့ မွေးမြူရေး တက္ကသိုလ်အဖြစ် ပြောင်းလဲဖွင့်လှစ်ထားပြီး ဒီနှစ်မှာ ကျောင်းသားစတင်လက်ခံမှာ ဖြစ်တယ်လို့ စစ်ကောင်စီက ကြေညာထားပါတယ်။ဒါပေမယ့် ကန့်သတ်ချက်တွေအရ လက်လှမ်းမီဖို့ ခက်ခဲနိုင်တယ်လို့ ပညာရေးကဏ္ဍနဲ့ နီးစပ်တဲ့ ဒေသခံတွေက သုံးသပ်ကြပါတယ်။
“ သူက ၁၂ တန်းမှာ ဘိုင်အိုတွဲယူရမယ်။ အမှတ် ၃၅၀ ကျော်ရမယ်ဆိုတော့ အများစုက အလုပ်အကိုင်နဲ့ တည်ငြိမ်ဖို့ ဘယ်လိုမှ မသေချာတဲ့ ဒီမေဂျာကို ယူဖို့မဖြစ်နိုင်တော့ဘူး။ ဒီအမှတ်လောက်ဆိုရင် သူနာပြုတို့ ဆေးတို့ကိုပဲ သွားကြဖို့က ပိုသေချာတယ်။ ရွေးကောက်ပွဲလုပ်မှာမို့ သူတို့ကောင်းတာ လုပ်နေတာလို့ ပြချင်ပုံရပါတယ် ” လို့ မအူပင်မြို့ပေါ်မှာ အထက်တန်းကျောင်းအတွက် ကျူရှင်ပြသနေသူ ဆရာမတဦးက ပြောပါတယ်။
ဧရာဝတီတိုင်းထဲမှာ ဇီဝဗေဒဘာသာရပ်တွဲနဲ့ အထက်တန်းအဆင့်ကို တက်ရောက်သူဟာ နည်းပါးပြီး အများစုဟာ ဆေး နဲ့ အင်ဂျင်နီယာ မေဂျာတွေကို အဓိက ရည်မှန်းပြီး တက်ရောက်ကြပါတယ်လို့ ဆိုပါတယ်။
“ သမီးတို့ဆီမှာတော့ အများစုက အီကိုတွဲယူကြတာများတယ်။ ပြီးရင် အဝေးသင်တက်ရင်း အလုပ်လုပ်မယ်ပေါ့။ ဘိုင်အိုယူတဲ့သူတွေက စာတော်ကြတယ် သူတို့တွေက အဓိက ဆေးလိုင်းမှန်းပြီးတက်ကြတာများတယ်။ သမီးဆိုရင်လည်း ဒီလိုမျိုး အချိန်မှာတော့ ဒါကိုတက်ဖြစ်မယ်မထင်ဘူး။ တကယ်ဆို စိုက်၊ မွေး မေဂျာရှိတယ်ဆိုတာတောင်မှ ခုမှသိတာ။ သမီးတို့သိတာ ဘော်တနီတို့ ဇူး တို့လောက်ပဲသိတာ ” လို့ ဒီနှစ်မှ ၁၂ တန်းအောင်မြင်ထားတဲ့ မအူပင်မြို့နယ်ထဲက ကျောင်းသူ တဦးက ဆိုပါတယ်။
အရင်ကတည်းက ရေဆင်း တက္ကသိုလ်တွေရဲ့ ဝင်ခွင့်ဟာ အမှတ်မြင့်မားတာကြောင့် နိုင်ငံအနေအထားအရ ဝင်ငွေရရှိမှုနည်းပါးတဲ့ စိုက်ပျိုး၊ မွေးမြူရေး မေဂျာကို ယူသူတွေ ရှားပါးတယ်လို့ သိရပါတယ်။ လက်ရှိ မအူပင်မှာ ဖွင့်လှစ်မယ့် တက္ကသိုလ်မှာတော့ မေဂျာတခုကို ကျောင်းသား ၁၀၀ ဦးစီ ခေါ်ယူမှာ ဖြစ်ပြီး အမျိုးသား၊ အမျိုးသမီး အချိုးတူခေါ်ယူဖို့ စီစဉ်ထားကြောင်း စစ်ကောင်စီရဲ့ ပညာရေးဝန်ကြီးဌာနက ထုတ်ပြန်ထားပါတယ်။
