ဇွန်၊ ၃၀
ရန်ကုန် စီးပွားရေးတက္ကသိုလ် ကျောင်းသားများသမဂ္ဂ (ရွာသာကြီးနယ်မြေ) ဒုဥက္ကဌဖြစ်သူ ကိုထက်ပိုင်စိုး ကို စစ်ကောင်စီက ဒီကနေ့ ဇွန်လ ၃၀ ရက်မှာအလုပ်နဲ့ ထောင်ဒဏ်ဆယ်နှစ် ချမှတ်လိုက်တယ်လို့ ရန်ကုန် စီးပွားရေးတက္ကသိုလ် ကျောင်းသားများသမဂ္ဂ (ရွာသာကြီးနယ်မြေ)က သတင်းထုတ်ပြန်ပါတယ်။
ပြီးခဲ့တဲ့ ၂၀၂၂ ခုနှစ်၊ ဧပြီလ ၂၁ ရက်က သင်္ဃန်းကျွန်းမြို့နယ်အတွင်း ဖမ်းဆီးခံခဲ့ရတဲ့ ကိုထက်ပိုင်စိုးကို ရန်ကုန်တိုင်းဒေသကြီး အရှေ့ပိုင်းခရိုင်တရားရုံးမှာ အကြမ်းဖက်မှုတိုက်ဖျက်ရေး ဥပဒေပုဒ်မ ၅၀ (ည)နဲ့ တရားစွဲဆိုခဲ့ပြီး တနှစ်ကျော်အကြာမှာ အခုလို အမိန့်ချခံခဲ့ရတာပါ။
ကိုထက်ပိုင်စိုးဟာ တရားရင်ဆိုင်နေရတဲ့ ကာလမှာ ဖိနှိပ်မှုတွေ ခြိမ်းခြောက်မှုတွေလည်း ရင်ဆိုင်ခဲ့ရတယ်လို့ နီးစပ်သူတွေက ပြောပါတယ်။
” ဖိနှိပ်ခံရတာကတော့ ရုံးထုတ်ပြီးလို့ ထောင်ထဲ ပြန်ဝင်လို့ရှိရင် မတရား စစ်ဆေးခံရတာပေါ့၊ လူ့ဂုဏ်သိက္ခာနဲ့ မညီဘဲ ခန္ဓာကိုယ်အနှံ့ ရှာဖွေတာပေါ့၊ ဒါကတော့ နိုင်ငံရေးအကျဥ်းသားတိုင်း ကြုံရတာပါပဲ။ နောက်ပြီး အထဲမှာ ဆဲဆို ရိုက်နှက်ခံရတာတွေလည်း ရှိတယ်၊ ပြီးရင် ထောင်ထဲက သတင်းတွေ အပြင်ရောက်လို့ လှုပ်လှုပ်ရှားရှားဖြစ်သွားရင် ခေါ်ပြီး ရိုက်ခံရတာလည်း ရှိတယ် ” လို့ ရန်ကုန်စီးပွားရေးတက္ကသိုလ် ကျောင်းသားများသမဂ္ဂ (ရွာသာကြီးနယ်မြေ) တာဝန်ရှိသူတဦးက DNA ကို ပြောပါတယ်။
စာရင်းအင်းပညာ၊ တတိယနှစ်ကျောင်းသား ကိုထက်ပိုင်စိုးဟာ လက်ရှိမှာတော့ အင်းစိန်ထောင်မှာ အကျဥ်းချခံထားရပြီး လောလောဆယ် နောက်ထပ်ရင်ဆိုင်ရမယ့် အမှုတော့ မရှိတော့ဘူးလို့ သိရပါတယ်။
ဒါ့အပြင် ကိုထက်ပိုင်စိုးနဲ့ အတူ ဖမ်းဆီးခံခဲ့ရပြီး ပုဒ်မ ၅၀ (ည)နဲ့ အမှုတွဲ အတူတူတပ်ခံရတဲ့ မနွေးရတီတိုး လည်း ထောင်ဒဏ်ဆယ်နှစ် ချမှတ်ခံခဲ့ရတယ်လို့ သိရပါတယ်။
