အောက်တိုဘာ၊ ၂၁
စင်ကာပူအခြေစိုက် ကုမ္ပဏီတွေက စစ်ကောင်စီအတွက်လက်နက်ဝယ်ယူပေးနေတာနဲ့ ငွေကြေးစီးဆင်းမှု မှာ ကူညီ ပေးနေတာတွေကို တားဆီးပေးဖို့စင်ကာပူအစိုးရကိုတောင်းဆိုတဲ့လှုပ်ရှားမှုအတွက် လူထုလက်မှတ်တွေ ကောက်ခံ စုဆောင်းနေတယ်လို့ သွေးစွန်းငွေဖြတ်တောက်ရေးအဖွဲ့တာဝန် ရှိသူတဦးက ပြောပါတယ်။
အဲ့ဒီလှုပ်ရှားမှုမှာ မြန်မာပြည်သူတွေရဲ့ ထောက်ခံလက်မှတ်တွေနဲ့အတူ အာဏာသိမ်းမှု ရက်တထောင်ပြည့်မယ့် အောက်တိုဘာ ၂၉ရက်မှာ စင်ကာပူအစိုးရဆီ စာပေးပို့တောင်းဆိုတာအပါအဝင် အွန်လိုင်းနဲ့မြေပြင်လှုပ်ရှားမှုတွေ လည်းပါဝင်မယ်လို့ သိရပါတယ်။
သွေးစွန်းငွေဖြတ်တောက်ရေးအဖွဲ့ဟာ အာဏာသိမ်းစစ်ကောင်စီရဲ့ဝင်ငွေစီးဆင်းမှုတွေကို ဖြတ်တောက်နိုင်ဖို့ အသိပညာပေးမှုနဲ့ လူထုလှုပ်ရှားမှုတွေဖော်ဆောင်နေတဲ့တော်လှန်ရေးအင်အားစုအဖွဲ့အစည်းတခုဖြစ်ပါတယ်။
အဲဒီလှုပ်ရှားမှုကို ပြည်ပနိုင်ငံပေါင်း နှစ်ဆယ် နီးပါးနဲ့ပြည်တွင်းမှာ အခုလနောက်ဆုံးပတ်အောက်တိုဘာ ၂၅ရက် ကနေ ၃၁ရက်အထိ တပတ်ကြာ တပြိုင်တည်းပြုလုပ်မှာဖြစ်တယ်လို့သိရပါတယ်။
အဲ့ဒီလှုပ်ရှားမှုမှာ မြန်မာပြည်သူနှစ်သောင်းခွဲကျော်ရဲ့ ထောက်ခံလက်မှတ်တွေနဲ့ စင်ကာပူအစိုးရဆီကို အိတ်ဖွင့် ပေးစာ ပေးပို့တောင်းဆိုတာ၊ပြည်ပနိုင်ငံတွေက စင်ကာပူသံရုံးတွေရှေ့မှာ ဆန္ဒပြတောင်းဆိုတာ၊ပြည်တွင်းမှာ သပိတ်လှုပ်ရှားမှုလုပ်တာတွေပါဝင်မယ်လို့ သွေးစွန်း ငွေ ဖြတ်တောက်ရေးအဖွဲ့တာဝန်ရှိသူကပြောပါတယ်။
“အွန်လိုင်းလှုပ်ရှားမှုတွေက နိုင်ငံတကာကို ထောက်ပြတာဖိအားပေးတောင်းဆိုတဲ့အခါ မရှိမဖြစ်လိုအပ်တဲ့ အရေး ကြီး အရာတခုဖြစ်တယ်၊ပြည်တွင်း ကသပိတ်ထွက်နိုင်သူတွေ ထွက်နေသလို လက်မှတ်ထိုးကမ်ပိန်းမှာ ပါဝင်ပေး ကြဖို့လူထုအင်အား လူထုအသံများများပါမှာ နိုင်ငံတကာအနေနဲ့ စစ်အုပ်စုကို အရေးယူဒဏ်ခတ်မှုတွေ ပြုလုပ် လာမှာ” လို့သူကပြောပါတယ်။
အာဏာသိမ်းကာလ နှစ်နှစ်ကျော်အတွင်း စင်ကာပူအခြေစိုက် လက်နက်ကုမ္ပဏီ ၁၃၈ ခုက အမေရိကန်ဒေါ်လာ ၂၅၄ သန်း တန်ဖိုးရှိ စစ်လက်နက်ပစ္စည်းတွေ၊စစ်ဖက်နဲ့အရပ်ဖက်နှစ်မျိုးသုံး ကုန်ပစ္စည်းတွေကို အာဏသိမ်းစစ် တပ်ဆီ ရောင်းချခဲ့တယ်လို့ ကုလသမဂ္ဂ အထူးကိုယ်စားလှယ်ရဲ့ အစီရင်ခံစာမှာ ဖော်ပြထားပါတယ်။
စင်ကာပူအစိုးရတာဝန်ရှိသူတွေကတော့ အဲ့ဒီဖော်ပြချက်တွေကို ငြင်းဆန်ထားပါတယ်။
ဒါပေမယ့် နောက်ကွယ်က နေ စစ်ကောင်စီနဲ့ထိတွေ့ပတ်သက်မှုတွေဆက်ရှိနေဆဲဖြစ်ပြီး လက်ရှိစစ်ကောင်စီရဲ့ လေကြောင်းတိုက်ခိုက်မှုတွေ အတွက် အစိတ်အပိုင်းတွေကို စင်ကာပူနိုင်ငံကကုန်ကြမ်းအနေနဲ့ တင်ပို့ပေးနေ တာ လို့ သွေးစွန်းငွေအဖွဲ့တာဝန်ရှိ သူကပြောပါတယ်။
