ရခိုင်မှာဆိုရင် ရခိုင်ပါတီတွေပြိုင်တယ်။ NLD ပြိုင်တယ်။ ကြံ့ခိုင်ရေးပြိုင်တယ်။ ရခိုင်မှာ မနိုင်ဘူး။ ရခိုင်ပြည်နယ်မှာ ရခိုင်တွေနိုင်တယ်။ SNLD ဆိုရင်လည်း ဒီလိုပဲ ဒုတိယအများဆုံး မဲနိုင်တဲ့သူဖြစ်လာတယ်။ ဒီတော့ အမျိုးသားလွတ်မြောက်ရေးအတွက် ပါတီထောင် ရွေးကောက်ပွဲလုပ်တဲ့ အစုအဖွဲ့တွေက သူရဲ့လူမျိုးတွေရဲ့ ယုံကြည်မှုရအောင် မလုပ်နိုင်တဲ့ အခြေအနေရှိသလို ကရင်လူမျိုးတွေရဲ့ နိုင်ငံရေး ရေချိန်က ဘယ်အတိုင်းအတာထိ သွားနေလဲဆိုတာကို မှန်းဆကြည့်လို့ရတယ်။
၂ ၊ ဩဂုတ်လ။
အာဏာသိမ်းစစ်တပ်က ဦးဆောင်ပြီး ပြုလုပ်ဖို့ကြိုးစားနေတဲ့ ရွေးကောက်ပွဲအတွက် ဧရာဝတီ တိုင်းထဲမှာ နိုင်ငံရေးပါတီတချို့ဟာ ပါတီရုံးခန်းဖွင့်တာ ၊ ပါတီဝင်အသစ် စုဆောင်းတာ စတဲ့ လှုပ်ရှားမှုတွေ ပြုလုပ်နေကြပြီ ဖြစ်ပါတယ်။ ဒီလိုလှုပ်ရှားမှု ပြုလုပ်နေတဲ့အထဲမှာ ကရင်ပြည်သူ့ပါတီ(KPP) လည်း အပါအဝင်ဖြစ်ပါတယ်။
ဧရာဝတီမြစ်ဝကျွန်းပေါ်ဒေသဟာ ကရင်၊ချင်း(အရှို)၊မွန်၊ ဗမာ၊ရခိုင် စတဲ့ တိုင်းရင်းသားတွေ စုပေါင်းနေထိုင်ကြတဲ့ ဒေသတခုဖြစ်တဲ့အတွက် ဒီဒေသရဲ့ နိုင်ငံရေးဦးဆောင်မှု အခန်းကဏ္ဌအကြောင်း ပြောတဲ့အခါမှာလည်း ဒီဒေသမှာ အတူတကွယှဉ်တွဲနေထိုင်ကြတဲ့ လူမျိုးအားလုံးရဲ့ အတွေး၊အမြင်တွေကို ထဲ့သွင်း စဉ်းစားဖို့ လိုအပ်နေတာပါ။
ဒါကြောင့် ကရင်လူငယ်တဦးဖြစ်သလို၊ ဧရာဝတီမြစ်ဝကျွန်းပေါ် ဇာတိဖြစ်တဲ့ ကရင်အမျိုးသားရေး တက်ကြွလှုပ်ရှားသူ စထီးထား ကို DNA ကဆက်သွယ်ခဲ့ပြီး ဧရာဝတီတိုင်းအတွင်းက လူငယ်တွေနဲ့ ကရင်လူထုရဲ့ ရွေးကောက်ပွဲပေါ် အမြင်သဘောထားတွေနဲ့ ကရင်ပါတီတွေရဲ့ အခြေအနေတွေကို မေးမြန်းဖြစ်ခဲ့ပါတယ်။
▪️ မေး – စစ်ကောင်စီက လုပ်ဆောင်ဖို့ကြိုးစားနေတဲ့ ရွေးကောက်ပွဲအပေါ် လူငယ်တယောက်အနေနဲ့ ဘယ်လိုမြင်လဲ။