“ တကယ်က ဒီလိုမျိုး တက္ကသိုလ်က ဧရာဝတီတိုင်းအတွက် အရမ်းအရေးပါပါတယ်။ ဒီမှာဖွင့်ရင်ကောင်းမယ်လို့ တချိန်ကမျှော်လင့်ဖူးတယ်။ ပုံမှန်အချိန်ဆိုရင်တော့ ဒါကိုလက်ကမ်းကြိုရမှာပဲ။ အခုကကျ စိုက်ပျိုး၊ မွေးမြူရေးက ဘယ်လိုမှ နလံမထူနိုင်။ ကိုယ်တွေ လယ်သမားတွေလည်း စိုက်တိုင်းရှုံးဖြစ်နေတဲ့အချိန်ဖြစ်နေတော့ သူ့ကို အာရုံမစိုက်နိုင်ဘူး။ ကျွန်တော်တို့မှာ ပျော်ရမှာလိုလို ငိုရမှာလိုလိုနဲ့ ” လို့ ဟင်္သာတမြို့နယ်က လယ်သမားအရေး တက်ကြွလှုပ်ရှားသူ တဦးက မှတ်ချက်ပြုပါတယ်။
လျှောက်ထားမယ့်ကျောင်းသားတွေဟာ ၂၀၂၅ ခုနှစ် ၁၂ တန်း စာမေးပွဲကို အောင်မြင်ထားသူတွေ ဖြစ်ရမှာဖြစ်ပြီး ကျန်းမာရေး စစ်ဆေးမှု (က) အဆင့်ရှိဖို့လည်း လိုအပ်ပါတယ်။
ဒါအပြင် တက္ကသိုလ်ဝင်စာမေးပွဲအောင်မြင်ကြောင်း သက်ဆိုင်ရာ ကျောင်းအုပ်ကြီး၏ထောက်ခံချက် (မိတ္တူ) (ကျောင်းအပ်သည့်အချိန်တွင် မူရင်းတင်ပြရမည်)၊ အမှတ်စာရင်း (မိတ္တူ) (ကျောင်းအပ်နှံချိန်တွင်မူရင်းတင်ပြရမည်) ၊ ကျောင်းသားနှင့် မိဘနှစ်ပါး၏ နိုင်ငံသားစိစစ်ရေးကတ်(မိတ္တူ)၊ လိုင်စင်ဓါတ်ပုံ(၃)ပုံ (ကျောင်းအပ်ချိန်တွင်ပေးအပ်ရန်)၊ အကျင့်စာရိတ္တကောင်းမွန်ကြောင်း သက်ဆိုင်ရာ ရပ်ကွက်/ကျေးရွာအုပ်ချုပ်ရေးမှူး၏ ထောက်ခံချက်(မူရင်း) (သို့မဟုတ်) သက်ဆိုင်ရာ ရဲစခန်းထောက်ခံချက်(မူရင်း) တို့လိုအပ်တယ်လို့ ထုတ်ပြန်ထားပါတယ်။
စိုက်ပျိုးရေးနဲ့ မွေးမြူရေး တက္ကသိုလ် (မအူပင်)ဟာ ဟိုးယခင်က GTI ကျောင်းဖြစ်ခဲ့ပြီး၊ နောက်ပိုင်းမှာတော့ ကွန်ပျူတာ တက္ကသိုလ်အဖြစ် ပြောင်းလဲဖွင့်လှစ်ခဲ့သလို ယခုအချိန်မှာတော့ ကွန်ပျူတာမေဂျာကို နည်းပညာ ကောလိပ် (GTC) နဲ့ ပူးပေါင်းလိုက်တာဖြစ်ပါတယ်။