ရုရှားအရှေ့ပိုင်းမှာ မီးတောင်ပေါက်ကွဲပြီးနောက် နာရီပိုင်းအတွင်း ငလျင်လှုပ်

အဆိုပါ မီးတောင်ဟာ နှစ်ပေါင်း ၅၀၀ ကျော်အတွင်း ပထမဆုံး ပေါက်ကွဲတာ ဖြစ်ပါတယ်။

၄ ၊ ဩဂုတ်လ။

ရုရှားနိုင်ငံ အရှေ့ပိုင်းမှာ ဩဂုတ်လ ၃ရက်နေ့ တနင်္ဂနွေနေ့က မီးတောင်ပေါက်ကွဲပြီး ငလျင်လှုပ်ခတ်မှု ဖြစ်ပွါးခဲ့ပြီး ၊ လွန်ခဲ့တဲ့သီတင်းပတ်က လှုပ်ခတ်ခဲ့တဲ့ အင်အားပြင်းငလျင်နဲ့ ဆက်စပ်မှုရှိနိုင်တယ်လို့ ကျွမ်းကျင်သူတွေက သုံးသပ်ကြပါတယ်။

အဆိုပါ မီးတောင်ဟာ နှစ်ပေါင်း ၅၀၀ ကျော်အတွင်း ပထမဆုံး ပေါက်ကွဲတာလည်း ဖြစ်ပါတယ်။

ကမ်ချက်ကာကျွန်းဆွယ်ဒေသမှာရှိတဲ့ Krasheninnikov မီးတောင်ပေါက်ဝကနေ ၆ ကီလိုမီတာ ( ၃ ဒဿမ ၇မိုင်) အထိ ကောင်းကင်ပေါ်ကို ပြာတွေ လွင့်ထွက်နေတာပါ။

လက်ရှိအချိန်ထိ လူနေဧရိယာတွေကို ခြိမ်းခြောက်မှုမရှိသေးဘူးလို့ ရုရှားအရေးပေါ်ဆိုင်ရာ ဝန်ကြီးဌာနက ပြောပါတယ်။

မီးတောင်ပေါက်ပြီး နာရီပိုင်းအကြာမှာပဲ ၇ မဂ္ဂနီကျုဒ့်ရှိတဲ့ အင်အားပြင်းငလျင်တခု လှုပ်ခတ်ခဲ့ပြီး ကမ်ချက်ကာကျွန်းဆွယ်ဒေသက ဧရိယာ ၃ခုမှာ ဆူနာမီအရေးပေါ် သတိပေးချက် ထုတ်ပြန်ခဲ့ရပါသေးတယ်။

နောက်ပိုင်းမှာတော့ ရုရှားအာဏာပိုင်တွေက သတိပေးချက်ကို ပြန်လည်ရုတ်သိမ်းခဲ့ပါတယ်။

တနင်္ဂနွေနေ့က ဖြစ်ပွါးခဲ့တဲ့ အဆိုပါ ဖြစ်ရပ်၂ရပ်စလုံးဟာ ပြီးခဲ့တဲ့ သီတင်းပတ်က ဆူနာမီဖြစ်ပွါးခဲ့တဲ့ ၈ ဒ ဿမ ၈ မဂ္ဂနီကျုဒ့် အင်အားပြင်းငလျင်နဲ့ ဆက်စပ်မှု ရှိနိုင်တယ်လို့ ကျွမ်းကျင်သူတွေက မှတ်ချက်ပြုထားပါတယ်။

မှတ်တမ်းတွေအရ Krasheninnikov မီးတောင်နောက်ဆုံးအကြိမ်ပေါက်ကွဲခဲ့တာဟာ ၁၅ ရာစုနှစ်က ဖြစ်တယ်လို့ ကမ်ချက်ကာဒေသ မီးတောင်ပေါက်ကွဲမှုဆိုင်ရာ တုံ့ပြန်ရေးအဖွဲ့ အကြီးအကဲ Olga Gorman က ပြောပါတယ်။

Kamchatka ကျွန်းဆွယ်ဟာ ဝေးလံခေါင်ဖျားပေမယ့် ကမ္ဘာပေါ်မှာ ငလျင်နဲ့ မီးတောင်ပေါက်ကွဲမှုတွေ အများဆုံးဖြစ်ပွါးတဲ့ ပစိဖိတ်သမုဒ္ဒရာထဲက “Pacific Ring of Fire” လို့ ခေါ်တဲ့ ဧရိယာမှာ တည်ရှိနေတာ ဖြစ်ပါတယ်။

Ref – BBC
#ရုရှား #မီးတောင်ပေါက် #ငလျင်လှုပ် #ဆူနာမီ
#DeltaNewsAgency #DNA
Delta News Agency Telegram – https://shorturl.at/lxKMR
Delta News Agency YouTube – https://shorturl.at/ahBL2
Delta News Agency Website – https://shorturl.at/ozAIM
Delta News Agency Podcast – https://shorturl.at/epwzH