ဖြေ – အာဏာရှင်က တည်ထားတဲ့ စနစ်အောက်မှာ သွားနေတဲ့ ရွေးကောက်ပွဲအပါအဝင် စနစ်တွေဟာ ဘယ်တော့မှ အပြောင်းအလဲတွေရှိလာမှာ မဟုတ်ဘူး။ အာဏာရှင်ဆိုတဲ့ အပေါ်မှာ အခြေခံပြီးတော့ပဲ ဆက်သွားနေတယ်။ ပြည်သူလူထုတွေ ပါဝင်ရေးဆွဲထားတဲ့ အခြေခံဖွဲ့စည်းပုံ အသစ်နဲ့ ရွေးကောက်ပွဲစနစ်တွေ မရှိနေသေးရင်တော့ ၂၀၀၈ ပဲဖြစ်ဖြစ် အာဏာရှင်ရေးဆွဲတဲ့ စနစ်အောက်မှာပဲဖြစ်ဖြစ် လုပ်တဲ့ရွေးကောက်ပွဲတွေဟာ အမြဲတမ်းတော်လှန်ဆန့်ကျင်နေရတဲ့ အခြေအနေဖြစ်နေမှာပဲ။
▪️ မေး – အခုဆိုရင် ဧရာဝတီတိုင်းထဲမှာ ကြံ့ခိုင်ရေးအပါအဝင် ပါတီတချို့က ရွေးကောက်ပွဲဆိုင်ရာ လှုပ်ရှားမှုတွေ လုပ်နေပြီဆိုတော့ ဒါကရော ဘယ်လိုဖြစ်လာနိုင်လဲ။
ဖြေ – ဧရာဝတီမှာပဲဖြစ်ဖြစ် ရန်ကုန်မှာပဲဖြစ်ဖြစ် သူတို့လုပ်မယ်ပေါ့ ကြေညာထားတာ ၂ နှစ်ကျော်နေပြီ ရွေးကောက်ပွဲမတိုင်ခင်၊ ရွေးကောက်ပွဲကာလနဲ့ ရွေးကောက်ပွဲအလွန်ကာလတွေကို သူ(စစ်ကောင်စီ)ကိုင်တွယ်နိုင်ဖို့ လုပ်နေတယ်။ အခုလုပ်နေတာတွေက ပြည်သူကိုလှည့်စားနိုင်ဖို့ ရွေးကောက်ပွဲဆိုတာနဲ့ လိမ်လည်ဖို့ ကြိုးစားနေတာပဲဖြစ်တယ်။
▪️ မေး – ဒါနဲ့ဆက်စပ်ပြီး မေးချင်တာက လူငယ်တယောက်အနေနဲ့ ဧရာဝတီတိုင်းရဲ့ အနာဂတ် နိုင်ငံရေးကို ဘယ်လိုဖြစ်စေချင်လဲ။ တွေးထားတာမျိုးရှိလား။
ဖြေ – ကျွန်တော့်တဦးတည်းရဲ့ အမြင်ကတော့ ၂၀၂၁ အာဏာသိမ်းပြီးကတည်းက တော်လှန်ရေး အင်အားစုတွေဟာ ဖက်ဒရယ်ဒီမိုကရေစီ နိုင်ငံသစ်၊ ခေတ်နဲ့ စနစ်သစ်ကို တည်ဆောက်မယ်ဆိုပြီး ကြွေးကြော်လာတာဖြစ်တယ်။ စနစ်တိုင်းကတော့ အားသာချက် အားနည်းချက်ဆိုတာရှိတယ်။ ကျွန်တော်တို့ မြစ်ဝကျွန်းပေါ် ဧရာဝတီမှာဆိုရင် လူမျိုးစုံတာဖြစ်တဲ့အတွက် ဖက်ဒရယ်စနစ်က သင့်တော်တယ်။ ဆိုတော့ ကျွန်တော်တို့က ဧရာဝတီယူနစ်တခု ဖြစ်လာဖို့လိုတယ်။ ပြီးတော့မှ ကျွန်တော်တို့ဟာ စစ်မှန်တဲ့ ဖက်ဒရယ် ပြည်ထောင်စုဖြစ်လာဖို့ဆို ဘယ်လိုတွေလုပ်ကြမလဲ၊ ဘာတွေလိုမလဲဆိုတာတွေ လုပ်ရမယ်။
