မတ်၊ ၃၀
စစ်ကိုင်းတိုင်း၊ ဝက်လက်ဒေသအတွင်းမှာ လက်နက်ဖိုးလို့ဆိုကာ ဒေသအခြေစိုက် PDF တပ်ရင်းက တအိမ်ကျပ်နှစ်သောင်းတောင်ယူမှုကို စုံစမ်းစစ်ဆေးဖို့နဲ့ အလားတူထပ်မဖြစ်အောင် စီမံဖို့ အမျိုးသားညီညွတ်ရေးအစိုးရ (NUG)ပြည်ထောင်စုဝန်ကြီး ချုပ်မန်းဝင်းခိုင်သန်းက ညွှန်ကြားလိုက်ပါတယ်။
” ဒီလအတွင်းမှာ မီဒီယာပေါ်ထိ တက်လာတဲ့ ကိစ္စတွေရှိနေသလို တိုင်စာတက်လာတဲ့ ကိစ္စတွေလည်း ရှိနေပါတယ်” လို့ NUG ဝန်ကြီးချုပ်က ပြောပါတယ်။
NUG အစိုးရအဖွဲ့ရဲ့ ကြားကာ ဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီအ စည်းအဝေးကို ဒီကနေ့ ပြုလုပ်ရာမှာ ဝန်ကြီးချုပ်မန်းဝင်းခိုင်သန်းက အငြင်းပွားဖွယ်မြေပြင်အခြေအနေတချို့ကို ဖြေရှင်းဖို့ ထည့်ပြောခဲ့တာပါ။
အဲ့ဒီအစည်းအဝေးမှာ ဝန်ကြီးချုပ်မန်းဝင်းခိုင်သန်းက ရေစကြိုပြည်သူ့အုပ်ချုပ်ရေးအဖွဲ့နဲ့ ဗဟိုကော်မတီတာဝန်ရှိသူတွေကြား တင်းမာနေတာ၊ ဝက်လက် PDF က လက်နက်ဖိုးလို့ဆိုကာ ငွေတောင်းတာ၊ ပခုက္ကူမှာ ဖမ်းဆီးပြီး ငွေကြေးတောင်းခံမှုတွေရှိနေတာ စတဲ့ ဖြစ်ရပ်တွေကို စုံစမ်းဖို့ပြောခဲ့ပါတယ်။
ဝက်လက်မြို့နယ်အရှေ့ခြမ်းက ကျေးရွာတွေကို NUG လက်အောက်ခံရွှေဘိုခရိုင် ဝက်လက် PDF တပ်ရင်း (၂)လျှပ်စီးပြောက်ကျားတပ်ဖွဲ့က လက်နက်ဖိုးအဖြစ် တအိမ် ကျပ်နှစ်သောင်း (၁၀)ရက်အတွင်းပေးဖို့ တောင်းတယ်လို့ ဝက်လက်ဒေသခံတွေက DNA ကို ပြောထားပါတယ်။
“ ကျွန်တော်တို့ကို တအိမ် နှစ်သောင်းနှုန်းနဲ့ ဆယ်ရက်အတွင်း ပေးရမယ်လို့ ပြောလာတယ်၊ ကျွန်တော်တို့ရွာက စစ်ကောင်စီက ခဏခဏဝင်ထွက်ခံနေရတော့ လုပ်ရကိုင်ရတာ မပြေလည်ဘူး၊ သူတို့တွေ (ကာကွယ်ရေးတပ်ဖွဲ့ဝင်)ကိုကျွန်တော်တို့က ချစ်လည်းချစ်ပါတယ်၊ ပေးလဲပေးချင်ပါတယ်၊ ဒါပေမယ့်ကျွန်တော်တို့ မပြေလည်ကြတာ ” လို့ ဒေသခံတဦးက DNA ကိုပြောပါတယ်။
ရွှေဘို PDF တပ်ရင်း(၂) လှုပ်ရှားရာ ဝက်လက်အရှေ့ခြမ်းရွာတွေဖြစ်တဲ့ ငါးပတ်ချောင်းရွာ၊ ဘုရားလေးကုန်းရွာ၊ ရေလည်မော်ရွာ၊ အောင်သပြေရွာ အပါအဝင် ရွာများအပြားမှာ တအိမ်ကျပ်နှစ်သောင်းပေးကြရတယ်လို့ သူကဆိုပါတယ်။
ဒီအခြေအနေနဲ့ပတ်သက်လို့ လျှပ်စီပြောက်ကျားတပ်ဖွဲ့ကို DNA က ဆက်သွယ်မေးမြန်းရာမှာတော့ ငွေကြေးကောက်ခံခိုင်းတာမျိုး မဟုတ်ဘူးလို့ အဲ့ဒီတပ်ဖွဲ့တာဝန်ရှိသူတဦးက ပြောပါတယ်။
“ ကျွန်တော့်အနေနဲ့က ငွေကြေးမကောက်ခံခိုင်းပါဘူး၊ ရွာတွေကို လှည့်လည်စည်းရုံးရေးဆင်းတဲ့အခါမှာ ရွာတွေအနေနဲ့ မိုင်းကွင်းလုပ်ရမယ်၊ ကျေးရွာတွေမှာ အုပ်ချုပ်ရေးအဖွဲ့တွေ ဖွဲ့ထားတာ ကင်းပဲစောင့်နိုင်တယ်၊ တကယ်တမ်းဖြစ်လာရင် ဘာမှမလုပ်နိုင်ဘူး၊ တပ်ရင်း (၂)ဆီပဲရောက်လာကြတယ်၊ တခြားရွာတွေမှာတော့ တအိမ်ကို နှစ်သောင်းကျတယ်လို့ ပြောပြတယ် ” လို့ သူကဆိုပါတယ်။
မတ်၊ ၃၀
