အင်္ဂလန် ပရီးမီးယားလိဂ် ဘောလုံးကလပ် ချဲလ်ဆီးဟာ ပေါ်တူဂီ လက်ရွေးစင် တိုက်စစ်မှူး ယာအို ဖီးလစ်ကို ဘောလုံးရာသီ အကုန်ထိ အငှားစာချုပ်နဲ့ ခေါ်ယူလိုက်ပါတယ်။
စပိန်ကလပ် အက်သလက်တီကို မက်ဒရစ် အသင်းမှာ ကစားနေတဲ့ အသက် ၂၃ နှစ်အရွယ် စွယ်စုံရ တိုက်စစ်သမားကို ခေါ်ယူဖို့အတွက် ချဲလ်ဆီးဟာ ကစားသမားရဲ့ လုပ်ခလစာအပြင် အငှားကြေး ယူရို ၁၁ သန်း ပေးချေရမှာ ဖြစ်ပါတယ်။ ချဲလ်ဆီးရဲ့ ပြည်တွင်း ပြိုင်ဘက်တွေ ဖြစ်ကြတဲ့ မန်ချက်စတာ ယူနိုက်တက်နဲ့ အာဆင်နယ်တို့ကလည်း ဖီးလစ်ကို စိတ်ဝင်စားမှု ပြသခဲ့သေးပေမယ့် ကာလတို အငှား စာချုပ်အတွက် အက်သလက်တီကို တောင်းဆိုတဲ့ စျေးက များလွန်းတာကြောင့် နောက်ဆုတ်သွားခဲ့ကြပါတယ်။
ကမ္ဘာ့ဖလား ပြိုင်ပွဲဝင် ပေါ်တူဂီ အသင်းမှာ ပါဝင်ကစားခဲ့ဖူးတဲ့ ဖီးလစ်ဟာ ဇန်နဝါရီ ၁၂ ရက် ညပိုင်းမှာ ဖူလ်ဟမ်နဲ့ ကစားမယ့် ပွဲစဉ်အတွက် ပါဝင်ဖို့ အသင့်ဖြစ်မဖြစ် ဆိုတာကိုတော့ ချဲလ်ဆီး မန်နေဂျာ ဂရေဟမ် ပေါ်တာက မတင်မကျ ပြောကြားခဲ့ပါတယ်။
ဖီးလစ်ဟာ ထူးချွန်တဲ့ ကစားသမား တစ်ယောက်ဆိုတာ သံသယရှိဖို့ မလိုကြောင်း၊ သူဟာ ပြိုင်ဘက် ဂိုးဧရိယာ တဝိုက်မှာ လှုပ်ရှားရင်း အရေးကြီးတဲ့ အပြောင်းအလဲတွေကို ဖန်တီးနိုင်ကြောင်း၊ ပြီးတော့ အသက်ငယ်ပေမယ့် အတွေ့အကြုံ အရမ်းကြွယ်ဝပြီး ချဲလ်ဆီးကို အထောက်အကူကောင်းတွေ ပေးနိုင်မယ်လို့ ယုံကြည်ကြောင်း ပေါ်တာက ချီးကျူးခဲ့ပါတယ်။
အက်သလက်တီကိုဟာ အငှားမချခင်မှာ ကစားသမားရဲ့ စာချုပ်ကို တစ်နှစ်သက်တမ်း ထပ်တိုးခဲ့တာကြောင့် ဖီးလစ်ဟာ ၂၀၂၇ ခုနှစ်၊ ဇွန်လထိ စပိန်ကလပ်ရဲ့ ကစားသမားအဖြစ် ဆက်ရှိနေမယ့် သဘောပါ။ သူက ချဲလ်ဆီးလို ကမ္ဘာ့ထိပ်တန်း အသင်းတစ်သင်းကို ရောက်ရှိလာတဲ့အတွက် ပျော်ရွှင်မိကြောင်း၊ စတမ်းဖို့ဒ်ဘရစ်ဂျ် ကွင်းကြီးမှာ ကစားရင်း အသင်းရဲ့ ရည်မှန်းချက်တွေကို ကူညီ ဖြည့်ဆည်းပေးနိုင်ဖို့ အရမ်း စိတ်လှုပ်ရှားနေမိကြောင်း ပြောသွားပါတယ်။
ဖီးလစ်ဟာ အက်သလက်တီကို မန်နေဂျာ ဒီယေဂို ဆီမြွန်းနဲ့ ဆက်ဆံရေး မပြေလည်မှုတချို့ ရှိခဲ့တဲ့နောက် အသင်းက သူ့ကို ယာယီ အငှားချဖို့ ဆုံးဖြတ်ခဲ့တာပါ။ သူဟာ ချဲလ်ဆီးမှာ ကျောနံပါတ် ၁၁ ဂျာစီကို ဝတ်ဆင်သွားမှာပါ။ ချဲလ်ဆီးဟာ အခု ဆောင်းရာသီ စျေးကွက်မှာ လူငယ် ခြေတက် ကစားသမားကောင်းတွေကို ဆက်တိုက် ဖြည့်တင်းနေပြီး ဘန်နွိုက် ဘာဒီရာရှီးလ်၊ ဒေးဗစ် ဒက်ထရို ဖိုဖာနာနဲ့ အန်ဒရီ ဆန်းတို့စ်တို့ကိုလည်း ခေါ်ယူထားပြီးပါပြီ။
ချဲလ်ဆီး အသင်းဟာ လက်ရှိ ဘောလုံးရာသီမှာ အတော်လေး ရုန်းကန်နေရပြီး အင်္ဂလန် ပရီးမီးယားလိဂ် အမှတ်ပေးဇယားရဲ့ အဆင့် ၁၀ နေရာထိ ကျဆင်း ရပ်တည်နေပါတယ်။