စစ်ကောင်စီကတော့ PR စနစ်နဲ့ အချိုးကျပေးမယ်ဆိုတာမျိုး စွဲဆောင်နေပေမယ့် ဘယ်လိုလုပ်မလဲဆိုတာ မသိရဘူးပေါ့နော်။
ကျွန်တော်တို့ ပြည်ထောင်စု တခု သေချာဖြစ်လာဖို့ ရွေးကောက်ပွဲစနစ်တွေကို ဘယ်လိုလုပ်သွားမလဲ၊ ပြည်ထောင်တွေစုပြီး ပြည်ထောင်စုဖြစ်လာဖို့အတွက် သေချာတဲ့ ရွေးကောက်ပွဲစနစ်တခုလိုတယ်။ ကျွန်တော် တယောက်တည်းအနေနဲ့ကတော့ ဧရာဝတီအတွက် လွှတ်တော် ဘယ်နှရပ်ထားမလဲ ဒေသန္တရ အုပ်ချုပ်ရေးတွေ ဘယ်လိုပေးမလဲ။ ပြီးတော့ ဗဟိုအစိုးရကို ဘယ်လိုအတိုင်းအတာထိ အခွန်ပေးမလဲ ဆိုတာကို စနစ်တွေထဲမှာ တခါတည်း ဆွေးနွေးလုပ်ဆောင်ရမယ့် အရာဖြစ်တယ်။ ဒါကတော့ တော်လှန်ရေးကာလအလွန် ဖွဲ့စည်းပုံအခြေခံ ဥပဒေတွေမှာ ပါရမှာတွေပဲဖြစ်တယ်ပေါ့နော်။
အခုက တော်လှန်ရေးကာလဖြစ်နေတဲ့အချိန်မှာ ကျွန်တော်တို့က ဧရာဝတီအပါအဝင် တနိုင်ငံလုံးရဲ့ အသွင်ကူးပြောင်းရေးကာလကို ကျွန်တော်တို့ သေချာသွားရမယ်။ အဲ့ဒီမှာ ဖက်ဒရယ် ကူးပြောင်းရေးကာလ အစီအမံကို ဘယ်လိုပြုလုပ်သွားမလဲ ဆိုတာကို သေချာလုပ်ရမယ်။ လက်ရှိ ဧရာဝတီရဲ့ အခြေအနေက တခြမ်းမှာ စစ်ပွဲတွေဖြစ်နေတယ်။ တခြမ်းမှာတော့ စစ်ပွဲတွေ ဖြစ်မနေဘူးပေါ့နော်။ အဲ့ဒီကြားထဲမှာ လူထုအထိနည်းတဲ့ နိုင်ငံရေး ပြုပြင်ပြောင်းလဲရေး အတွက်ကို ကျွန်တော်တို့ သွားနိုင်ရင်တော့ အထိခိုက်နည်းမှာပေါ့လေ။ ဖက်ဒရယ် ဒီမိုကရေစီရဲ့ စနစ်သစ်မှာ လူထုနဲ့အတူ ကျေလည်အောင် ဆွေးနွေးအတည်ပြုပြီးတော့မှ ဆက်သွားရမယ့် လုပ်ငန်းစဉ်ဖြစ်တာပေါ့နော်။
▪️ မေး – အခု ဧရာဝတီတိုင်းထဲမှာ လှုပ်ရှားနေတဲ့ ပါတီတွေထဲ ကရင်ပါတီတွေလည်း ပါတာတွေ့တယ်ဆိုတော့ သူတို့ရဲ့ အခြေအနေကိုရော ဘယ်လို သုံးသပ်ချင်လဲ။