ရန်ကုန်စီးပွားရေးတက္ကသိုလ် ကျောင်းသားများသမဂ္ဂဘက်ကတော့ အခုလို အကြမ်းဖက်ပုဒ်မတွေနဲ့ ထောင်ဒဏ်ချမှတ်တာဟာ သက်သေခိုင်လုံမှုမရှိဘဲ တဖက်သတ်စွပ်စွဲ အမိန့်ချတာသာဖြစ်တယ်လို့ ပြောပါတယ်။
” သူတို့တပ်တာက ၅၀ (ည)ဆိုတော့ အကြမ်းဖက် ထောက်ပံ့တဲ့ ပုဒ်မပေါ့၊ အခုက ထောက်ပံ့ခံရတဲ့ အဖွဲ့ရဲ့ သက်သေထွက်ဆိုချက်လည်း မရှိဘူး၊ ဘယ်အဖွဲ့ကို ထောက်ပံ့တယ်ဆိုတဲ့ သက်သေလည်း သူတို့မှာ မရှိဘူး၊ တဖက်သက် ပုဒ်မတွေတပ်ပြီး ချချင်သလို ချတာ၊ ဒါပေမယ့် ဒါက တရားဥပဒေအတိုင်း သွားရင်သာ လိုတာပါ၊ အခု စစ်တပ်က သူတို့ကို ဆန့်ကျင်တဲ့ လူငယ်တွေကို ဖမ်းပြီး လုပ်ချင်သလိုလုပ်နေတာ၊ အခုလို ထောင်ချတာက ဆန်းတော့ မဆန်းပါဘူး။ ကျနော်တို့ကတော့ အာဏာရှင်မပြုတ်သရွေ့ ဆက်တော်လှန်သွားမယ်၊ ပြည်သူတွေကိုလည်း ပါဝင်ပေးကြဖို့ တောင်းဆိုချင်တယ် ” လို့ သမဂ္ဂ တာဝန်ရှိသူတဦးက ပြောပါတယ်။
ပုဒ်မ ၅၀ (ည)ဟာ အကြမ်းဖက်အဖွဲ့အဖြစ် သတ်မှတ်ထားတဲ့ အဖွဲ့အစည်းတခုခုကို ငွေကြေးထောက်ပံ့ခြင်းဆိုင်ရာ လုပ်ငန်းများပြုလုပ်တာကို တွေ့ရှိပါက တရားစွဲဆိုနိုင်တဲ့ ပုဒ်မဖြစ်ပြီး ပြစ်မှုထင်ရှားပါက ထောင်ဒဏ်ဆယ်နှစ်ကနေ ထောင်ဒဏ်တသက်အထိ ချမှတ်နိုင်တဲ့အပြင် ငွေဒဏ်လည်း ချမှတ်နိုင်တဲ့ ပုဒ်မဖြစ်ပါတယ်။
ပြီးခဲ့တဲ့ ၂၀၂၂ ခုနှစ်၊ ဒီဇင်ဘာလ ၂၉ ရက်နေ့ကလည်း ရန်ကုန်စီးပွားရေးတက္ကသိုလ် (ရွာသာကြီးနယ်မြေ) ကျောင်းသူဟောင်းတဦးဖြစ်သူ မယုယုမွန်ကို စစ်ကောင်စီက အကြမ်းဖက်ပုဒ်မတွေနဲ့ ထောင်ဒဏ်ဆယ်နှစ် ချမှတ်ခဲ့ပါသေးတယ်။
အလားတူပဲ ရန်ကုန်စီးပွားရေးတက္ကသိုလ် ကျောင်းသားများသမဂ္ဂ (ရွာသာကြီးနယ်မြေ) ဘဏ္ဍာရေးမှူးဖြစ်သူ မယဥ်မြတ်နိုးဦး ကိုလည်း စစ်ကောင်စီက ပုဒ်မ ၅၀၅ (က) အမှုနှစ်ခုနဲ့ ထောင်ဒဏ်ခြောက်နှစ် ချမှတ်ထားတယ်လို့ သိရပါတယ်။
ဓာတ်ပုံ – ရန်ကုန်စီးပွားရေးတက္ကသိုလ် ကျောင်းသားများသမဂ္ဂ (ရွာသာကြီးနယ်မြေ)
