၂၀၂၁ ခုနှစ် ဇွန်လက ဂျီနီဗာမြို့မှာ သမ္မတ ပူတင်နဲ့ ဂျိုးဘိုင်ဒန်တို့ တွေ့ဆုံမှုပြီးကတည်းက အမေရိကန်နဲ့ ရုရှားခေါင်းဆောင်တွေအကြား ထိပ်သီးတွေ့ဆုံမှု မရှိခဲ့ပါဘူး။
၈ ၊ ဩဂုတ်လ
အမေရိကန်သမ္မတ ဒေါ်နယ်ထရမ့်နဲ့ ရုရှားသမ္မတ ဗလာဒီမာပူတင်တို့ လာမယ့် သီတင်းပတ်မှာ တွေ့ဆုံနိုင်ဖွယ် ရှိတယ်လို့ ရုရှားနိုင်ငံရဲ့ ကုလသမဂ္ဂဆိုင်ရာ ဒုသံအမတ် ဒီမစ်ထရီ ပိုယန်စကီယ်က ဩဂုတ်လ ၇ရက်နေ့မှာ ပြောလိုက်ပါတယ်။
“အခုချိန်ထိ ကြားရသလောက် ၊ တွေ့လို့ရမယ့် နေရာအရေအတွက် တော်တော်များများရှိတယ် ၊ ဒါပေမယ့် ထုတ်မပြောဖို့တော့ သူတို့ သဘောတူထားကြပါတယ် ၊ အချိန်ကတော့ နောက်တပတ်ဖြစ်မယ်လို့ ကျွန်တော်ထင်တယ်” လို့ ပိုယန်စကီယ်က သတင်းထောက်တွေကို ပြောခဲ့ပါတယ်။
ဒါအပြင် ယူကရိန်းသမ္မတ ဇေလန်စကီနဲ့ တွေ့မယ်ဆိုတာတော့ မကြားမိဘူးလို့လည်း သူက မှတ်ချက်ပြုခဲ့ပါတယ်။
၂၀၂၁ ခုနှစ် ဇွန်လက ဂျီနီဗာမြို့မှာ သမ္မတ ပူတင်နဲ့ ဂျိုးဘိုင်ဒန်တို့ တွေ့ဆုံမှုပြီးကတည်းက အမေရိကန်နဲ့ ရုရှားခေါင်းဆောင်တွေအကြား ထိပ်သီးတွေ့ဆုံမှု မရှိခဲ့ပါဘူး။
ရုရှားဟာ သူ့ရဲ့ လုံခြုံရေးကို ခြိမ်းခြောက်တယ်ဆိုတဲ့ အကြောင်းပြချက်နဲ့ ၂၀၂၂ခုနှစ် ဖေဖော်ဝါရီလမှာ ယူကရိန်းကို ကျူးကျော်တိုက်ခိုက်ခဲ့တာပါ။
သမ္မထရမ့်ကတော့ ယူကရိန်းမှာ ရုရှားရဲ့ စစ်ပွဲ အဆုံးသတ်ရေး လုပ်ဆောင်သွားဖို့ သံဓိဌာန်ပြုခဲ့ပေမယ့် သူ့ရဲ့ ဒုတိယ သမ္မတသက်တမ်း ၇လနီးပါး ရှိလာချိန်အထိ အကောင်အထည်မဖော်နိုင်သေးပါဘူး။
ပြီးခဲ့တဲ့လမှာ သမ္မတထရမ့်က ၁၀ရက်အတွင်း ယူကရိန်းမှာ အပစ်ရပ်ဖို့ မော်စကိုအစိုးရကို ဖိအားပေးခဲ့ပြီး ၊ ရုရှားအနေနဲ့ ယူကရိန်းနဲ့ အပစ်ရပ်ရေး သဘောတူညီမှု မလုပ်နိုင်ဘူးဆိုရင် ရုရှားဆီက ရေနံဝယ်ယူတဲ့ နိုင်ငံတွေကို ၁၀၀ ရာခိုင်နှုန်း အခွန်စည်းကြပ်မယ်လို့လည်း ခြိမ်းခြောက်ထားပါတယ်။
ဒါနဲ့ ပတ်သတ်လို့ ရုရှားလုံခြုံရေးကောင်စီရဲ့ ဒုတိယဥက္ကဋ္ဌ Dmitry Medvedev နဲ့ သမ္မထရမ့်အကြား အပြန်အလှန် စွပ်စွဲပြောဆိုကာ တင်းမာမှုတွေ မြင့်တက်ခဲ့ပြီး ထရမ့်က ရုရှားရေပြင်အနီး နျူကလီယား ရေငုပ်သင်္ဘောနှစ်စီးကို နေရာယူထားဖို့ ဩဂုတ်လ ၁ရက်နေ့က အမိန့်ပေးခဲ့ပါသေးတယ်။
Ref – Reuters