ဖြေ – နိုင်ငံရေးမှာတော့ ယုံကြည်ရာလုပ်ကြတာပဲဖြစ်တယ်။ အခုကတော့ ဒီနိုင်ငံ စနစ်အပြောင်းအလဲကို လုပ်တဲ့နေရာမှာ ဒါကြီးက အဟန့်အတားတခုဖြစ်နေတယ်။ ဘာအဟန့်အတားဖြစ်လည်းဆိုတော့ ဒီအာဏာရှင်ကို ပဲပြန်လည်ရွေးချယ်တဲ့ ရွေးကောက်ပွဲမှာ အာဏာရှင်ရဲ့ အပေါင်းအပါနဲ့အတူ ပါဝင်တဲ့ နိုင်ငံရေး ယုံကြည်မှုလို့ပဲပြောရမှာပေါ့။ အခုဆိုရင် တနိုင်ငံလုံးမှာ ပါတီ ၉၄ ပါတီရှိတယ် မှတ်ပုံပြန်တင်တာက ၅၅ ပါတီပေါ့။ ကျန်တာတွေက မှတ်ပုံပြန်မတင်ဘူးပေါ့။ ဒီအချိန်မှာ သို့လောသို့လော မှတ်ပုံတင်မလားဆိုတာတွေလည်းရှိတယ်ပေါ့။ ဒါပေမယ့် ဒီရွေးကောက်ပွဲဟာ အာဏာရှင်ရေးဆွဲထားတဲ့ ဖွဲ့စည်းပုံအောက်က အာဏာရှင်ကျင်းပမယ့် ရွေးကောက်ပွဲသာဖြစ်တယ်။ ဒီတော့ အခုရှိနေတဲ့ ကရင်ပါတီ ၃ ပါတီက ဒါကို လေးလေးနက်နက် စဉ်းစားသင့်တယ်။ ကရင်လူမျိုးတွေအတွက် ပြည်သူလူထုအတွက် ဘာအကျိုးအမြတ်ရှိလဲဆိုတာကို သူတို့သေချာစမ်းစစ်သင့်တယ်။
▪️ မေး – အခုက မစမ်းစစ်ထားဘူးလို့ ဆိုလိုချင်တဲ့သဘောလား။
ဖြေ – ဒါက ကြံ့ခိုင်ရေးနိုင်ဖို့အတွက်ပဲဖြစ်ဖြစ်၊ စစ်တပ်နိုင်ဖို့အတွက်ပဲဖြစ်ဖြစ်၊ အာဏာရှင်နိုင်ဖို့အတွက်ပဲ တည်ဆောက်ထားတဲ့ ရွေးကောက်ပွဲဖြစ်တယ်။ အာဏာရှင်တွေက ဒီနိုင်ငံကို ခြယ်လှယ်နိုင်ဖို့ အာဏာရှင်နဲ့အတူကပ်ပြီးပါလာတာက မဟာလူမျိုးကြီးဝါဒဖြစ်တယ်။ ဒီလူတစုရဲ့ သွားနေတဲ့ သူတို့စီမံအုပ်ချုပ်ပြီး သူတို့ပေးမှရမယ် သူတို့ပေးမှ အခွင့်အရေးရမယ် သူတို့လုပ်ပေးမှ တခြားလူမျိုးစုတွေ ဖွံ့ဖြိုးတိုးတက်မယ်ဆိုတဲ့ မဟာလူမျိုးကြီးဝါဒ အတွေးအခေါ်ပါနေတဲ့ အာဏာရှင်လမ်းစဉ်သာဖြစ်တယ်။ ဒီလမ်းစဉ်မှာ ပါဝင်လုပ်ဆောင်နေတဲ့ ကရင်ပါတီတွေသာ မဟုတ်ဘူး လူနည်းစုပါတီတွေ အကုန်လုံးက စဉ်းစားသင့်တယ်။ ပြီးတော့ စစ်ကောင်စီ အာဏာရှင်က သွားနေတဲ့လမ်းစဉ်ကို ပြန်ပြီးတော့ အံတုဖို့လိုအပ်တယ်။ ဒီတိုင်းသွားနေရင်တော့ ဒီနိုင်ငံမှာရှိတဲ့ လူမျိုးစုကိုယ်စားပြုပဲဖြစ်ဖြစ် လူထုကိုယ်စားပြုပဲဖြစ်ဖြစ် ဒီပါတီတွေဟာ ဒီအာဏာရှင်ရဲ့ဆိုးမွေတွေကို ဆက်ပြီးတော့ ခံစားရမှာပဲဖြစ်တယ်။
