ဇွန်၊ ၁၅
ကူဝိတ်နိုင်ငံက မီးလောင်မှုမှာ သေဆုံးခဲ့တဲ့ အိန္ဒိယ ရွှေ့ပြောင်းလုပ်သား ၄၀ ကျော်ရဲ့ ရုပ်အလောင်းတွေကို နေရပ်နိုင်ငံဆီ ပြန်လည် သယ်ဆောင်ခဲ့ကြောင်း သိရပါတယ်။
အိန္ဒိယ လေတပ်ရဲ့ လေယာဉ်ကြီး တစီးဟာ ရုပ်အလောင်း ၄၅ ခုကို တင်ဆောင်ပြီး သယ်ဆောင်ပြီး နိုင်ငံတောင်ပိုင်း၊ ကီရာလာပြည်နယ်ထဲက ကိုချီလေဆိပ်ဆီ ဇွန်လ ၁၄ ရက်နေ့မှာ ဆင်းသက်ခဲ့ပါတယ်။ အဲဒီမှာ ရုပ်အလောင်း တချို့ကို အာဏာပိုင်တွေဆီ လွှဲပေးပြီးရင် ဒေလီမြို့တော်ဆီ ခရီးဆက်မှာ ဖြစ်ပါတယ်။
ဇွန်လ ၁၂ ရက်နေ့တုန်းက ကူဝိတ်နိုင်ငံ၊ မန်းဂက်ဖ်မြို့က ရွှေ့ပြောင်းလုပ်သားတွေ အဓိက စုဝေးနေထိုင်ရာ လူနေတိုက်တလုံး မီးလောင်မှုကြောင့် လူ ၅၀ လောက် သေဆုံးခဲ့တာ ဖြစ်ပါတယ်။ အဲဒီထဲမှာ အိန္ဒိယ နိုင်ငံသား ၄၅ ဦး ပါဝင်ခဲ့ပါတယ်။ တိုက်တခုလုံးမှာ အိန္ဒိယ ရွှေ့ပြောင်းလုပ်သား ၁၇၆ ဦးထိ နေထိုင်နေခဲ့တာပါ။
နောက်ထပ် သေဆုံးသူ ၅ ဦးထဲက ၃ ဦးဟာ ဖိလစ်ပိုင် နိုင်ငံသားတွေဖြစ်ပြီး ကျန်တဲ့ ၂ ဦးက ဘယ်သူဘယ်ဝါ မခွဲခြားနိုင်သေးပါဘူး။ အိန္ဒိယ နိုင်ငံသား အများစု အပါအဝင် နောက်ထပ်လူတွေ ဒါဇင်တော်တော်များများလည်း မီးလောင်မှုမှာ ဒဏ်ရာရခဲ့ကြပါတယ်။
ရေနံအထွက် ကြွယ်ဝတဲ့ ပင်လယ်ကွေ့နိုင်ငံ ကူဝိတ်မှာ လူဦးရေ သုံးပုံနှစ်ပုံလောက်ဟာ ပြည်ပ ရွှေ့ပြောင်း အလုပ်သမားတွေ ဖြစ်ပါတယ်။ အထူးသဖြင့် အာရှတောင်ပိုင်းနဲ့ အရှေ့တောင်အာရှက အလုပ်ကြမ်း လုပ်ကိုင်သူတွေ၊ ဆောက်လုပ်ရေး အလုပ်သမားတွေ ကူဝိတ်မှာ အများအပြား ရှိနေပြီး သူတို့ နေထိုင်ရတဲ့ အခြေအနေတွေအပေါ် လူ့အခွင့်အရေး တက်ကြွလှုပ်ရှားသူတွေက အရင်ကတည်းက စိုးရိမ်တကြီး ဝေဖန် ထောက်ပြမှုတွေ ရှိခဲ့ပါတယ်။
အိန္ဒိယ ပြည်ထဲရေးဝန်ကြီး ကာတီဗာဒန်ဆင်းဟာ မီးလောင်မှုအပြီး ကူဝိတ်ကို ကိုယ်တိုင် သွားရောက်ခဲ့ပြီး အလောင်းတွေ ပြန်သယ်ရေးကိစ္စကို ကြီးကြပ်ခဲ့ပါတယ်။ သူက သေဆုံးသူတွေ ဘယ်သူဘယ်ဝါ ဆိုတာကို သိရှိနိုင်ဖို့ DNA စစ်ဆေးမှုတွေပါ လုပ်ခဲ့ရကြောင်း ပြောပါတယ်။
သေဆုံးသူတွေထဲက ၂၃ ဦးဟာ ကီရာလာ ပြည်နယ်ကဖြစ်ပြီး ၇ ဦးက တမီလ်နာဒူ၊ အန်ဟရာ ပရာဒေ့ရှ်နဲ့ အူတာ ပရာဒေ့ရှ်တို့က ၃ ဦးစီ၊ ဩရိသ ပြည်နယ်ထဲက ၂ ဦး၊ ဘီဟာ၊ ပန်ဂျပ်၊ ကာနာတကာ၊ မဟာရှက်ရှ်ထရာ၊ အနောက်ဘင်္ဂလား၊ ဂျာခန်နဲ့ ဟာယာနာတို့က ၁ ဦးစီ ပါဝင်တယ်လို့ ခန်းက အတည်ပြုခဲ့ပါတယ်။
အလောင်းတွေကို နိုင်ငံ ပြန်သယ်ဖို့ အိန္ဒိယ အစိုးရက လေတပ် လေယာဉ်တစီးကို အထူးတလည် စီစဉ်ပေးခဲ့တာလို့လည်း ခန်းက ဆိုပါတယ်။ အခုဖြစ်စဉ်ဟာ နိုင်ငံအတွက် အကြီးအကျယ် ကြေကွဲစရာ ကောင်းခဲ့ကြောင်း၊ အစိုးရက သေဆုံးသူတွေရဲ့ မိသားစုတွေဆီ နစ်နာကြေးတွေ ပေးအပ်ဖို့ စီစဉ်ထားကြောင်းလည်း ခန်းက ပြောကြားသွားပါတယ်။
အခုမီးလောင်မှုဟာ ကူဝိတ်နိုင်ငံရဲ့ ခေတ်သစ် သမိုင်းမှာလည်း အဆိုးဆုံး မတော်တဆမှုတွေထဲက တခုအဖြစ် မှတ်တမ်းဝင်ခဲ့ကြောင်း သိရပါတယ်။
Ref: BBC
