ပဲခူးတိုင်း၊ ပြည်မြို့ ရွှေတံခါးဘူတာ ပတ်ဝန်းကျင်က နေအိမ်တွေ ကိုသရေခေတ္တရာမြို့ရိုးနဲ့ မလွတ်ဘူးလို့ဆိုကာ ဘူဒိုဇာနဲ့ထိုးဖျက်နေတယ်လို့ သိရပါတယ်။
မတ်လ ၄ ရက်နေ့ မနက်ကစပြီး ပြည်မြို့ ရွှေတံခါးရပ်ကွက် ၊ရွှေတံခါးဘူတာ ပတ်ဝန်းကျင်က နေအိမ်တွေနဲ့ခြံစည်းရိုး အုတ်တံတိုင်းတွေကို ရှေးဟောင်းသုတေသနဌာန ပိုင်မြေလို့ ဆိုကာ ဘူဒိုဇာနဲ့ ထိုးပြီး ဖယ်ရှားဖျက်ဆီးနေသလို ကျန်သေးတဲ့အိမ်တွေကိုလည်း ရက်ပိုင်းအတွင်းအပြီးဖယ်ပေးဖို့ အမိန့်ထုတ်ထားတယ်လို့သိရကြောင်း Pyay Underground News (PUGN) က ဆိုပါတယ်။
‘နေဝင်းအာဏာသိမ်းပြီးခါစက ကျောက်ရူးထပြီးလုပ်သလို ဒီလောက်အဆင်မပြေတဲ့ကာလကြီးမှာ ပြည်သူတွေကိုထပ်ဒုက္ခပေးတာပေါ့။ပြည်မှာ နဝဒေးလမ်းမကြီးဘေးကအိမ်တွေကိုလည်း ဖျက်မယ်လို့ သိရတယ်’လို့ ပြည်တက္ကသိုလ်အနီးနေ တက်ကြွလှုပ်ရှားသူတစ်ဦးကပြောပါတယ်။
ငါးရွာ အုပ်စု ၊ကန်သာယာရပ်ကွက်၊နဂါးတွန့်တံခါးရှေ့ ကအိမ်တွေကိုလည်း မြို့ရိုးနဲ့မလွတ်ဘူးဆိုကာ လာဖျက်မယ်လို့ ဆိုကြောင်း PUGN ကဆိုပါတယ်။
ပြည်မြို့ နဝဒေးလမ်းမကြီး ဘေး ၇၅ ပေထဲပါနေတဲ့ အိမ်တွေကိုဖျက်မယ်လို့ သိရသလို ပြည်မြို့အဝင် ဆယ်ထပ်ကြီးဘုရားနောက်ကျောကိုလည်း လမ်းဘေး ပေ ၅၀ အတွင်း ပါနေတဲ့အိမ်တွေကို ဖျက်မယ်လို့ သိထားကြောင်း PUGN ကဆိုပါတယ်။
‘ကျွန်တော်မြင်တာက ပြည်သူတွေ အဆင်မပြေတာများနေရင် သူတို့ကိုတော်လှန်ဖို့ အာရုံမရောက်နိုင်ဘူးဆို တဲ့အထင်နဲ့ ပြည်သူတွေကို လိုက်ဒုက္ခပေးတာလို့မြင်မိတယ်’လို့ တက်ကြွလှုပ်ရှားသူကဆိုပါတယ်။
မတ်လ ၃ ရက်နေ့ညကလည်း ပြည်မြို့၊ဗိုလ်ချုပ်လမ်းပေါ်ရှိ ကွမ်းယာဆိုင်တွေကို ကြိုတင်အသိပေးခြင်း မရှိဘဲ ညအချိန် စစ်တပ်က ကားနဲ့ လာသိမ်းသွားတယ်လို့လည်း ဆိုပါတယ်။