▪️ မေး – အခုလုပ်ဖို့ကြိုးစားနေတဲ့ ရွေးကောက်ပွဲဟာ အာဏာရှင်တွေကို အသက်ဆက်ပေးနေတာဖြစ်တယ်လို့ ဆိုလိုချင်တာလား။
ဖြေ – ဒါက စစ်ကောင်စီက သူ့ရဲ့တရားဝင်မှုကို ပြန်လည်တည်ဆောက်တဲ့ လုပ်ငန်းစဉ်ပဲဖြစ်တယ်။ သူတို့ကတော့ ပြည်သူလူထု အထိခိုက်နည်းအောင် ဒီလိုရွေးကောက်ပွဲလုပ်တယ် ဘာညာကတော့ ပြောနေတာပဲ။ ဒီလိုရွေးကောက်ပွဲမှာ ပါဝင်မှ ပြုပြင်ပြောင်းလဲရေးကို သွားလို့ရမယ်ဆိုရင် နောက်ထပ် ၁၀နှစ် ၁၄ နှစ်ကြရင်လည်း အာဏာထပ်သိမ်းပြီးတော့ သူတို့အထိုင်ကို အာဏာရှင်တွေရဲ့အထိုင်ကို ကာကွယ်တဲ့ အခြေအနေကို နောက်မျိုးဆက်တွေက ကြုံတွေ့ရဦးမှာပဲ။ ဒီလိုမျိုး တကယ့်နိုင်ငံ ပြုပြင်ပြောင်းလဲပြီးတော့မှ ကောင်းမွန်တဲ့ နိုင်ငံတခုကို ထားခဲ့ချင်တာဆိုရင်တော့ ဒီအချိန်မှာ ရွေးကောက်ပွဲလုပ်တာက အဖြေမဟုတ်ဘူး။ နိုင်ငံရဲ့ ပြဿနာအရင်းအမြစ်တွေကို စိတ်ဆန္ဒရှိရှိနဲ့ ဖြေရှင်းဖို့ဆောင်ရွက်တာက အဖြေဖြစ်တယ်။ အခုအခြေအနေမှာဆိုရင်လည်း အာဆီယံ အလှည့်ကျ မလေးရှားဝန်ကြီးကလည်းပြောတယ် ရွေးကောက်ပွဲလုပ်တာ အဖြေမဟုတ်ဘူး။ တော်လှန်ရေး အင်အားစုတွေရော နိုင်ငံတကာကရော ရွေးကောက်ပွဲလုပ်တာက ပြဿနာကို ပိုကြီးစေတယ်ဆိုတာကို ပြောနေကြတာပဲ။ ပါတီတွေကလည်း သိနေကြတာပဲ။ သူတို့အတွေးကတော့ စစ်တပ်ကပေးထားတဲ့ နိုင်ငံရေး အရွေ့ကိုသူတို့ဝင်ပါမယ် တပ်ကပေးထားတဲ့ဘောင်ထဲက သူတို့ဝင်လုပ်မယ် သူတို့စကားတွေ အသံတွေဖော်ပြမယ်ပေါ့နော်။ ဒါက စစ်တပ်ပေးထားတဲ့ နိုင်ငံရေး အောက်မှာသူတို့လုပ်နေရတာလေ။ ဒါက လွတ်လပ်တဲ့ နိုင်ငံရေး၊ သွားချင်တဲ့ အရွေ့ကို သွားနေရတဲ့ နိုင်ငံရေး မဟုတ်ဘူးလေ။ အာဏာရှင်က ပေးထားတဲ့ နိုင်ငံရေး ပေးထားချက်ပေါ်မှာ မျှော်တော်ယောင်လုပ်ရတဲ့ နိုင်ငံရေးပဲဖြစ်တယ်။
