၁၅၊ ဒီဇင်ဘာလ၊ ၂၀၂၁။
ချင်းပြည်နယ် မင်းတပ်မြို့နယ်နဲ့ အနီးတစ်ဝိုက်မှာ နေ့စဉ်တိုက်ပွဲဖြစ်ပွားနေပြီး စစ်ရေးအခြေအနေ တင်းမာနေတယ်လို့ CDF-MINDAT ကသတင်းထုတ်ပြန်ခဲ့ပါတယ်။
ဒီကနေ့ ဒီဇင်ဘာလ ၁၅ရက်နေ့ မွန်းလွဲ ၁နာရီ၃၀မိနစ်ခန့်မှာ မယ်လယ်ကုန်းကျေးရွာအနီးမှာ အကြမ်းဖက်စစ်အုပ်စု မိုင်းဆွဲခံရပြီးနောက် အကြမ်းဖက်စစ်အုပ်စုနဲ့ CDF-MINDAT၊ ယော PDFပူးပေါင်းအဖွဲ့တို့ တိုက်ပွဲဖြစ်ပွားခဲ့ပြီး စစ်အုပ်စုက ထိခိုက်သူများပြားနိုင်တယ်လို့ သိရပါတယ်။
တိုက်ပွဲအပြီးမှာ ကျောက်ထုမြို့ကနေ စစ်အုပ်စုရဲ့ အင်အား ၁၀၀ခန့်ဟာ စစ်ကူရောက်ရှိလာပြီး မယ်လယ်ကုန်းကျေးရွာမှာ တပ်စွဲထားတယ်လို့ CDF-MINDATက ထုတ်ပြန်ပါတယ်။
တိုက်ပွဲအတွင်းမှာ CDF-MINDATနဲ့ ယော PDFတို့ဘက်က ထိခိုက်သူမရှိခဲ့ဘူးလို့ ဆိုပါတယ်။
ဒီဇင်ဘာလ ၁၂ရက်နေ့ ညနေ ၃နာရီခန့်ကလည်း ကျည်းရွာနဲ့ လယ်ဆောကျေးရွာကြားမှာ တိုက်ပွဲတစ်ကြိမ်ဖြစ်ပွားခဲ့ပြီး အင်အား ၇၂ဦးနဲ့ နယ်မြေရှင်းလင်းရေး လာရောက်လုပ်ဆောင်တဲ့ စစ်အုပ်စုကို ပူးပေါင်းတပ်ဖွဲ့ ချုံခိုတိုက်ခိုက်ခဲ့တာဖြစ်တယ်လို့ သိရပါတယ်။
ချုံခိုက်တိုက်ခိုက်ခံရတာကြောင့် အထိနာခဲ့ရတဲ့ စစ်အုပ်စုဟာ လယ်ဆောကျေးရွာထဲကို ဝင်ရောက်ပြီး ဖျက်ဆီးမှုတွေ လုပ်ဆောင်ခဲ့ပါတယ်။
ဒီဇင်ဘာ ၁၃ရက်နေ့ မနက် ၁၁နာရီဝန်းကျင်မှာ လယ်ဆောကျေးရွာအနီးမှာပဲ အကြမ်းဖက်စစ်အုပ်စုနဲ့ ပူးပေါင်းတပ်ဖွဲ့တို့ ထပ်မံတိုက်ပွဲဖြစ်ပွားခဲ့ပြီး စစ်အုပ်စုက ၁၀ဦးထက်မနည်း သေဆုံးကာ ဒေသခံတွေထံက စစ်အုပ်စု လုယက်ခိုးယူသွားတဲ့ ပစ္စည်းတွေ ပြန်လည်ရရှိခဲ့တယ်လို့ သိရပါတယ်။
မင်းတပ်မြို့နယ်နဲ့ အနီးတဝိုက်မှာ စစ်ရေးအရှိန်တွေ တင်းမာနေပြီး စစ်အုပ်စုက တိုက်ပွဲဖော်ဆောင်ဖို့ ကြိုးပမ်းနေတယ်လို့ သိရပါတယ်။
ဓာတ်ပုံ- CDF-MINDAT
