အမေရိကန် ကမ်းခြေစောင့်တပ်ဖွဲ့နဲ့ ရေတပ် သင်္ဘောတွေဟာ ကာရေဘီယံတောင်ပိုင်းမှာ ပုံမှန်လှည့်ပတ်လေ့ရှိပေမယ့် အခုအခါမှာ သာမာန်အင်အားဖြည့်တာထက် သိသိသာသာကြီးမားတယ်လို့ ဆိုပါတယ်။
၂၉ ၊ ဩဂုတ်လ။
ကာရေဘီယံပင်လယ်ပြင်တောင်ပိုင်းနဲ့ အနီးကရေပြင်ဧရိယာတွေမှာ အမေရိကန် ရေတပ် အင်အားတိုးချဲ့နေတာကြောင့် အမေရိကန်နဲ့ ဗင်နဇွဲလားနိုင်ငံအကြား တင်းမာမှုတွေ မြင့်တက်နေပါတယ်။
ဝါရှင်တန်တာဝန်ရှိသူတွေက လက်တင်အမေရိက မူးယစ်ဂိုဏ်းတွေရဲ့ ခြိမ်းခြောက်မှုကို ဖြေရှင်းဖို့ ရည်ရွယ်ပြီး အခုလို အင်အားတိုးတာလို့ ပြောပါတယ်။
မူးယစ်ဂိုဏ်း နှိမ်နင်းရေးဟာ အမေရိကန်သမ္မတ ဒေါ်နယ်ထရန့်ဦးဆောင်တဲ့ အစိုးရအဖွဲ့ရဲ့ ပင်မပန်းတိုင်တခုဖြစ်ပြီး နိုင်ငံတွင်း ရွေ့ပြောင်းဝင်ရောက်မှုတွေကို ကန့်သတ်တာနဲ့ အမေရိကန်တောင်ပိုင်းနယ်စပ်မှာ လုံခြုံရေးတင်းကြပ်တာတွေကို ကျယ်ကျယ်ပြန့်ပြန့် လုပ်ဆောင်နေတာပါ။
အမေရိကန် ကမ်းခြေစောင့်တပ်ဖွဲ့နဲ့ ရေတပ် သင်္ဘောတွေဟာ ကာရေဘီယံတောင်ပိုင်းမှာ ပုံမှန်လှည့်ပတ်လေ့ရှိပေမယ့် အခုအခါမှာ သာမာန်အင်အားဖြည့်တာထက် သိသိသာသာကြီးမားတယ်လို့ ဆိုပါတယ်။
နျူကလီးယားစွမ်းအင်သုံး အမြန်တိုက်ခိုက်ရေး ရေငုပ်သင်္ဘောအပါအဝင် အမေရိကန်စစ်သင်္ဘော ၇စီးဟာ လာမယ့်သီတင်းပတ်မှာ အဆိုပါဒေသတွင်းကို ရောက်နိုင်မယ်လို့ မျှော်လင့်ရကြောင်း အမည်မဖော်လိုတဲ့ အမေရိကန်တာဝန်ရှိသူတဦးက ကြာသာပတေးနေ့က ပြောပါတယ်။
USS San Antonio ၊ USS Iwo Jima နဲ့ USS Fort Lauderdale စစ်သင်္ဘောတွေမှာ မရိန်းတပ်သား ၂၂၀၀ အပါအဝင် စုစုပေါင်း စစ်သားအင်အား ၄၅၀၀ ပါဝင်တယ်လို့ အဆိုပါ သတင်းရင်းမြစ်ရဲ့ ပြောကြားချက်ကို ကိုးကားပြီး Reuters သတင်းဌာနက ဖော်ပြပါတယ်။
ဒါ့အပြင် အမေရိကန်စစ်တပ်ရဲ့ P-8 အမျိုးအစား စပိုင်လေယာဉ်တွေလည်း ပါဝင်ပြီး သူတို့ဟာ နိုင်ငံတကာရေပိုင်နက်ထဲမှာ ပျံသန်းခဲ့တာလို့ ဆိုပါတယ်။
ဗင်နီဇွဲလား သမ္မတ နီကိုလက်စ် မာဒူရိုက အမေရိကန်ရဲ့ လုပ်ရပ်အပေါ် ရှုတ်ချခဲ့ပါတယ်။
“ကျွန်တော်တို့ရဲ့ သံတမန်ရေးက အမြောက်တွေ ၊ ခြိမ်းခြောက်မှုတွေနဲ့ သံတမန်ဆက်ဆံရေး မဟုတ်ဘူး ၊ ဘာဖြစ်လို့လည်းဆိုတော့ ကမ္ဘာကြီးက လွန်ခဲ့တဲ့ နှစ် ၁၀၀က ကမ္ဘာ မဖြစ်နိုင်တော့ဘူး” လို့ ပြောခဲ့ပါတယ်။
ဒါ့အပြင် အမေရိကန်ရေတပ် အင်အားတိုးချဲ့တာနဲ့ ပတ်သတ်လို့ ဗင်နဇွဲလားက ကုလအထွေထွေ အတွင်းရေးမှူးချုပ် အန်တိုနီယို ဂူတားရက်စ်ဆီကို ဩဂုတ်လ ၂၈ရက်နေ့မှာတိုင်ကြားခဲ့ပြီး ဝါရှင်တန်ဟာ ကုလသမဂ္ဂပဋိညာဉ်စာချုပ်ကို ချိုးဖောက်နေတယ်လို့ စွပ်စွဲခဲ့ပါတယ်။
Ref – Reuters