▪️ မေး – ဒီမျှော်တော်ယောင်နိုင်ငံရေးမှာ ကရင်နာမည်နဲ့ ပါတီဘယ်နှခုလောက် ပါဝင်နေလဲ။ သူတို့ကို ကရင်လူထုကရော ဘယ်လောက်ထောက်ခံလဲ။
ဖြေ – အကြမ်းအားဖြင့်ကြည့်မယ်ဆိုရင်တော့ ကရင်ပါတီ ၄ ပါတီရှိတယ်။ ကရင်ပါတီ ၄ ပါတီရဲ့ ဘယ်အစုအဖွဲ့တွေက အာဏာရှင်နဲ့ ဆက်စပ်ပြီးတော့ ဘယ်သူတွေကတော့ အာဏာရှင်နဲ့ စုဖွဲ့ပြီးတော့ မပါဝင်လာဘူးလဲ ဆိုတာ ကရင်ပြည်သူတွေက သိတယ်။ ဧရာဝတီတိုင်းထဲမှာ ကြံ့ခိုင်ရေးကို အားပေးတဲ့ ကရင်တွေလည်းရှိတယ်၊ NLD ကို အားပေးတဲ့ ကရင်တွေလည်းရှိတယ်၊ တခြားသော လယ်သမားဘာညာဆိုပြီး အားပေးတဲ့သူတွေလည်းရှိတယ်။ ဆိုတော့ ဒါဟာ ဧရာဝတီမှာရှိတဲ့ ကရင်လူထုတွေရဲ့ နိုင်ငံရေး ရေချိန်ဘယ်လောက်ရှိလဲ။ သူတို့ ဘယ်လောက်ထိ အမျိုးသားလွတ်မြောက်ရေးနဲ့ ပြည်သူလွတ်မြောက်ရေးကို တွေးတောရွေးချယ်နိုင်တဲ့ နိုင်ငံရေး ရေချိန်ကို ဖော်ပြနေတဲ့ အခြေအနေဖြစ်တယ်။ ယှဉ်ပြောရရင် ရခိုင်မှာဆိုရင် ရခိုင်ပါတီတွေပြိုင်တယ် NLD ပြိုင်တယ် ကြံ့ခိုင်ရေးပြိုင်တယ် ရခိုင်မှာ မနိုင်ဘူး။ ရခိုင်ပြည်နယ်မှာ ရခိုင်တွေနိုင်တယ်။ SNLD ဆိုရင်လည်း ဒီလိုပဲ ဒုတိယအများဆုံး မဲနိုင်တဲ့သူဖြစ်လာတယ်။ ဒီတော့ အမျိုးသားလွတ်မြောက်ရေးအတွက် ပါတီထောင် ရွေးကောက်ပွဲလုပ်တဲ့ အစုအဖွဲ့တွေက သူရဲ့လူမျိုးတွေရဲ့ ယုံကြည်မှုရအောင် မလုပ်နိုင်တဲ့ အခြေအနေရှိသလို ကရင်လူမျိုးတွေရဲ့ နိုင်ငံရေး ရေချိန်က ဘယ်အတိုင်းအတာထိ သွားနေလဲဆိုတာကို မှန်းဆကြည့်လို့ရတယ်။ ခုကတော့ သူ့အိုးနဲ့ သူ့ဆန်ပေါ့နော် သူ့ပရိတ်သတ်ကတော့ ရှိနေတာပေါ့နော်။ ဒါက စနစ်ကဖန်တီးထားတာကိုး။ ဒီတော့ ဒီရွေးကောက်ပွဲမှာ ထောက်ခံတဲ့သူတွေလည်း ရှိနိုင်တာပေါ့။
▪️ မေး – ရွေးကောက်ပွဲနဲ့ ပတ်သက်တဲ့ ဥပဒေတွေအများကြီးထုတ်ပြီး ဒီရွေးကောက်ပွဲကို လုပ်ချင်နေတာမှာ ပြည်သူအပေါ် ဘာတွေသက်ရောက်မှု ရှိလာနိုင်မယ်လို့ ထင်လဲ။