“တဖက်မှာ စင်ကာပူအစိုးရက မြန်မာစစ်အုပ်စုကို လက်နက်ရောင်းချမှု ဖြတ်တောက် ထားတယ်လို့ လိမ် ထား တယ်၊အဲဒီအတွက်သူတို့ပြောတဲ့အတိုင်း လက်နက်တင်ပို့မှုကို ဖြတ်တောက်ဖို့ တင်ပို့ခဲ့တဲ့ ကုမ္ပဏီတွေကို အ ရေးယူဖို့ တိုက်တွန်းတောင်းဆိုတာဖြစ်တယ်” လို့ သူကပြောပါတယ်။
ဒါ့အပြင် စင်ကာပူနိုင်ငံရဲ့ ဘဏ်ကိုးခုမှာရှိနေတဲ့မြန်မာနိုင်ငံရဲ့ နိုင်ငံခြားအရန်ငွေ ဒေါ်လာ၄ဒသမ ၆ဘီလီယံ ကို လည်းစစ်ကောင်စီကိုအသုံးပြုခွင့်လုံးဝမပေးဖို့၊စစ်ကောင်စီတပ်ရဲ့ လက်နက် ဝယ်ယူရေးအတွက် စင်ကာပူဘဏ် တွေကို အသုံးချနေမှုကိုပိတ်ဆို့အရေးယူပေးဖို့စတဲ့အချက်တွေ တောင်းဆိုသွားမယ်လို့ သိရပါတယ်။
အခုလှုပ်ရှားမှုဟာ တော်လှန်ရေးအတွက် အရေးပါတဲ့လှုပ်ရှားမှုတခုဖြစ်ပြီး အနောက်အုပ်စုရဲ့ အရေးယူပိတ်ဆို့မှု တွေကြောင့် စစ်ရေးအသုံးစရိတ် ထိခိုက်နေတဲ့ စစ်ကောင်စီတပ်ကို စင်ကာပူနိုင်ငံကပါ ထပ်ပြီး ပိတ်ဆို့မယ်ဆိုရင် တော်လှန်ရေးအတွက် အကျိုးများမယ်လို့ သွေးစွန်းငွေဖြတ်တောက်ရေးအဖွဲ့တာဝန်ရှိသူကပြောပါတယ်။
“လက်နက်ခဲယမ်းလမ်းကြောင်းတွေကို ဖြတ်တောက်နိုင်တဲ့အထိ အကျိုးရှိမယ်၊ဒါမှသာလျှင် တော်လှန်ရေး ကာလ အမြန်ပြီးမြောက်မှာဖြစ်တယ်၊တဖက်မှာ တော်လှန်ရေးအဖွဲ့တွေ ERO တွေနဲ့ ပြည်သူတွေကလည်း သွေးထွက် သံယိုနည်းပြီး အမြန်အိမ်ပြန်နိုင်မှာဖြစ်တယ် ” လို့ သူကဆိုပါတယ်။
သွေးစွန်းငွေဖြတ်တောက်ရေးလုပ်ရှားမှုအဖွဲ့ အပါအဝင် တော်လှန်ရေးအင်အားစုတွေနဲ့ အရပ်ဖက်အဖွဲ့အစည်း စုစုပေါင်း (၂၀၀)က ပြီးခဲ့တဲ့ ဩဂုတ်လ ၂၂ ရက်ကလည်း စင်ကာပူအစိုးရဆီး အိတ်ဖွင့်ပေးစာပေးပို့တောင်းဆို ခဲ့ပေမယ့်တစုံတရာ တုံ့ပြန်မှုမရှိတာကြောင့် ဒုတိယအကြိမ်အနေနဲ့ လူထုလက်မှတ်တွေနဲ့ထပ်ပြီးတိုက်တွန်းတောင်းဆိုတာဖြစ်တယ်လို့ လည်း ဆိုပါတယ်။
စစ်ကောင်စီအတွက် စစ်လက်နက်ပစ္စည်းတွေ ထောက်ပံ့ပေးနေတာတွေဆက်ရှိနေကြောင်းဝေဖန်မှု တွေရှိခဲ့ပြီး နောက် စင်ကာပူအစိုးရက ကုမ္ပဏီတချို့ကိုအရေးယူတာရှိသလို မြန်မာနိုင်ငံကငွေကြေးစီးဆင်းမှုတွေ အတွက် အရေးပါတဲ့ UOB ဘဏ်ကလည်း မြန်မာနိုင်ငံဘဏ်တွေနဲ့ လုပ်ကိုင်နေတဲ့ဘဏ်လုပ်ငန်းတွေကိုရပ်ဆိုင်းခဲ့ပါတယ်။
ပြည်တွင်းက စစ်ကောင်စီကို တော်လှန်နေတဲ့ သပိတ်အင်အားစုတွေကတော့ စစ်အုပ်စုရဲ့ ဝင်ငွေလမ်းကြောင်းကို တားဆီး နိုင်ဖို့အတွက် စစ်တပ်ထုတ်ကုန်တွေ အပါအဝင် စစ်တပ်နဲ့ ပက်သက်တဲ့ လူသုံးကုန်၊ယာဉ်လိုင်းနဲ့ဟိုတယ် လုပ်ငန်းစတဲ့ ဝန်ဆောင်မှုတွေကို မပက်သက်ဘဲ သပိတ်မှောက်ဆန့်ကျင်ကြဖို့ တိုက်တွန်းထားပါတယ်။
