ငဝန်မြစ်အတွင်းကတဆင့် စစ်သင်္ဘော ၃ စီး ၊ ဧရာဝတီမြစ်အတွင်းကနေ စစ်သင်္ဘော ၂ စီး စုစုပေါင်း စစ်သင်္ဘော ၅ စီးဟာ ဧရာဝတီတိုင်းအတွင်းမှာ နေရာယူထားပြီ ဖြစ်ပါတယ်။
၃၊ဩဂုတ်လ။
ငဝန်မြစ်အတိုင်း ဆန်တက်လာတဲ့ ရေတပ်က စစ်သင်္ဘောနှစ်စီးဟာ ဧရာဝတီတိုင်း အင်္ဂပူမြို့နယ် ခြောက်ရွာကျေးရွာကျေးရွာ အနီးမှာ ဩဂုတ်လ ၂ ရက် နံနက်ပိုင်း ၁၀ နာရီလောက်က ဆိုက်ကပ်နေပါတယ်။
“မြို့ကွင်းခြောက်ရွာကမ်းစပ်နားမှာ ကျောက်ချနေကြတာ” လို့ မျက်မြင်တွေ့ရှိသူ ဒေသခံက DNA ကို ပြောပါတယ်။အင်္ဂပူမြို့နယ် ပအဖ အဖွဲ့ဝင်တဦးကလည်း “ မနေ့ကတည်းက ရောက်နေတာ။ စစ်င်္ဘောနှစ်စီး ရွာနားမှာပဲ”လို့ အတည်ပြုပေးပါတယ်။
ဒေသအခေါ် မြို့ကွင်းတံတားလို့ခေါ်တဲ့ ငဝန်မြစ်ကူးတံတားအနီးမှာ စစ်သင်္ဘောက ကျောက်ချ ရပ်နားထားတာကြောင့် ပတ်ဝန်းကျင်ကျေးရွာတွေမှာ နေထိုင်တဲ့အရပ်သားပြည်သူတွေဟာ တိုက်ပွဲတွေ ဖြစ်ပွားလာမှာကို စိုးရိမ်နေကြတယ်လို့ သူကဆက်ပြောပါတယ်။
“သင်္ဘောပေါ်မှာ အမြောက်တွေဆင်ထားတယ်။ ဓာတ်ပုံရိုက်ဖို့ အခွင့်မသာဘူး။ ဒါက အများမြင်အောင် စစ်ရေးပြင်ထားတာမျိုးဆိုတော့ ဒေသခံတွေစိုးရိမ်စိတ်ဖြစ်စေတယ်” လို့ မျက်မြင်တွေ့ရှိသူကပြောပါတယ်။ ဩဂုတ်လ ၃ ရက် ဒီနေ့မနက်မှာတော့ စစ်သင်္ဘောနှစ်စီးအနက် တစီးဟာ မြောက်ဘက် မြို့ကွင်း (ဆုံကုန်းကျေးရွာ အုပ်စု) ဘက်ကိုထွက်ခွာသွားပါတယ်။
ရေတပ်က စစ်သင်္ဘောသုံးစင်းဟာ ဇူလိုင်လ ၁၄ ရက်နေ့ ငဝန်မြစ်အတိုင်းဆန်တက်လာပြီးတော့ တိုက်ပွဲ တွေဖြစ်ပွားနေတဲ့ ဧရာဝတီတိုင်း ၊ လေးမျက်နှာမြို့နယ်ထဲမှာ ဆိုက်ကပ်ခဲ့တာပါ။ အဲဒီနောက်မှာတော့ စစ်သင်္ဘောတွေဟာ တစ်ဖြေးဖြေးနဲ့ မြောက်ဘက် အင်္ဂပူမြို့နယ်ထဲကို ရွှေ့ပြောင်းနေတာပဲဖြစ်ပါတယ်။
တဖက်မှာလည်း ပဲခူးတိုင်းနဲ့ ဧရာဝတီတိုင်း အကြား ဧရာဝတီမြစ်ကနေ တဆင့် စစ်သင်္ဘောတွေဟာ ဇူလိုင်လ ၂၈ ရက် ညနေပိုင်းက ဧရာဝတီတိုင်း ၊ အင်္ဂပူ မြို့နယ် ၊ နံကပ်ကြီးကျေးရွာမှာလည်း ဆိုက်ကပ်ခဲ့ပါသေးတယ်။ ဒီစစ်သင်္ဘောပေါ်မှာ ဟောင်ဝှစ်ဇာအ မြောက်လို့ယူဆရတဲ့ အမြှောက်နှစ်လက်လည်းတပ်ဆင်ထားတယ်လို့ မျက်မြင်တွေ့ရှိသူတစ်ဦးက DNA ကိုပြောပါတယ်။
မြစ်တွင်းသွား စစ်သင်္ဘောတွေဆီမှာ ၂၀ မီလီမီတာ စက်အမြောက် ၊ ၃၀ မီလီမီတာ ဘောက်ဖာ နဲ့ ၁၂ ဒသမ ၇ မမ စက်သေနတ်ပါရှိပြီးတော့ ၎င်းတို့ရဲ့ ပစ်ခတ်နိုင်စွမ်းဟာ ၁ မိုင်ကနေ ၅ မိုင်အတွင်း သက်ရောက်မှုရှိတယ်လို့ ရေတပ် CDM တပ်ကြပ်ကြီးတစ်ဦးက ပြောပါတယ်။
“အမြန်သွားတိုက်ရေယာဉ် (FAC) မှာဆိုရင်တော့ ဘောက်ဖာ ၃၀ မီလီမီတာ ဆုံလည်စက်အမြှောက်ပါ သေးတယ်” လို့ သူက ဆက်ပြောပါတယ်။ လက်ရှိမှာတော့ စစ်သင်္ဘောပေါ်မှာတပ်ဆင်ထားတဲ့ အ မြှောက်တွေပစ်ခတ်တာကို မြင်တွေ့ရခြင်းမရှိသေးဘူးလို့ လေးမျက်နှာမြို့နယ်နဲ့ အင်္ဂပူမြို့နယ်မှာနေထိုင် သူတွေကပြောပါတယ်။
စစ်တပ်ဟာ ဧရာဝတီစစ်မျက်နှာကို ပြီးခဲ့တဲ့ ဇူလိုင်လက စတင်ပြီး ရေကြောင်းကနေပါ စစ်သင်္ဘောတွေ စေလွှတ်ပြီး အင်အားဖြည့်တင်းနေတာပါ ။ အခုဆိုရင် ငဝန်မြစ်အတွင်းကတဆင့် စစ်သင်္ဘော ၃ စီး ၊ ဧရာဝတီမြစ်အတွင်းကနေ စစ်သင်္ဘော ၂ စီး စုစုပေါင်း စစ်သင်္ဘော ၅ စီးဟာ ဧရာဝတီတိုင်းအတွင်းမှာ နေရာယူထားပြီ ဖြစ်ပါတယ်။