ဖြေ – သူက သူ့ရွေးကောက်ပွဲကို သူ့အစီအစဉ်နဲ့ အကုန်လုံးကို သူ့လက်သူ့ခြေတွေချည်းပဲဖြစ်အောင် စီမံတဲ့နေရာမှာ ဥပဒေတွေက အမျိုးမျိုးထွက်လာမှာပဲ။ သူ့လုပ်ငန်းအောင်မြင်ဖို့အတွက်ပေါ့။ အဲ့ဒီမှာ အဓိကကတော့ ခြိမ်းခြောက်မှုတွေပဲ။ ဒီဆိုက်ဘာလုံခြုံရေး ဥပဒေဆိုရင် fb တွေ vpn တွေကို ပိတ်လိုက်လို့ရတာတွေ ပါနေတယ်။ နောက်ခု ရွေးကောက်ပွဲကို ဆန့်ကျင်တားဆီးမယ်ဆိုရင် ဒီလူတွေကို တရားစွဲမယ် ထောင်ချမယ်ပေါ့။ ဒါက ဘာကိုဖြစ်စေလဲဆိုတော့ လူထုကိုယ်တိုင်က ပါဝင်ပြီးတော့မှ မဲမထည့်ချင်တဲ့ ဆန္ဒကို မဲလာထည့်ဖို့အတွက် မဲလာမထည့်ရင် နင်တို့ကို ထောင်ထဲထည့်မယ်ဆိုတဲ့ ပုံစံမျိုးလုပ်တာပါပဲ။ ဒါက တကယ့်ကို ကြောက်စရာကောင်းတဲ့ အာဏာရှင်ရဲ့ လုပ်ရပ်ပဲ။ သူဟာ ဥပဒေထုတ်ဖို့ တရားဝင်ရဲ့လားဆိုတာကို မေးခွန်းတွေ ရှိနေတဲ့ကြားထဲက သူ့ ဥပဒေသူထုတ် သူ့လူသူရွေး အတင်းအဓမ္မရွေးကောက်ပွဲမှာ မဲလာပေးရမယ် ဆန့်ကျင်လို့မရဘူး သပိတ်မှောက်လို့မရဘူး ဆိုပြီးလုပ်တဲ့ပုံစံပဲပေါ့။ ဇွတ်ဒီမိုကရေစီ လုပ်နေတာလေနော်။
▪️ မေး – အာဏာရှင်လုပ်ပေးတဲ့ ရွေးကောက်ပွဲမှာပါဝင်ဖို့၊ ရွေးကောက်ပွဲဖြစ်မြောက်ဖို့ ပံ့ပိုးပေးနေတဲ့သူတွေကို ဘာပြောချင်တာရှိမလဲ။
ဖြေ – ကျွန်တော်တို့ ဒီနိုင်ငံမှာ ကရင်မှ မဟုတ်ဘူး ဗမာ မှမဟုတ်ဘူး ရခိုင်မှ မဟုတ်ဘူးပေါ့နော်။ ဒီလူထုတွေက ပါဝင်ပြီးတော့ လုပ်နေတယ်ဆိုရင် ပြည်သူလူထုရဲ့ လုပ်စွမ်းနိုင်တဲ့ နိုင်ငံရေး စွမ်းအားကို ဒီနိုင်ငံ အာဏာရှင် သက်ဆိုးရှည်ဖို့အတွက်ကို အသက်သွင်းချင်တဲ့ လူထုလို့ပဲ ပြောရမှာဖြစ်တယ်။ တကယ်ပြည်သူလူထုရဲ့ လွတ်မြောက်ရေးကို သွားချင်တယ်ဆိုလို့ရှိရင် လူထုကိုယ်တိုင်က ကိုယ်ကြမ္မာကိုယ်ဖန်တီးခွင့်ကို သွားရမှာဖြစ်တယ်။ ကိုယ့်ရဲ့ အခွင့်အရေး၊ ကိုယ့်ရဲ့ကြမ္မာ၊ ကိုယ့်ရဲ့လွတ်လပ်ခွင့်ကို ကိုယ်တိုင်လုပ်ရမယ်ဆိုတာကို လူထုကို တိုက်တွန်းချင်တယ်ပေါ့နော်။